Ezekiel 34

Israeluüa kowh thing miuüa

1Nami kung kowi CHAKRAMANG laiklow dow ang tut-e uang ting khai. Aia tek ang mih, 2“Aw maru chapa, Israeluüa kowh kruitown miuüa kowi risi iawng hai mami laiklow kowtek pe diah. CHAKRAMANG Thurai tek mih, ‘Enni Israel kruitown miuüa — Israel kowh ruapur thing miuüa — dow enni matia mu chowtaih enni tathum. Ruapur iawng mih Israeluüa kowi enni peah chakkham dowi chekhai. Naiawng rakowi enni dow lainowmma nanga kown. 3Enni dow ruapur iawn tui enni kham khai, apawi dow enni thawpla tawnguat hanow enni khupah khai, now lang iung mih ruapur kowi dow enni ngenah hanow enni chaah khai. Tawkche ruapur hawmh kowi dow enni khetah kaneu dowi chekhai. 4Kür uowi dowi mih ruapur kowi dow enni peah kür dowi, arau uowi mih ruapur kowi dow enni iungah dowi, now kakma mih ruapur kowi dow enni bawm pe ma dowi chekhai. Nami klen kowi cham kla phih mih ruapur kowi dow enni krawi klanah dowi, now tama mih ruapur kowi paw enni krawi chamah dowi chekhai. Naiawng enni krawi chang lak dow angak hown amatni kowi enni kruitownah khai. 5Ruapur hawmh iawng mih Israeluüa dow ruapur thing mih uowi dowi rakowi cham taset plawt khai, now amatni dow kaurawng uaramchak hawmh kowh chakkham cham chowng khai bowt. 6Ang kowh ruapur hawmh dow hungma mawngma süng kowi cham mangla pang khai. Amatni dow palusama kowi cham krawi tauet khai. Amatni kowi dow amiapaw krawi chamah dowi chekhai.

7“‘Naiawng rakowi ruapur thing miuüa low, ang laiklow sünta büa diah. 8Ang CHAKRAMANG Thurai ang ming lüklau se ang tek khowk, ruapur thing miuüa dow ang kowh ruapur hawmh kowi nuata hüah khai. Naiawng rakowi ang kowh ruapur hawmh kowi kaurawng uaramchak hawmh uang makah khai. Ang kowh ruapur thing miuüa dow ruapur hawmh iawng mih ang kowh maru-uüa kowi krawi cham dowi chekhai. Amatni dow amatni matia vüi chowtaih tatuak khai. 9Naiawng rakowi ruapur thing miuüa low, ang laiklow sünta büa diah. 10Ang CHAKRAMANG Thurai tek khowk, ruapur thing miuüa kowi ang nakingküaah kown, now ang kowh ruapur hawmh angakma uowi mih rakowi amatni kowi ang natang pe aprek kown. Amatni rut hownia ang kowh ruapur hawmh kowi ang nauang pawla kown. Ruapur thing miuüa hownia amatni kowi dow ang nalawngah kown. Nahanow ruapur thing miuüa dow amatni kowi naka chaah kown nadowi bowt, now amatni kowi dow ang nape chowngah ruapur thing mih kown nadowi bowt. Amatni kowh athing miuüa hownia amatni kowi dow ang natakhula kown; amatni kowi dow amatni kowh athing miuüa kowh chakkham ang nachangah kown nadowi bowt.

Aiungma mih ruapur thing mih

11“‘Ang CHAKRAMANG Thurai tek khowk, ang kowh ruapur hawmh kowi dow ang nakrawi cham kown, now amatni kowi dow ang nakruitownah kown. 12Ruapur thing miuüa dow cham krawi taset plawt mih ruapur hawmh kowi krawi chamah reng chekhai. Nami iawng ang paw ang kowh ruapur hawmh kowi ang nakrawi chamah kown. Aiiu iawng mih ngarera dawng kowi amatni cham uowi rah hownia amatni kowi ang nauang lawngla kown. 13Amatni kowi dow akeng chenchap hai akeng pren hownia ang nauang pawla hanow amatni matia pren kowi ang nakua nalawmah kown. Now amatni kowi dow hungma mawngma kangowh mih süng luk kowi, tui uowi mih aw pang kowi hai paprenma kowi ang nathingah kown. 14Amatni kowi dow thing rah iung mih kowi ang nathingah kown, now amatni kowh tawkra dow Israeluüa kowh alowngma mih hungh kowi naown kown. Aiungma mih thing rah kowi amatni dow nauowi kown, now amatni dow Israeluüa hungh luk kowi kowh tawkra iungma mih süng kowi nataw büa kown. 15Ang kowh ruapur hawmh kowi dow ang matia nathingah kown, now tanaira kowi ang nauang pawla kown. 16Tama miuüa kowi dow ang nakrawi chamah kown, now kla phih miuüa kowi paw ang nauang plan pawla iawk kown. Kakma miuüa kowi dow ang nabawm pe ma kown, now kür uowi dowi miuüa kowi paw ang napeah kür kown. Tawkche kow iungma hai akürma miuüa kowi dow ang napiakah kown. Tawngplawng kowchow panow ang dow anowmma mih tara hown ang kowh ruapur hawmh kowi ang naming nakhetah kown.

