Uown Lawt 2

Mosi uang dia mih

1Nami khin khe Levi chenchap maru lowk ia dow amatni achen sang mih masiuüa kowi chawngah khai. 2Nami masiuüa dow uang kum nau hanow pen chapa lowk ia khai. Aia kowh chapa dow apawr klangiungma chekhai. Naiawng rakowi aia dow nami ngiachow kowi sum la mowr petah khai. 3Nachenganchepaw nami ngiachow kowi nowng pet dowi bowt mih khin khe dow uaklung kawng hown kowh kawngah mih kruk aia pawah lowk khai, now tui naia kupla dowi kownkow than hown miaah khai. Now nami ngiachow kowi dow nami kruk kowi iüaah khai. Now nami kruk mih Nail aw pang kowi tui dawng kowi kowh uaklung bia kowi kowtowah khai. 4Nami ngiachow tawng chow cham own mih nakrawi mü kownkow atuamow dow nami aw hownia alak sangrumchow re-e iowng khai.

5Now kra sangrum kung kowi dow mang chama mih Nail aw kowi uang lu tui khai bowt. Nakhowk khe aia kowh narmauüa dow aw pang kowi krawi len khai. Nami khin khe aia dow uaklung dawng kowi kruk tapowng powlow mih haikhi lowk khai. Now nami kruk nakowpaw kownkow aia mih kowchin narma lowk ia khai. 6Nami kruk dow aia hoah hanow ngiachow kowi aia khi khai. Nami ngiachow dow kar süklük chekhai. Naiawng rakowi nami ngiachow kowi mih lainowmma aia sanaah khai. Aia tek mih, “Mami dow Hebraiuüa kowh chah lowmow,” pakhai.

7Nakhowk khe nami ngiachow kowh tuamow mih Faraw kowh chama tut-e uangah now tek pe mih, “Nami ngiachow kowi nathum en kownkow ang uang hawla en Hebrai masiuüa lowk ia tak ü?” pakhai.

8Nakhowk khe Faraw kowh chama tek pe mih, “Ow, kowhaw ang madiah,” pakhai. Now nami ngiachow kowh tuamow dow a-u kowi uang hawla pe khai.

9Nami ngiachow u uang ting khe Faraw kowh chama tek pe mih, “Mami ngiachow kowi thum ang mawm ang diah. En thum ang mih sung ang pe en kown taih,” pakhai. Nami masiuüa dow ngiachow kowi pawla now thumah mawmah khai.

10Nami ngiachow awr iuk sangrum khe dow nami masiuüa mih Faraw kowh chama tut-e kowpawla pe khai. Now mang chama dow nami ngiachow kowi achapa iawng hai hawt pawah khai. Aia tek mih, “Mami kowi dow tui hownia kowh ang uang pawla mih chekhai,” pakhai. Naiawng rakowi nami ngiachow kowi dow Mosi pahai aia rük pe ming khai.

Midian pren kowi Mosi kowpowt mih

11Akung kowi Mosi awr iuk awr sown hanow aia chenchapuüa kowi kowmü kownkow kowkowi khai. Nami khin khe aia dow aia chenchapuüa akratma mih lup chang takla mih kowkhi khai. Now Hebrai maru lowk ia kowi Aigupta maru lowk ia bawpah mih paw aia kowkhi khai. 12Nakhowk khe aia dow mapra paipra krawi mü hanow aria aret kowi amia kowi paw khi dowi chekhai. Naiawng rakowi aia dow nami Aigupta maru kowi saita hanow se kowi phumah khai. 13Now auai ni paw aia mih prang kowi plan lawt khai iawk. Nami khin khe dow Hebrai maru pre ia hawt takhüm mih aia kowkhi khai. Now atawi uowi mih kowi aia tek pe mih, “Tawngplawng kowchow en tainau kowi en tuk bawp khai?” pakhai.

14Nami maru tek pe mih, “Angching luk kowi aluchow hai nachet tara kown mih alow amia chow pe en? Aigupta maru kowi mani kowh en saita iawng ang kowi paw en saita ang kown en nau mih bow?” pakhai. Mosi dow nami laiklow tata hanow kram khai bowt. Aia dow naiawngün lawnguan maru tukta bowk khowk padow ka tuak khai.

15Faraw mih naiawngün lawnguan tawi tuk hanow Mosi kowi nasaita kownkow kamrüt khai bowt. Nachenganchepaw Mosi dow Faraw hownia ku powt hanow Midian pren kowi kowtowm khai, now aia dow Midian pren kowi kowh tuikuam ria re-e kowchowm phülü khai. 16Nakowi kowh Midian chenchap uamow kowh dow chama uowi 7 ia chekhai. