Uown Lawt 8

2. Purh hown Thurai towkah ngare mih

1Nami kung kowi CHAKRAMANG tek pe Mosi mih, “Faraw tut-e kowkowiah now kowtek pe diah, ‘CHAKRAMANG tek mih maiawng: Nauang chupiia ang kownkow ang maru Israeluüa kowi pe kowiah diah. 2Israeluüa kowi che en pe kowiah dowi now Aigupta pren paprenma kowi purh hown ang towk enni ngare kown. 3Nail aw kowi mih purh natek mup kown. Now aw hownia purh nauang lawt hanow en kim kowi nauang uowi kown. Naiawngün purh dow en kowh towklak kowi hai en kowh phangbek kowi ün nakrawi uowi kown. En kowh maru iukuüa hai en kowh maru-uüa kim kowi paw nauang krawi uowi kown. Nami klen kowi en kowh taping hai en kowh kawmdi lawk müa biatum kowi ün nakrawi uowi kown. 4Naiawngün purh dow en hai en kowh maru iukuüa hai en kowh maru-uüa luk kowi nakrawi chetla prung kown,’ pape diah,” pakhai.

5Nami kung kowi CHAKRAMANG tek pe Mosi mih, “Arawn kowi kowtek pe diah. Aigupta pren kowi kowh aw hai awchawng uowi mih maten hown kanh uowi mih maten prakowi aia kowh raitua hailawm rut mih pakrawi rawk lah; nahanow purh nakrawi uowi kown towbowt,” pape khai.

6Now Arawn dow Aigupta pren kowi kowh tui uowi mih maten prakowi aia kowh rut krawi rawkah khai. Now purh uang lawt hanow Aigupta pren paprenma kowi atekma uang uowi khai bowt. 7Now maiaklese sarauüa paw amatni kowh maiaklese kür hown naiawng mih lup tawi nowng chang khai. Amatni paw Aigupta pren kowi purh ahuma uang tawi ia pawla khai.

8Nami khin khe Mosi hai Arawn iüah kowi Faraw hawah now tek pe mih, “CHAKRAMANG tut-e kowkowi iüa diah, now ang hai ang maru-uüa hownia maiawngün purh namata kownkow kowchup anging Thurai iüa diah. Nahanow CHAKRAMANG vüi tawncher hown nachang phuchua kownkow Israeluüa kowi ang pe kowiah sow,” pape khai.

9Mosi tek pe Faraw mih, “Naiawngün purh dow en kim hownia, en kowh maru iukuüa kim hownia hai en kowh maru-uüa hownia napowt hanow aw kowi krowngchow nakowuowi kownkow CHAKRAMANG tut-e ang kowtek kown taih. CHAKRAMANG tut-e nakowtek kownkow tawng khe chow en nau mih en phai tek ang akhin diah,” pape khai.

10Faraw tek pe mih, “Tharau khe kowtek diah,” pape khai.

Mosi tek pe mih, “En tek iawng naphaw kown taih. Now anging kowh CHAKRAMANG Thurai iawng miapaw uowi dowi chekhai pami nami hownia en natuk bowt kown. 11Naiawngün purh dow en hownia hai en kim hownia, now en kowh maru iukuüa hownia hai en kowh maru-uüa hownia napowt kown taih. Naiawngün purh dow Nail aw kowi krowngchow towbowt nauowi kown,” pape khai.

12Naiawng tekla pe now Mosi hai Arawn iüah dow Faraw pur hownia powt khai. Now Faraw luk kowi kowh CHAKRAMANG uang pe tingah mih purh naprütta pe kownkow Mosi mih CHAKRAMANG tut-e kowkar khai bowt. 13Now CHAKRAMANG dow Mosi tek iawng chang pe khai. Kim kowi kowh hown viadawng kowi kowh uowi mih ün, now üa hai laih kowi kowh uowi mih ün, purh uowi mih maten dow kowng bowk khai. 14Naiawngün purh uak dow maru kawmuüa krawi kuaah hanow achun achunma cham towah khai. Naiawngün purh su nam dow Aigupta pren paprenma kowi krawi tauet khai. 15Nachenganchepaw naiawngün purh kowng bowk mih tuk hanow Faraw dow aia kowh saktuak akhawtma changah khai iawk. Aia dow Mosi hai Arawn iüah kowh laiklow kowi pe ching dowi iawk chekhai. CHAKRAMANG rik tekta khowk iawng dow uang phaw khai.

3. Changitchow hown Thurai towkah ngare mih

16Nami khin khe CHAKRAMANG tek pe Mosi mih, “Arawn kowi kowtek pe diah. Aia kowh raitua parah now krawng kowi kowh dinchow kowi pacham hup lah. Now naiawngün dinchow dow nachowng changitchow hanow Aigupta pren paprenma kowi natek mup kown towbowt,” pakhai.