17“‘Aw ang kowh ruapur hawmh, sünta büa diah. Aiungma mih hai angakma mih ruapur hawmh kowi ang nachet pe tara kown, now ruapur hawmh kowi dow rua hawmh hownia ang nalang kraah kown. 18Aiungma mih thing rah kowi enni ka cha pram mih enni sak-ih dowi tak bow? Tawngplawng kowchow enni chala dowi mih pram ün khawk hown enni plan thuala khai? Achimma mih tui enni kham mih enni sak-ih dowi tak bow? Tawngplawng kowchow khawk hown enni thuaah now enni krawi puala tui nak khai? 19Tawngplawng kowchow khawk hown enni thuaah mih pram hai tui ang kowh ruapur hawmh nacha nakham kown?

20“‘Naiawng rakowi ang CHAKRAMANG Thurai mih akauma hai arawngchow mih ruapur pungmadawng kowi ang nachet tara kown. 21Arawngchow mih ruapur hawmh kowi dow powt dowi mowr buk hai pangkawt hown enni akauma mih ruapur hawmh nawtah chowtlowt khai, now nang hown enni krawi tingah khai. 22Naiawng rakowi ang kowh ruapur hawmh kowi dow ang nalawngah kown, now amatni dow nowng changra kowi nauowi kown nadowi bowt. Aiungma mih hai angakma mih ruapur pungmadawng kowi dow ang nachet tara kown. 23Amatni luk kowi dow ang kowh nar David kowi athing mih ang natowah lowk ia kown. Aia dow amatni kowh athing mih nachowng kown, now aia dow amatni kowi nakruitownah kown. 24Ang dow CHAKRAMANG amatni kowh Thurai nachowng kown, now ang kowh nar David dow amatni kowh aluchow nachowng kown. Ang CHAKRAMANG mami laiklow ang tek khowk.

CHAKRAMANG kowh taking tasangra sangbowk laitawm

25“‘Amatni hown dow ang natow taking tasangra sangbowk laitawm lowk kown. Pren hownia dow rang pranma mih tawncher iawng mih maru ngakuüa kowi ang naprütta pe kown. Nahanow amatni dow süngrüp süngkangma kowi thaulangma naia uowi büah kown, now kram dowi kowi kaurawng kowi naia müi büah kown. 26Amatni kowi dow ang napeah prasi kown, now ang kowh hungh Jerusalem riaret kowi kowh amatni kowh kim ün kowi ang napeah prasi kown. Akhin khe ang nauang peah uang kown. Nami uang dow amatni luk kowi kowh ang kowh prasira naown kown. 27Dowm kowi kowh sing dow nauih kown, now krawng paw nape luprak kown. Amatni dow amatni chowlowkkow krawng bawn kowi thaulangma nauowi kown. Amatni tut-e kowh laithawn tim iawng mih kratra dow ang napiakta pe kown, now amatni kowi kowh towah nar miuüa hownia dow amatni kowi ang nauang klanla kown. Naiawng amatni kowi ang changah mih khin khe amatni dow ang chowtaih CHAKRAMANG pami natuk büah kown. 28Amatni kowi dow akeng chenchapuüa nanowngah kown nadowi bowt, now kaurawng uaramchak hawmh paw amatni kowi nachaah kown nadowi bowt. Amatni dow thaulangma nauowi bowt kown, now amatni kowi dow amiapaw nakrawkah kown nadowi bowt. 29Amatni kowi dow asi uowima mih krawng ang napeah kown. Nahanow pren kowi dow amatni mih akhawr hown nakawm kown nadowi bowt, now akeng chenchapuüa tut-e rukrai paw naka kown nadowi bowt. 30Amatni dow ang CHAKRAMANG amatni kowh Thurai amatni hown tawi uowi reng mih natuk kown, now amatni mih ang kowh maru pami natuk büah kown. 31Aw ang kowh ruapur hawmh, enni dow ang thingah mih ruapur hawmh chekhai. Enni dow ang kowh maru chekhai, now ang dow enni kowh Thurai chekhai. Ang CHAKRAMANG mami laiklow ang tek khowk,’ pape diah,” pakhai.