Hagai 2

Klangiungma nathawp Thurai chup kim sar kown mih

1Akung kowi ranit la kowi kowh 21 ni khe risi Hagai kowi CHAKRAMANG tek pe mih, 2“Juda pren kruitown mih Sealtiel kowh chapa Zerubabel, Jehozadak kowh chapa uamow lang kri mih Josua hai akeng mih maru maten kowi kowlünta madiah. En nalüntaah kown mih, 3‘Enni pungmadawng kowi alai kowh mami Thurai chup kim klangiung krang khi mih uowi ne bow? Now kawmat tawng iawng chow mami Thurai chup kim enni khi? Alai kowh mami Thurai chup kim klangiung krang kawmat kowh hown tuah e kawmat kowh dow tawngpaw nadowi tak pami enni ka tuak tak bow?

4“‘Nachenganchepaw aw Zerubabel, sakkraingma uowi diah. Aw uamow lang kri mih Jehozadak kowh chapa Josua, sakkraingma uowi diah. Aw pren kowi kowh maru-uüa, sakkraingma uowi büa diah. Enni bowkbowk chang lup büa diah. Tawngplawng kowchow panow ang lang kri lang kraing mih CHAKRAMANG tawi uowila enni reng chekhai. 5Aigupta pren hownia enni uang lawt khe ang lümla natawi uowila enni reng kown taih pahai ang takham khai. Nami powm iawng kawmat paw ang lümla mih enni tut-e tawi uowi reng chekhai. Naiawng rakowi hangkow kram büa diah.

6“‘Ang lang kri lang kraing mih CHAKRAMANG tek khowk. Khin kra dowi bowt kowi mukuang, lusa, sata hai krawng mih lihowng uang khe kowh iawng ang nahowngah pakat iawk kown. 7Chenchapuüa maten kowi naiawng ang howngah mih khin khe dow amatni mih amatni kowh dawngthawnguan mami ang kowh chup kim kowi nauang pawla kown. Nakhowk khe dow ang kowh chup kim kowi kraingra natek kown. 8Tai paw ang kowh chekhai, now kuh paw ang kowh chekhai. 9Alai khe kowh ang kowh chup kim lak-e kawmat kowh ang kowh chup kim mih nalang kri kraing kown. Mami arah kowi ang nauang pawla taking tasangra bowt kown. Ang CHAKRAMANG mami laiklow ang tek khowk,’ pape diah,” pakhai.

Asürlawkma mih chenchap kowi peah prasi mih

10Persia pren kowi Darius chowm mang mih pre ning kowi kowh taku la kowi lacher 24 ni khe risi Hagai kowi CHAKRAMANG tek pe mih, 11“Ang lang kri lang kraing mih CHAKRAMANG tek khowk, ari aiang lawnguan kowi uamowuüa kowi kowlünta madiah. En nalüntaah kown mih, 12‘Laiuan kowi, maru lowk ia nacham changla phuchua kownkow chimsaima mih chaknga uan hown duala now cham tarü khai. Nakhowk khe nami uan mih kawm, chakkham eng ia, grep tui, kanrawn sau hai akeng mih chap kowi cham takak khai e dow naiawngün uanh natawi chimsai kown bow?’ pape madiah,” pakhai.

Naiawng Hagai lüntaah khe uamowuüa klangah mih, “Chimsai dowi iowh,” pakhai.

13Nakhowk khe Hagai plan lüntaah mih, “Naiawng now cham kakta uak kowh tasür talawk khowk mih maru lowra mih uanh kowi cham kakta khai e dow nami uanh natawi tasür talawk kown bow?” pakhai.

Nakhowk khe uamowuüa klangah mih, “Ow, nami uanh dow natawi tasür talawk kown towbowt,” pape khai.

14Nakhowk khe Hagai tek pe mih, “CHAKRAMANG tek mih, ‘Nami powm iawng ang mik kowi paw mami maru-uüa hai mami chenchapuüa mih asür alawkma chekhai. Naiawng rakowi amatni changah mih lup hai amatni phuchuaah mih uanh maten paw asür alawkma chekhai. 15Kawmat hownia dow ang kowh chup kim apiaknama uowi khe tawng iawng chow enni uowi mih tuakah büah kaneu diah. 16Nakhowk khe dow nakowpaw luprak pirmi mawn kown mih sakowmma hown kowkowi khe hamüt mawnchow taih kowka khai. Sakowmma hown grep tui 50 set nakowpaw kownkow kowkowi khe 20 setchow taih uang kala grep tui khai. 17Enni kowh luprak keu müa hai piak müa rawka ün ang uang pawla enni khai; enni lupah mih maten luk kowi ria hown ün ang pe piakah khai. Nachenganchepaw tarip hanow ang prakowi enni uang plan dowi chekhai. 18Ani taku la kowi kowh lacher 24 ni kowi dow ang kowh chup kim nachang kownkow enni phükta achüng khai bowt. Khaleng dow enni vüi tawng chow ang nachang enni kown mih mü büa diah. 19Kawmat dow enni kowh chapam kowi cha liu uowi dowi chekhai, now enni kowh grep rui, uidut singh, dalim singh hai kanrawn singh kowi ün auih e chow chekhai. Nachenganchepaw ani hownia bowt now ang nape enni prasi bowt kown,’ pakhai,” pape khai.

Zerubabel kowi CHAKRAMANG peah prasi mih

20Nami ni khe risi Hagai kowi CHAKRAMANG plan tek pe mih, 21“Juda pren kruitown mih Zerubabel kowi en natek pe kown mih, ‘Mukuang hai lusa mih lihowng uang khe kowh iawng ang nahowngah kown. 22Manguüa kowh mang chowm rah mih ang napawta pe kown, now amatni kowh nowng changra kür mih ang napiakta pe kown. Kawrnga kari hai kari te miuüa kowi ang naküata lut kown. Now kawrnga hai kawrnga kowi kowh chowm miuüa kowi amatni kowh tainau-uüa saidawng kowi ang nape kowngah kown. 23Aw Sealtiel kowh chapa ang kowh nar Zerubabel, nami ni dow ang vüi kowi en nakruitown pren kown. Tawngplawng kowchow panow en kowi dow ang lang klo en mih chekhai,’ pape diah. Mami laiklow dow ang CHAKRAMANG tek khowk,” pakhai.