17Now Mosi hai Arawn iüah dow naiawng kowchang khai bowt. Arawn mih aia kowh raitua parah now krawng kowi kowh dinchow kowi iu hup khai. Nahanow Aigupta pren kowi kowh dinchow maten dow chowng changitchow khai bowt. Now naiawngün changitchow dow maru hai tawncher hawmh luk kowi krawi chawp khai bowt. 18Maiaklese sarauüa dow amatni kowh maiaklese kür hown natawi lawt changitchow kownkow tawi chang büa chowdiah. Nachenganchepaw amatni dow tawi ia chang dowi chekhai. CHAKRAMANG hownia kowh changitchow kawm dow maru-uüa hai tawncher hawmh luk kowi krawi chawp prungrung khai. 19Naiawng rakowi maiaklese sarauüa tek pe Faraw mih, “Naiawngün lup kowi dow Thurai kowh rut tawi uowi chekhai,” pakhai. Nachenganchepaw Faraw kowh saktuak dow akhawtma hing uowi hüah khai. Aia dow Mosi hai Arawn iüah kowh lai sünta pe dowi chekhai. CHAKRAMANG rik tekta khowk iawng dow uang phaw khai.

4. Ving hown Thurai towkah ngare mih

20Akung kowi Thurai tek pe Mosi mih, “Rau murpa en narü hanow aw pang kowi Faraw kowkowi mih khin khe Faraw pur kowi en nakowiowng kown. Now Faraw kowi en natek pe kown mih, ‘CHAKRAMANG tek mih maiawng: Nakowchup ang kownkow ang maru-uüa kowi pe kowiah diah. 21En che pe kowiah dowi kowh chalow now en hai en kowh maru iukuüa hown en kowh maru-uüa luk kowi ang nauang chin enni ving kawm kown. Aigupta maru-uüa uowi rah maten kowi dow kim lak kowi hai prang kowi ving kangowh natek mup kown. 22Nachenganchepaw ang maru-uüa uowi rah Gawsen süng kowi dow ving ang nape uowiah kown nadowi. Nami hownia dow ang CHAKRAMANG mami pren kowi uowi chekhai pami enni natuk kown. 23Ang kowh maru-uüa hai en kowh maru-uüa kowi dow alangma ang namüah kown; ang kowh maru-uüa kowi dow ang nalawngah kown. Nachenganchepaw en kowh maru-uüa kowi dow ang lawngah dowi tham. Mami awdara lup dow tharau khe en nakhi kown,’ pape diah,” pakhai.

24Now CHAKRAMANG dow naiawng chang khai bowt. Ving kawm dow ahuma Faraw kim kowi hai aia kowh maru iukuüa kim kowi kowkup khai bowt. Naiawngün ving kawm rakowi Aigupta pren paprenma kowi dow piakra uang ting khai.

25Nami khin khe Mosi hai Arawn iüah kowi hawah now Faraw tek pe mih, “Mami Aigupta pren kowi tawng re-e chünchü cham kowiah büah hanow enni kowh Thurai vüi tawncher hown cham chang phuchua büah towbowt,” pape khai.

26Now Mosi tek pe mih, “Naiawng nachang kown mih taka dowi tham. Tawncher hown phuchua CHAKRAMANG Thurai mih maru-uüa kowi dow Aigupta maru-uüa naukhi dowi chekhai. Aigupta maru-uüa naukhi dowi mih lup amatni pur kowi anging chang hanow hua hown nakuak anging büah kown chekhai. 27CHAKRAMANG Thurai ana pek iawng süngrüp süngkangma kowi sum ni mang rawng mangah hanow aia vüi kowi anging kowchang phuchua kown takla,” pape khai.

28Now Faraw tek pe mih, “Enni kowh CHAKRAMANG Thurai vüi tawncher hown nachang phuchua kownkow süngrüp süngkangma kowi ang nape kowi enni kown taih. Tawkchedow alakma kowi enni cham nowng kowi kown nadowi. Khaleng dow CHAKRAMANG tut-e ang vüi kowlü iawk diah,” pape khai.

29Now Mosi tek pe mih, “En hai en kowh maru iukuüa hai en kowh maru-uüa hownia naiawngün ving kawm tharau khe napowt kownkow en hownia powt hown akrowksang CHAKRAMANG tut-e ang nakowlü kown. Tawkchedow hauang kuan anging tham bowt; anging kowh CHAKRAMANG vüi tawncher hown nachang phuchua kownkow en pe kowi anging ngengche kown takla,” pape khai.

30Akung kowi Faraw pur hownia Mosi powt hanow CHAKRAMANG tut-e kowlü khai bowt. 31Now CHAKRAMANG paw Mosi tek iawng chang pe khai. Aia dow Faraw hai aia kowh maru iukuüa hai aia kowh maru-uüa hownia ving kawm maten henta pe khai; lowkchow khowm ta lat dowi chekhai. 32Nachenganchepaw nami leng paw Faraw dow aia kowh saktuak akhawtma changah khai iawk, now maru-uüa kowi pe kowiah dowi iawk chekhai.