Ezekiel 39

Gawg sum mih

1“Aw maru chapa, Gawg kowi pur prakowi tawng chow naphaw kown mih laiklow maiawng kowtek pe diah: CHAKRAMANG Thurai tek mih, ‘Aw Mesek hai Tubal chenchap kowh kruitown mih Gawg, ang dow en kowh ransu chekhai. 2Kung prakowi ang naui en hanow ang naküngla en kown. En kowi mih tawngphak pra kowh rihi chur hownia ang nauang pawla en hanow Israel kowh hungma mawngma süng kowi ang nasa en kown. 3Nami kung kowi dow en lakuai rut kowi kowh leba hai hawmlawm rut kowi kowh leba sek mih ang phekta en hanow nakuakta en kown, now akhowng mih uowi dowi kowi ang natowta hüah kown. 4Now en hai en kowh siphaiuüa hown en hown kowh tawi tabawng mih akeng chenchapuüa hailawm Israel kowh hungma mawngma kowi enni natakuakla pan kown. En kowi mih langta hai kaurawng uaramchak hawmh chakkham ang nachangla en kown. 5Ang CHAKRAMANG Thurai tek khowk, en kowh uak mih dowm kowi kowh akuangma mih rah kowi natakuak hüah kown. 6Magawg luk kowi hai alakma mih pren kowi thaulangma uowi miuüa luk kowi ang nauang chin pe maih kown, nahanow ang chowtaih CHAKRAMANG pami natuk büah bowt kown.

7“‘Ang kowh maru Israeluüa pungmadawng kowi ang kowh ming chimsaima mih ang natüngah kown; ang kowh ming mih ang nape tasür talawkah kown nadowi bowt. Nahanow ang chowtaih CHAKRAMANG Israeluüa kowh chimsaima mih Thurai pami chenchapuüa natuk bowt kown. 8Nami tara chetra ni dow nauang ting kown; nami dow nauang phaw ngengche kown. Ang CHAKRAMANG Thurai tek khowk, nami ni dow ang tekta iawng uang phaw kown.

9“‘Nakhowk khe dow Israel pren kowi kowh uowi miuüa mih nachangla sawp kownkow tasen müa rutchün khawkleng nakrawi kuah kown. Amatni dow aiukma mih hai asowmchow mih kawngma, leba hai leba sek, kawtda hai reh mih ranit ning mowr sawp takcha kowi natik büah kown. 10Dowm hownia hai kaurawng hownia amatni mih sawp pawk natakla kown nadowi bowt. Tawngplawng kowchow panow sawp takcha kowi tasen müa rutchün khawkleng natik büah kown chekhai. Amatni dow uang rup uanh miuüa kowi napawta pe uanh lai kown. Ang CHAKRAMANG mami laiklow ang tek khowk.

Gawg kowi dupah mih

11“‘Nami ni khe dow Gawg kowi mih Israel pren kowi ang napeah tadupra kown. Nami tadupra dow Sata Kowng satlawt pra kowh Khari Kowi Miuüa Lawngrawi kowi naown kown. Nakowi dow uak hu lai rakowi cham mang cham kat miuüa kowh tiama natapit kown. Naiawng rakowi nami lawngrawi kowi mih Gawg Kowh Thumchak Lawngrawi pahai maru natek pe bowt kown. 12Israeluüa mih ranit la mowr amatni kowh uak nakrawi dup hanow nachimsai pren kown. 13Amatni kowi nakrawi dup kown mih dow Israel pren kowi kowh maru maten chekhai. Naiawng hown ang kowh kraingra ang tüng mih ni khe amatni kowh ming iung nang iung dow nakrawi tauet kown. 14Nami ranit la chur khe dow nachimsaita pren kownkow napaw pe maru kown. Amatni dow paprenma kowi nakrawi len hanow krawng kowi takuak hüah mih hut maten nakrawi cham kown, now naiawngün hut maten nadupah büah kown. 15Pren lak kowi cham krawi len büah mih khin khe amatni che khi maru hut lowk hanow Gawg Kowh Thumchak Lawngrawi kowi kuam thai miuüa dupta dowi mowr maru nakhila kownkow natow pe amat müa lowk kown. 16Nami lawngrawi kowi kowh marow lowk mih ming dow Hamona (Thumchak) pahai nachap pe kown. Naiawng hown amatni mih pren dow nachimsaiah kown,’ pape diah.

