Isai 41:10

Israeluüa kowh khowng mih

1CHAKRAMANG tek mih, “Pren lakma kowi kowh maru-uüa low,

enni mih ang pur kowi ririmma sünta büa diah.

Chenchapuüa low, ka kür sar büa diah,

uang tatawn büah hanow tek lai büa diah.

Chu, nachet tara kownkow a-i takua talawm diah sik.

2“Satlawt hownia nauang kownkow maru lowk ia kowi towkah mih mia chow?

Anowmma mih Thurai aia kowh lup rakowi aia kowi dow hawah mih chekhai.

Aia dow nami maru rut kowi chenchapuüa kowi ap-ah khai,

now nami maru pur kowi manguüa kowi mih pe khamah sum khai.

Aia kowh saidawng hown amatni kowi dinchow iawng nami maru changah khai,

now aia kowh leba pur kowi dow li hown chapli rown mih iawng aia pe rownah khai.

3Nami maru mih amatni kowi krawiah khai,

katpaw aia mangah dowi tak mih tiama kowi thaulangma aia mang khai.

4Nami lup chang mih mia chow?

Nami lup phaw mih mia hown chow?

Chowngchowng saksakma tawng ngai chow naphaw kown mih auown hownia kamrüt mih mia chow?

Auown hownia uowi mih dow ang CHAKRAMANG chowtaih,

now achur khe paw maru-uüa hown ang nauowi reng kown,” pakhai.

5CHAKRAMANG kowh nami lup khi hanow pren lakma kowi kowh maru-uüa dow kram khai,

now prenchur nammowt kowi kowh maru-uüa dow chür khai.

Amatni dow uang tatawn hanow takua talawm khai.

6Amatni dow lowkkowlowk takhowng khai,

now chowlowkkow tainau kowi tek pe mih,

“Sakkraingma uowiah diah,” pakhai.

7Laksma dow kuh hown kowh uanh thawp mih kowi peah süngürra khai,

now lawngha pheng mih dow lawngha chawk miuüa kowi peah süngürra khai.

Aia dow lawngha tawm taia khi hanow tek mih, “Iung khai,” pakhai.

Aia dow natim dowi kownkow arup aren kowi khir hown akhawtma takah khai.

8CHAKRAMANG tek mih, “Nachenganchepaw aw ang kowh nar Israel,

ang lang ruiah mih Jakawb, ang kowh auiua Abraham kowh krungchak,

9Prenchur nammowt hownia ang uang pawla en khai,

lang la nowm nowm mih arah hownia ang uang hawla en khai.

Ang tek en mih, ‘En dow ang kowh nar.

Ang lang rui en khai; ang nuata en dowi chekhai,’ pakhai.

10Naiawng rakowi hangkow kram diah; ang tawi uowila en reng chekhai.

Hangkow taprüa diah; ang dow en kowh Thurai chekhai.

Ang nape en kür kown, now ang nakhowng en kown.

Now ang kowh hawmlawm rut anowmma mih hown ang nadowk en reng kown.

11“Kunmarau en miuüa maten dow naka rukrai kown.

Kingküa en miuüa dow asaima napiak bowk kown.

12En kowh ransu-uüa kowi krawi chamah chepaw en nakrum kown nadowi bowt,

nasen en kown miuüa kowh dow mapaw alawi nauowi kown nadowi bowt.

13Tawngplawng kowchow panow ang CHAKRAMANG mih en kowh Thurai chekhai,

en kowh hawmlawm rut mih ang dowkta hüah chekhai.

Ang tek khowk, hangkow kram diah;

ang nakhowng en kown taih.

14Aw Jakawb, aw Israel, en dow lowng iawng asowmchow taih chekhai.

Nachenganchepaw hangkow kram diah, ang matia ngengche nakhowng en kown.

Ang CHAKRAMANG, en kowh lawng miia,

Israel kowh chimsaima mih Thurai mami laiklow ang tek khowk.

15Sünta, aiüng chukma chawp pe mih luprak thua müa khawr ang nathawp en kown;

hungma mawngma en nakrawi thua hanow anekma en nachangah kown,

now asowmchow mih hungh ün dow pakdi iawng en nachangah kown.

