Uown Lawt 31

Bezalel hai Oholiab

1Nami kung kowi CHAKRAMANG tek pe Mosi mih, 2“Sünta, Juda krungchak kowi kowh Uri chapa Bezalel kowi ang lang klota hüah khowk. Uri dow Hur kowh chapa chekhai. 3Bezalel kowi mih ang kowh lümla ang peah khowk. Aia kowi dow ang lümla hown prengia, tukra, chanlaira hai achap kawm nowng changla mih kür ang peta khowk. 4-5Naiawng rakowi aia dow kuh, tai, kri, asung khakma mih hua hai singh hown klangiung klangiungma mih uanh natuk thawp kown. 6Now aia kowi nakhowngah kownkow Oholiab kowi paw ang lang klota khowk chekhai. Oholiab dow Dan krungchak kowi kowh Ahisamak chapa chekhai. Now uanh thawp sarauüa maten kowi paw ang peta tukra khowk. Naiawng rakowi ang pe en mih ana iawng amatni mih natuk chang lup kown. Ang pe en ana iawng amatni nathawp kown mih dow: 7Taklowp taklangra te, sangbowk laitawm tawkpla hai nami luk kowi kowh angak khu müa sangbowk laitawm tawkpla küm, taklowp taklangra te lak kowi kowh uanh, 8pawitang hai nakowi kowh tawngkengah kown mih uanh ün, achangma mih kuh hown kowh maibu towngh hai maibu kowi kowh bawthi kep müa kaingkep, maidim towk rah lawngpan, maikhük towk müa phuchuara, 9tikah mih uanap chang müa phuchuara hai nami kowi kowh tawngah mih puh bia aikam, biatum hai biatum chowm müa, 10Arawn nachangla uamow lup kown mih vüi chimsaima mih tawnguat hai achapauüa vüi tawnguat, 11nümnap müa sau hai anam iungma mih maikhük towk müa than ün chekhai. Naiawngün dow ang pe en ana mih rowprowp nathawpah büah kown takla,” pakhai.

Tanai ni

12-13Nami kung kowi dow Israeluüa vüi Mosi kowi CHAKRAMANG tek pe mih, “Ang dow CHAKRAMANG, ang matia vüi kowi chimsai enni mih dow ang chekhai. Ang chimsai enni mih natukla reng kownkow ang kowh tanai ni mih enni nasunah reng kown. Nami dow enni hown ang kowh chowngchowng saksakma mih amat müa chekhai.

14“Tanai Ni dow enni nasunah reng kown takla. Tawngplawng kowchow panow nami ni dow enni vüi chimsaima ang towah mih chekhai. Nami ni tawi sun dowi kowi chang lup mih maru kowi dow aia chenchap hownia nabatta kown, now aia kowi dow nakowngta ngengche kown takla. 15Pasapta kowi taruk ni mowr enni nachang lup kown. Tawkche ranit ni mih ni dow Tanai Ni naown kown. Nami Tanai Ni dow ang CHAKRAMANG vüi ang chimsaiah mih ni chekhai. Nami ni kowi chang lup mih che uowi khai hanow nami maru kowi dow nakowngta ngengche kown. 16Nami Tanai Ni dow sangbowk laitawm iawng hai chowngchowng saksakma Israeluüa nasunah reng kown takla. 17Nami dow Israeluüa hown ang kowh chowngchowng saksakma amat müa naown kown. Tawngplawng kowchow panow nami taruk ni mowr dow mukuang hai lusa ang thawpah khai. Ranit ni khe dow ang tanai khai; tawng lup paw ang chang dowi chekhai,” pakhai.

18Sinai hungh luk kowi naiawngün laiklow ki tek pe now sangbowk laitawm huapher mih Mosi kowi CHAKRAMANG peah pre buk khai. Nami huapher pre buk mih luk kowi kowh ana maten dow Thurai matia ngengche ruiah mih chekhai.