Ezekiel 13

Risi iuauüa vüi CHAKRAMANG ripra

1Nami kung kowi CHAKRAMANG laiklow dow ang tut-e uang ting khai. Aia tek ang mih, 2“Aw maru chapa, Israel pren kowi kawmat kowh krawi tek lai mih risi iuauüa kowi kingküa se en mih kowtek lai diah. Amatni sak kowi uowi iawng krawi tek lai mih risi iuauüa kowi maiawng kowtek pe dit, ‘CHAKRAMANG laiklow sünta büa diah. 3CHAKRAMANG Thurai tek mih maiawng: Risi bualauüa kowh piakra nauang ting kown mih dow kramra uowi lai kowbow! Amatni dow khi mukmang dowi chepaw amatni sak kowi uowi iawng krawi tek lai büah khai,’ pape diah.

4“Aw Israeluüa, enni kowh risiuüa dow marow tapiak khowk mih kowi kowh krawi kram chak mih brenkhui iawng chekhai. 5Enni kowh risiuüa dow Israel chenchapuüa kowh tap takhue khowk mih kowi tow pe kangchawng mih dowi chekhai, now raw paw rawah büah dowi chekhai. Naiawng rakowi CHAKRAMANG kowh ni kowi tasen khin khe Israeluüa dow nanowng talawng kown nadowi. 6Amatni dow mukmang lawnguan kowi küa dai khai, now mü hawra hanow küa dai khai. Amatni kowi ang tek pe dowi chepaw, ‘CHAKRAMANG tek,’ padow cham krawi tek büah khai. Nami kung kowi paw amatni dow amatni kowh lai nauang tachi kown mih sakowm büah khai. 7Amatni kowh mukmang hai lai phuang dow daila chowtaih. Tawngplawng kowchow panow amatni kowh laiklow kowi ang laiklow pahai cham krawi tek büah khai. Tawkche amatni kowi ang tek pe dowi chekhai.

8“Naiawng rakowi ang CHAKRAMANG Thurai tek mih, ‘Enni tek dai lai hai khi mukmang dai rakowi ang nakingküa enni kown. 9Mukmang dai khi miuüa hai tek dai lai miuüa kowi dow ang napeah ripra kown. Amatni dow ang maru-uüa uowi rah kowi natawi uowi kown nadowi bowt; amatni kowh ming dow Israel chenchapuüa ming tang bowih kowi natawi uowi kown nadowi bowt, now Israel pren kowi paw nauang tawi ia plan kown nadowi bowt. Nami khin khe dow ang chowtaih CHAKRAMANG Thurai pami enni natuk bowt kown. 10Risi iuauüa dow ang maru-uüa kowi tiama tawi pra pawla khai, thaulangra uowi dowi chepaw, “Thaulangra uowi,” padow ang maru-uüa kowi daiah khai. Amatni dow khawt dowi mih tap kowi krawi plik thundi hanow akhawtma nowng chang pahai ka tuak khai. 11Naiawng rakowi risi iuauüa kowi kowtek pe dit, amatni kowh tap dow natakhue kown taih. Uangchak kri ang nape uangah kown, ria mang ang nauang pe klaah kown, now ang nauang chin pe liku hanow nami tap dow natapiak kown. 12Nami tap takhue mih khin khe dow, “Enni plik pe thundi mih tap tawng chow mrawkra uowi?” padow nami risi iuauüa kowi maru nalüntaah kown.

13“‘Naiawng rakowi ang CHAKRAMANG Thurai, ang tek khowk. Ang kunmaraura dow liku iawng ang nauang chin pe kown, mapaw ang sak-ih dowi mih dow ria mang iawng ang nauang pe klaah kown, now ang kunmarau hown uangchak kri iawng nami tap ang nakhueta pe kown. 14Risi iuauüa plik pe thundi mih tap dow ang nakhueta pe hanow achüng khowm khi dowi pat krawng hown aprem sang ang natow pe kown. Nami tap takhue mih khin khe dow amatni paw natawi tanüm hanow nakowng büah kown. Nami khin khe dow ang chowtaih CHAKRAMANG pami enni natuk bowt kown. 15Nami tap hai nami tap kowi kowh plik thundi miuüa luk kowi ang kunmaraura maten dow ang nauang klai pe kown. Nami khin khe dow maiawng ang natek enni kown, “Nami tap dow uowi dowi bowt, now nami tap kowi kowh plik thundi miuüa paw uowi dowi bowt. 16Israel pren kowi kowh Jerusalem maru-uüa tut-e tek lai reng mih risi iuauüa uowi dowi bowt, thaulangra uowi dowi chepaw thaulangra mukmang khi miuüa uowi dowi bowt,” padow ang natek enni kown. Ang CHAKRAMANG Thurai, mami laiklow ang tek khowk,’ pakhai,” pape khai.

Masiuüa risi iua

17Nami kung kowi CHAKRAMANG plan tek ang mih, “Aw maru chapa, kawmat dow en chenchap masiuüa hawmh amatni sak kowi uowi iawng krawi tek lai miuüa kowi kingküa hown en mih kowtek lai diah. Amatni dow risi nadowi chepaw risi iawng krawi tek lai büah khai. Naiawng rakowi maiawng kowtek pe diah. 18CHAKRAMANG Thurai tek mih, ‘Maiawngün masiuüa hawmh kowh piakra nauang ting kown mih dow kramra uowi lai kowbow! Enni masiuüa hawmh dow lawngtang lah ngeuüa lah maru luk kowi nau iawng nowng changla alow kownkow rut kowi laphawi hai lu kowi lu mum müa enni thawp pe khai. Ang maru-uüa kowh asak dow enni saiah khai, now enni matia dow napiak dowi kown mih enni ka tuak bow? 19Püm pre sum rutphachow hai kawm pre sum pachow rakowi ang maru-uüa pur kowi enni nü ang klowk ang dowi; enni pe ang rukrai khai. Sünta dai lai kown nau mih ang maru-uüa tut-e enni küa pe dai hanow kowng tataing dowi mih kowi enni kowngta khai, now sing kown tataing dowi miuüa kowi dow enni pe singah khai.

20“‘Naiawng rakowi ang CHAKRAMANG Thurai tek khowk, uakling kowi kowh maru khümah iawng dow laphawi hown maru-uüa kowi enni krawi khümah khai. Nami laphawi dow lainowmma ang sui mih chekhai. Naiawng rakowi naiawngün laphawi dow enni rut hownia ang nathükta enni kown. Uakling kowi iawng enni khümah mih maru-uüa kowi ang nalawtta enni kown. 21Enni kowh lu mum müa uanchow ün ang nasekta enni hanow enni rut hownia ang maru-uüa kowi ang nalawngah kown. Amatni dow enni rut kowi enni low iawng nauowi kown nadowi bowt. Nami khin khe dow ang chowtaih CHAKRAMANG pami enni natuk bowt kown. 22Ang peah arau kown ang nau dowi miuüa kowi enni küa pe dai hanow enni piak pe sak khai, now maru ngakuüa kowi dow naplaila dowi kownkow enni tawi tangila hanow nachang lup ngak ngamlam kown mih enni peah kür khai. 23Naiawng rakowi mukmang dai enni khi mih hai dai lai tek dow ang nachurta enni bowt kown. Enni rut hownia ang maru-uüa kowi dow ang nalawngah bowt kown. Nami khin khe dow ang chowtaih CHAKRAMANG pami enni natuk bowt kown,’” pakhai.