16Naiawngün kowi dow en krapah hanow li nacham rownla bowk kown,

now liku mih amatni kowi nacham krawi uetta plawt kown.

Nachenganchepaw en dow CHAKRAMANG rakowi naawmrawm kown,

now Israel kowh chimsaima mih Thurai dow en kowh kraingra nachowng kown.

17“Ngare mih hai akhawr hown uowi miuüa dow krawi cham tui khai.

Tawkche tui uowi dowi rakowi tui sakkrai hown amatni kowh kraw kang khai bowt.

Nachenganchepaw ang CHAKRAMANG mih amatni lüleng mih kowi naklangah kown;

ang Israel kowh Thurai mih amatni kowi nanuata kown nadowi.

18Singh kau uowi dowi mih hungh kowi aw ang nape uowiah kown,

now lawngrawi kowi mih awchawng ahuma ang nape uowiah kown.

Süngrüp süngkangma kowi ang nathawp pe kanh kown,

now akang khawngma mih krawng hownia tui lawt iualua ang nachangah kown.

19Süngrüp süngkangma kowi dow achap kawm sing ang nachowk pe kown,

nakowi dow sidar, ri, naingsa, kanrawn, thaing, karpowng hai painglang singh ang nachowk pe kown.

20Nami khita hanow ang CHAKRAMANG chowtaih nami lup chang mih pami maru natuk kown towbowt,

Israel kowh chimsaima mih Thurai chowtaih naiawngün lup maten chang mih pami maru natuk kown towbowt,” pakhai.

Arup arenuüa dow asung uowi dowi

21CHAKRAMANG, Jakawb kowh mang tek mih, “Akeng chenchapuüa kowh thuraiuüa low,

tawng ngai chow enni ia chang mih kawmat tüng ang büa madiah.

22Enni kowh nowng changra hown tawng chow naown kown mih tek ang büa madiah,

now achük alai kowh tawng ngai chow phaw mih lawnguan tek anging madiah.

Naiawngün tuakah hanow achur kowi tawng chow own mih anging natuk kown towbowt,

nadowi now tawng ngai chow naphaw kown mih lawnguan phuang anging diah.

23Pur prakowi tawng chow own kown mih tek anging diah,

nahanow enni thuraiuüa chekhai pami anging natuk kown towbowt.

Aiung lah, angak lah, lowk dowi now lowk dow chang büa diah,

nami khita hanow amawlawma pat anging pacham awda lah.

24Nachenganchepaw aprawngma che tek now enni dow tawngpaw nadowi;

enni kowh lup paw tawngpaw nadowi chekhai,

now enni kowi kowh rui enni mih maru dow suiiai kaniaima chekhai.

25“Satlawt prakowi ang ming nakrawi phuang lowk ia kown;

aia kowi tawngphak hownia nauang kownkow ang krowkah khai,

now aia dow uang tarü thüm khowk chekhai.

Thundi hai tui hown lawkah mih iawng,

now bawn puh thawp miuüa nek suplawk mih iawng

aia dow pren kruitown miuüa kowi khawk hown nathuaah kown.

26Nami lawnguan kowi anging natukla kownkow auown khe mia chow tek anging?

Now, ‘Aia tek mih na nowm,’ pahai anging nowng tekla kownkow auown khe mia chow tek anging?

Miapaw tek anging dowi chekhai, miapaw uang rik pe tuk anging dowi chekhai,

now enni tek lai mih miapaw ta dowi chekhai.

27Nami satang dow auown khe Zaiawn kowi ang chowtaih tek pe khai,

ang tek pe mih, ‘Mü madiah, enni kowh maru-uüa uang towm khai bowt,’ pakhai.

Jerusalem kowi nami satang iung phowng mih ang kowchin pe maru lowk ia khai.

28Akeng thuraiuüa kowi ang tang mü che miapaw natek lai kown mih uowi dowi,

ang lüntaah mih laiklow kowi nowng klang ang kown mih miapaw uowi dowi chekhai.

29Amatni dow lowkchow paw asung uowi dowi,

amatni kowh lup dow tawngpaw nadowi chekhai.

Lawngha hown kowh amatni kowh arup aren dow tawngpaw kür uowi dowi,

amatni dow tawngpaw nowng chang dowi chekhai,” pakhai.