Habakuk 3:19

Risi Habakuk chup Thurai mih

1Mami dow meng iawng risi Habakuk chup Thurai mih laiklow chekhai. 2Risi Habakuk tek mih,

“Aw CHAKRAMANG, en kowh awdara uowima mih lup lawnguan ta hanow ringkawma hown ang kram en khai;

aw CHAKRAMANG, naiawng mih lup anging chowng kowi paw chang iawk diah,

now naiawng mih lup anging chowng kowi paw tüng anging iawk diah.

En kunmarau khe kowh en sana kown mih laiklow hangkow tamata diah.

3Nauang lawng anging kownkow Teman süng hownia Thurai uang mih ang khi khowk,

chimsaima mih Thurai dow uang lawng anging kownkow Paran hungh hownia uang tarü khowk chekhai. [Sela]

Aia kowh kri kraingra dow mukuang kowi tawk khai bowt,

now aia kowh rowsi kiowrira dow lusa kowi tek khai bowt.

4Aia dow sat iawng tawk pluplup khai;

aia rut hownia dow anowi uang sawt reng.

Nami anowi kowi dow aia kowh kür uowi chekhai.

5Aia pur kowi dow hawi rik mang reng,

now aia kung hownia paw makowng hawi tawi krawi reng chekhai.

6Aia iowng khe lusa mih chü reng chekhai;

aia krawi tang mü khe chenchapuüa mih chür reng chekhai.

Achük alai kowh hungma mawngma dow aia dita nak khowk,

now alai chowng khe kowh hungh ün paw aia krawi chanta bowk khowk.

Aia dow chowngchowng saksakma taklowi dowi chekhai.

7Kusan kowi kowh maru-uüa dow nowng chang powng changra kowi uowi thüm mih ang khi,

now Midian kowi kowh maru-uüa paw kram kowh chürla kluk mih ang khi chekhai.

8“Aw CHAKRAMANG, aw luk kowi en sak-ih dowi chekhai bow?

En kowh kunmaraura aw luk kowi uang kla khai bow?

Sata luk kowi en sak-hiah mih nowm khowk bow?

Kawrnga kowi chowm se en krawi len mih naiawng rakowi bow?

Nadowi, lawngra kawrnga kari kowi en uang chin mih chekhai.

9En kowh leba en dowkah khai bowt,

now leba sek dow en tawngah khai bowt.

Lusa dow aw iuk hai aw sowm hown en bakah khai.

10Hungma mawngma dow khi en hanow chür reng chekhai,

Tui ahuma dow hawr klunglung khai.

Abüpma mih tui dow atün nowk rumrum khai,

tuilowng dow alowngma pat talowng phunglung khai.

11“En kowh leba sek iow prawn rawn se tawkla plup khe kuang kowi kowh sat hai lama khowm uam chü dowi chekhai,

now pla nowi iawng en kowh reh tawk pluplup khe kuang kowi kowh sat hai lama khowm uam chü dowi chekhai.

12Kunmarau hown lusa kowi en uang khai,

now chenchapuüa kowi en thuaah khai.

13En maru-uüa kowi nauang lawngah kownkow en uang tarü khai,

nümnapah mih maru-uüa kowi nauang lawngah kownkow en uang lawt khai.

Maru ngakuüa kowh lu dow en uang dita pe khai,

now amatni kowh hut dow asaima en klawngta pe khai.

14Naset anging kownkow aia kowh siphaiuüa dow uang sen anging khai.

Nakhowk khe tuak kawm tuak krat miuüa kowi kukpa krawi piak miuüa dow piawla sawm khai.

Nachenganchepaw amatni kowh aluchow kowi dow aia kowh reh hown en sawtah khai.

15Ransu-uüa kowi napiakta kownkow sata kowi kawrnga hown en uang tarü khai,

now sata tui dow alowngma pat talowng phunglung khai.

16“Nami klow ang tata hanow ang chür klukluk khai;

ang kram lai kowh ang kowh ve hai khawk paw chür klukluk khai.

Nachenganchepaw anging kowh ransu-uüa luk kowi akat dow phih nauang ting kown.

Naiawng rakowi nami ni ang nakhila kownkow town sak se ang nachawng reng kown.

17Nami khin khe uidut singh kowi uidut uihchen uowi dowi chepaw,

grep ruih kowi grep uih uowi dowi chepaw,

kanrawn singh kowi kanrawn uih uowi dowi chepaw,

üa hai laih kowi luprak phaw dowi chepaw,

ruapur tung kowi ruapur uowi dowi chepaw,

chia rum kowi chia uowi dowi chepaw,

18CHAKRAMANG kowi ang narowsi kiowri reng kown,

ang kowh lawng miia Thurai kowi ang naawmrawm reng kown.

19CHAKRAMANG Thurai dow ang kowh kürra chekhai;

aia dow ang kowh klowng mih naki klowng iawng akrowpma chang ang khai,

Naiawng rakowi arah kroma mih kowi ün ang nowng iowng khai,” pakhai.

(Mami dow meng krui mih vüi chekhai. Mami prasi lük dow ang kowh ana pek iawng aiang uowi mih tünteu chang müa hown natekah kown takla).