Isai 27

Israel naka lawngra kown mih

1Nami ni khe dow CHAKRAMANG mih aia kowh kramra uowima mih, kri kraingma mih hai nowng changra uowima mih saidawng hown Leviathan pami rua mang kowi naripah kown. Aia dow nami sata kowi kowh kramra uowima mih asak uowi mih kowi nadungta kown. 2Nami ni khe dow uih achakma mih grep krum lawnguan kowi CHAKRAMANG natek kown mih,

3“Nami grep krum dow ang CHAKRAMANG mingkhetah reng mih chekhai,

nakowi dow atungma ang thut pe tui reng chekhai.

Nami grep krum kowi miapaw nauang piakta dowi kownkow

ni chut uar prowt chi ang chawngah reng chekhai.

4Nami grep krum luk kowi ang kunmarau dowi bowt chekhai.

Tawkche aia hownia chuh mung awr ru hanow aia kowi ang nasenah kown.

Aia kowi dow khawk hown ang nathuaah kown,

now aia kowi dow ang natowkta bowk kown.

5Nachenganchepaw aia che ang natakhula kown mih nau khai hanow

aia mih ang hown pacham thawp taking tasangra lah,

ow, aia mih ang hown pacham thawp taking tasangra lah,” napa kown.

6Pur prakowi dow Jakawb mih nasawt prün kown.

Israel mih naawr nawr hanow naawr pau kown,

now palusama kowi auih atekma nauowi kown.

7Amatni kowh ransu-uüa kowi CHAKRAMANG ripah iawng Israel kowi dow CHAKRAMANG ripah dowi,

amatni kowh ransu-uüa kowi aia saiah iawng Israel kowi dow aia saiah dowi chekhai.

8Israel kowi dow prenlang kowi cham pe takhangah mih hown aia ripah khai,

amatni kowi dow satlawt li adenma mih hown aia cham rownla khai.

9Jakawb kowh angak dow maiawng phaw khü chiang aia nalawtta pe kown:

amatni kowh phuchuara hua ün adima changta büah khü chiang,

now Asera limpu hai maikhük towk müa phuchuara piakta büah khü chiang.

10Tap tapat lut mih marow dow süngrüp süngkangma iawng rarim raramma naphaw kown,

nakowi dow tawncher hawmh nakrawi taw hanow nakrawi chata sing ram bowk kown.

11Nakowi kowh singh mia dow nakeu hanow nataklowk bowk kown,

now naiawngün singh mia keu dow masiuüa hawmh nachangla sawp kown.

Amatni dow prengia uowi dowi mih chenchap chekhai.

Naiawng rakowi amatni kowi thawpah miia mih amatni kowi nasanaah kown nadowi.

12Aw Israeluüa, pur prakowi Iufratis aw hownia Aigupta pren sünghi mowr aia maru-uüa kowi CHAKRAMANG nakuaah kown, now chapli hai cha chak kowi nakraah kownkow iap cha khe kowh iawng aia maru-uüa kowi aia nakloah kown. 13Nami ni khe dow Asuria hai Aigupta pren kowi cham takhang mih Israeluüa kowi nahawah kownkow atünma baw natün kown. Nahanow aia kowh chimsaima mih hungh kowi CHAKRAMANG kowi nachup naiiaah kownkow Israeluüa mih Jerusalem kowi nauang plan büah bowt kown.