Ezekiel 15

Jerusalem maru-uüa dow asun uang dowi mih grep ruih iawng

1Nami kung kowi CHAKRAMANG laiklow dow ang tut-e uang ting khai. Aia tek ang mih, 2“Aw maru chapa, kaurawng kowi kowh akeng mih singh lak-e grep ruih lang iung khai bow? 3Lakkeah mih sia nathawpla kownkow grep ruih kowi maru tawngah kengah kakat tak bow? Nachangla uanh bat müa kownkow grep ruih kowi maru tawngah kengah kakat tak bow? 4Grep ruih dow sawp iawng maih kowi suaah now tui mowr taih nauowi kown. Tawkche kam kung kowi dow maivia mih nakaah tawngkeng kown nadowi bowt. 5Grep ruih dow maih kowi tikah dowi rawn khowm padow kaah atawng akeng dowi chekhai, now maih kamah kung kowi ngam padow asung lang e ngamlam chekhai.

6“CHAKRAMANG Thurai tek mih maiawng: Kaurawng kowi kowh singh pungmadawng kowi grep ruih dow sawp iawng maih kowi ang tikah khai. Nami iawng dow Jerusalem kowi kowh uowi miuüa kowi paw maih kowi ang nanawmah kown. 7Amatni kowi dow ang naripah kown. Amatni dow maih hownia uang nowng lawt khai chepaw maih kowi naplan kam iawk kown. Amatni kowi ang kingküaah mih khin khe dow ang chowtaih CHAKRAMANG pami enni natuk bowt kown. 8Amatni dow ang kaah sakowm iawng uowi büah dowi chekhai. Naiawng rakowi pren mih dow akhaw aklaima ang nachangah kown. Ang CHAKRAMANG Thurai, mami laiklow ang tek khowk,” pakhai.