Uown Thawp 7

Tuikling mangma uang mih lawnguan

1Nami kung kowi CHAKRAMANG plan tek pe Noa mih, “En hai en kimchakuüa hailawm chawnlawng kowi pün büa diah. Tawngplawng kowchow panow kawmat kowh chowng maru-uüa pungmadawng kowi kowh achi anawmma mih maru dow en lowkchow taih chekhai. 2Chimsaima mih asadua chap maten hownia ala hai ama ranit chum chi chawnlawng kowi en napawla kown. Now chimsai dowi mih asadua chap maten hownia paw pachum chi chawnlawng kowi en napawla kown. 3Nami klen kowi kuang kowi kowh iow mih uakling uaber chap maten hownia paw ranit chum chi en napawla kown. Naiawngün dow lusa kowi aliu nauowila reng kownkow en tut-e towla diah. 4Tawngplawng kowchow panow kawmat hownia ranit ni kung kowi dow lusa kowi uang ang nauang pe uangah kown chekhai. Nami uang dow likawm ni likawm uar mowr amowt uowi dowi kowi nauang kown. Krawng luk kowi kowh ang thawpah mih asak uowi mih maten lusa hownia ang namata kown,” pakhai. 5Naiawng rakowi Noa dow CHAKRAMANG kowh ana pek iawng bowkbowk mih lup chang khai bowt.

6Lusa kowi tuikling mangma uang mih khin khe Noa kowh ning dow 600 chekhai. 7Tuikling mangma hownia naplaila kownkow Noa dow amasi hai achapauüa hai aiaumowuüa hown chawnlawng kowi kowpün khai bowt. 8-9Noa kowi Thurai peah ana khe kowh tek pe mih iawng dow chimsai mih hai chimsai dowi mih asadua, uakling uaber, kam hai sowr mih chap maten aku aklang hai ala ama achum achumchow chawnlawng kowi Noa pawla khai. 10Now ranit ni kung kowi dow lusa kowi tuikling mangma uown tarowng khai bowt. 11Krawng dak hownia tui uang lawt iualua khai, now mukuang hownia paw tui uang takhük plawtlawt mih powm iawng uang uang khai bowt. Naiawng uown phaw mih dow Noa kowh ning 600 khe pre la kowi kowh lairanit ni khe chekhai. 12Naiawng hai nami uang dow likawm ni likawm uar mowr krawng luk kowi uang hing uangta hüah chekhai.

13Uang iu uown uang mih ni khe Noa mih amasi hai aiaumowuüa hai achapa Sem, Ham hai Jafet büah hown chawnlawng kowi kowpün khai bowt. 14Amatni tut-e dow tawncher, kaurawng uaramchak, uakling uaber, kam hai sowr mih hown asak uowi mih chap maten paw pachumchowchi chawnlawng kowi kowtawi pün khai. 15Hü sak kowh sing mih chap maten achum achumchow Noa hown chawnlawng kowi kowtawi kup khai. 16Noa kowi Thurai peah ana khe kowh tek pe mih iawng dow aku aklang hai ala ama mih achum achumchow chawnlawng kowi kowkup khai. Nami kung kowi dow CHAKRAMANG mih büngta pe chawnlawng plawt khai bowt.

17Nami hownia now likawm ni mowr lusa kowi tuikling mangma uang khai bowt. Now tui hu lai bowt rakowi chawnlawng dow krawng hownia awr tapowng khai. 18Nami kung kowi paw lusa kowi mih tui uang hu ngamlam khai; now chawnlawng paw tui luk kowi krawi nawm pawlaw khai. 19Lusa kowi dow tui uang hu ngamlam chekhai. Naiawng rakowi lusa kowi kowh akro akroma mih hungh maten lim bowk chekhai. 20Hungma mawngma maten lim bowk klen kowi paw tui mih laitanga muk luk kowi tak awr pün khai.

21Naiawng rakowi krawng luk kowi kowh asak uowi mih maten kowng bowk khai; uakling uaber ün, tawncher ün, kaurawng uaramchak ün, kam hai sowr mih hown maru ün kowng bowk chekhai. 22Süng kowi kowh uowi mih srui hü sak kowh sing mih chap maten dow kowng bowk khai. 23Thurai mih naiawng hai krawng luk kowi kowh asak uowi mih maten kowi lusa hownia mata khai; lusa maru ün, asadua ün, kam hai sowr mih hown kuang kowi kowh iow mih uakling uaber ün lusa hownia tama khai bowt. Noa hai aia tut-e kowh chawnlawng kowi tawi uowi miuüa ngetchow taih ta sing khai. 24Lusa kowi mih 150 ni mowr tui limah khai.