Hosea 3

Amasi kowi Hosea klanah mih

1CHAKRAMANG tek ang mih, “Akeng mih kachakuüa hown en masi chang iang khowk chepaw kowsakrauah diah. Israeluüa mih akeng thurai kowi cham chupiia khai, now phuchua müa kawm paw cham cha büah reng chekhai. Nachenganchepaw CHAKRAMANG dow amatni kowi sakrauah reng, nami iawng en paw en masi kowi kowsakrauah diah,” pakhai.

2Naiawng rakowi tai laitanga iun hai püm hamüt tawng hown nami masiuüa kowi ang uang ranla khai. 3Nami kung kowi ang tek pe mih, “Ang kim kowi akrama en nauowi kown takla, now en kowh chawkkrawma lup mih en nataingta kown takla. Nami khin khe mia hown paw en nataphua taiua kown nadowi; ang hown khowm padow en nataphua taiua kown nadowi,” pape khai.

4Nami powm iawng Israeluüa mih mang, aluchow, uanap pawi, phuchua müa hua, ephawd kowrmow hai arup aren uowi dowi kowi ni akawmma nauowi tak kown. 5Nami kung kowi amatni dow CHAKRAMANG Thurai hai David chuprek chaprek hownia kowh amatni kowh mang prakowi naplan büah bowt kown. Achur prakowi dow CHAKRAMANG kowi kram kowh chür klukluk se nauang büah kown, now CHAKRAMANG mih amatni kowi nachangah iung bowt kown.