Ezra 1

Pren kowi Judauüa uang plan mih

1Persia pren kowi Kuras uown chowm mang mih ning khe risi Jeremia tut-e kowh CHAKRAMANG laiklow uang tachih khai bowt. CHAKRAMANG peah saktuak rakowi Kuras dow mami laiklow ruiah hanow aia kowh pren maten kowi maiawng krawi phuang khai:

2“Mami dow Persia pren mang ang Kuras kowh ana pek chekhai. Palusama luk kowi pe chowm ang mang mih dow CHAKRAMANG mukuang kowi kowh Thurai chekhai. Aia dow Juda pren kowi kowh Jerusalem marow kowi aia vüi nathawp pe kim lowk kown mih kurdik pe ang khai. 3Naiawng rakowi enni Thurai maru-uüa pungmadawng kowi CHAKRAMANG Thurai kim chang kown nau miuüa dow Juda pren kowi kowh Jerusalem marow kowi pacham kowi lah, now nakowi dow CHAKRAMANG Thurai kim mih pacham chang lah. Tawngplawng kowchow panow nakowi dow Thurai mih uowi reng chekhai. Nakowi kowkowi miuüa tut-e dow amatni kowh Thurai mih pacham tawi uowi reng lah. 4Lowra kowi cham uowi mih Thurai maru Israeluüa che Jerusalem marow kowi plan kown nau khai hanow naiawngün maru-uüa kowi dow amatni kowh kimping namkhetuüa mih kuh, tai, uanh hai tawncher ün nakrawi peah kown takla. Nami klen kowi Jerusalem marow kowi Thurai chup kim chang müa amatni sak nau hown nakrawi pe uanh kown mih paw tek pe diah,” pakhai.

5Nahanow Juda hai Benjamin krungchak aluchowuüa, uamowuüa hai Leviuüa pungmadawng kowi kowh Thurai peah saktuak miuüa dow Jerusalem marow kowi nakowchang CHAKRAMANG kim kownkow kamrüt khai bowt. 6Now amatni kimping namkhetuüa dow amatni kowi kuh uanh, tai uanh, akeng mih uanh, tawncher hai asung khakma mih uanh ün hown krawi khowngah khai. Nami klen kowi kowmatia sak nau hown kowh uanh pek paw krawi peah büah khai. 7-8Mang Nebuknezar mih aia chowm mang khe Jerusalem marow kowi kowh CHAKRAMANG kim hownia uanh maten pawla hanow aia kowh thurai chup kim kowi towah khai. Naiawngün uanh dow Nebuknezar kowh thurai kim hownia Kuras mih aia kowh dawngthawnguan chawng mih Mithredat kowi uang pe lawtta khai. Now Mithredat dow naiawngün uanh mih rüaah hanow Juda pren kruitown mih Sesbazar rut kowi ap pe khai. 9Naiawngün uanh dow kuh lawngpan 30 klüng, tai lawngpan 1,000 klüng, tai puh 29 klüng, 10kuh bia chah 30 klüng, now akeng mih uanh 1,000 klüng chekhai.

11Kuh hai tai uanh dow bowkbowk kowi 5,400 klüng chekhai. Naiawngün uanh dow Babulawn pren kowi kowh cham takhangra hownia Jerusalem marow kowi maru kawmuüa uang plan khe kowh Sesbazar uang pawla mih chekhai.