Pur prakowi Zaiawn naka rowsira kown mih
CHAKRAMANG tek mih, “Aw katpaw ka chah dowi mih masiuüa, tek piaw meng diah;
katpaw tuk penchow kimuowi mu rau dowi mih masiuüa, apiawma tek meng diah.
Tawngplawng kowchow panow hua uowi mih masiuüa lak-e
nuata mih masiuüa kowh chauüa nalang kawm kown.
Mapaw hangkow ngan diah;
en kowh tangbung mih uarah küng diah,
now en kowh tangbung uaniang paw phiaah küng diah.
En kowh tangbung tük müa leng paw klangah küng diah,
now tangbung tük müa chung paw akhawtma changah diah.
Tawngplawng kowchow panow hawmlawm hai lakuai prakowi en nacham tauet kown;
en kowh krungchakuüa mih akeng chenchapuüa kowh pren nakrawi powng kown,
now amatni kowh maru uowi dowi mih marow kowi nakrawi uowi büah kown.
Hangkow kram diah, mapaw ang nape en rukrai kown nadowi bowt;
en malauüa khe kowh rukraira en natamata bowt kown,
now en chowng mamaimow mih ming ngak sak kowi en natowah kown nadowi bowt.
Tawngplawng kowchow panow thawp en miia ngengche mih en kowh hua chekhai,
aia ming dow mukuang siphaiuüa kowh CHAKRAMANG chekhai.
Israel kowh chimsaima mih Thurai dow en kowh lawng miia chekhai,
aia dow palusama kowh Thurai chekhai.
Khuata mih hai sak kowi ka arau mih masiuüa iawng en uowi khai,
malauüa thüm khe kowh ahua khuata mih masiuüa iawng en uowi khai.
Nachenganchepaw CHAKRAMANG mih kutplan haw en iawk khowk.
“Nawngchow vüi kowi ang nuata en khai.
Nachenganchepaw sanara abüpma mih hown ang nauang plan paw en iawk kown.
Kunmarau mih khin khe en hownia ang cham dang nawngchow khai.
Nachenganchepaw chowngchowng saksakma achur uowi dowi mih sakraura hown ang nasana en kown.
Ang en kowh lawng miia CHAKRAMANG mami laiklow ang tek khowk.
“Noa chowng kowi ang takham khai,
tuikling mangma uang khe kowh iawng lusa mih ang napiakah kown nadowi bowt.
Nami powm iawng kawmat paw ang takham khowk,
en luk kowi kunmarau kowh ang narip en kown nadowi bowt.
Hungh ün cham tasüt chepaw naia,
mawngma ün cham tasüt chepaw naia.
Nachenganchepaw en vüi ang kowh achur uowi dowi mih sakraura dow nasüt kown nadowi,
ang kowh taking tasangra sangbowk laitawm mih mapaw nachü kown nadowi,” pakhai.
Mami laiklow dow sana en mih CHAKRAMANG tekah mih chekhai.
CHAKRAMANG tek mih, “Aw liku hown kowh piak mih, ka sakklamra dowi mih marow,
en kowi tawk pluplup mih hua hown ang nathawp en kown chowbowt,
now en kowh achüng mih asung khakma mih hua hown ang nachangah kown.
En kowh tap dow asung khakma mih hua hown ang nachangah kown,
now en kowh tapplawt dow tawk pluplup mih hua hown ang nathawpah kown.
En kowh chauüa maten dow nachowng CHAKRAMANG kowh tape kown,
now amatni dow ahuma naka iungra kown.
En dow anowmma rakowi akhawtma nauowi bowt kown,
en hownia mih alakma kowi ransu-uüa nacham uowi kown.
En dow thaulangma nauowi bowt kown,
kramra dow en tut-e nauang kown nadowi bowt.
Maru uang sen en chepaw ang uang chinah mih nadowi,
uang sen en mih maru dow aia mih napiak kown.
“Sünta, lawngha rutchün khawkleng thawp mih maru kowi ang thawpah mih chekhai,
aia dow nathawp rutchün khawkleng kownkow mairing mih ahut müa hown hutah reng.
Siphaiuüa kowi dow nakrawi piakla maru kownkow ang thawpah mih chekhai.
Nachenganchepaw tawng iawng mih tasen müa rutchün khawkleng paw nanowng en kown nadowi,
uang bek en angak miuüa kowh laiklow tawngpaw mrawkra nauowi kown nadowi.
CHAKRAMANG kowh naruüa nakaah kown mih awmrawm sung dow nami chekhai;
aia dow amatni kowi nape awngah kown,” pakhai.
Mru. Copyright © The Seed Company. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.