17“Aw maru chapa, ang CHAKRAMANG Thurai tek khowk, uakling uaber chap maten hai kaurawng uaramchak chap maten kowi hawah now en natek pe kown mih, ‘Uang takua talawm büa diah. Israel kowi kowh hungma mawngma luk kowi phuchua pawi kri kraingma ang kamrütta enni mih kowi pren tali nui hownia uang takua büa diah. Nakowi mih vi hai nga enni nacha kown. 18Akürma mih maru-uüa kowh nga enni naka cha kown, now lusa kowi kowh kruitown miuüa kowh vi enni naka kham kown. Naiawngün maru-uüa dow Basan pren kowi kowh aiuk akauma mih ruapurla, ruapur chah, ruala hai chiala iawng kangowh chekhai. 19Ang nakamrüt enni kown mih phuchua pawi kowi dow duh dowi mowr enni naka cha sau kown, now pua dowi mowr enni naka kham vi kown. 20Ang kowh pawitang kowi mih du pat kawrnga nga, kawrnga kari te mih nga, akürma mih maru nga hai siphaiuüa nga enni naka cha kown,’ pape diah.

21“Chenchapuüa pungmadawng kowi ang kowh kraingra mih ang natüngah kown, now ang kowh akürma mih bawng hown Gawg kowh siphaiuüa kowi ang naripah kown mih chenchapuüa maten nakhi kown. 22Nami ni hownia dow Israeluüa mih ang chowtaih amatni kowh CHAKRAMANG Thurai pami natuk bowt kown. 23Now chenchapuüa dow amatni kowh angak rakowi chowtaih Israeluüa cham takhang mih pami natuk bowt kown. Tawngplawng kowchow panow amatni dow ang kaah sakowm dowi iawng uowi khai. Naiawng rakowi amatni kowi dow ang cham dangta pe khai, now amatni kowi mih ransu-uüa rut kowi ang ap-ah khai. Nahanow amatni dow tasenra kowi cham kowng bowk khai. 24Amatni kowh asür alawi hai angak uowi iawng amatni kowi ang changah khai, now amatni kowi mih ang cham dangta pe khai,” pakhai.

Israeluüa kowi Thurai krawi kuaah kown mih

25CHAKRAMANG Thurai plan tek mih, “Kawmat dow cham takhangra hownia Jakawb kowi ang nauang plan pawla bowt kown, now Israel kowi kowh maru-uüa maten luk kowi ang nasaksing sanaah bowt kown. Tawngplawng kowchow panow ang kowh ming chimsaima mih dow khowrbown dawma hown ang towkala mih chekhai. 26Amatni dow pren kowi thaulangma nauowi büah kown, now miapaw natüng pe kramra kown nadowi bowt. Nakhowk khe dow alai kowh ang luk kowi kaah sakowm dowi iawng uowi büah mih hai rukraira uowima mih lup changta büah mih nataphuang büah bowt kown. 27Chenchapuüa pungmadawng hownia amatni kowi ang uang plan pawla khe hai ransu-uüa pren hownia amatni kowi ang uang kuala khe dow chenchap akawmma pur kowi amatni hownia ang kowh chimsaira ang natüngah kown. 28Nakhowk khe dow amatni mih ang chowtaih amatni kowh CHAKRAMANG Thurai pami natuk büah bowt kown. Tawngplawng kowchow panow chenchap alang alangma miuüa tut-e ang amatni kowi ang cham pe takhangah chepaw amatni kowi dow amatni pren kowi ang nauang plan pawla iawk kown. Amatni kowi dow mia kowi paw ang nakuakta hüah kown nadowi. 29Amatni kowi mih ang nacham dangta kown nadowi bowt. Tawngplawng kowchow panow Israeluüa luk kowi mih ang kowh lümla ang nahüng pe kown chekhai. Ang CHAKRAMANG Thurai mami laiklow ang tek khowk,” pakhai.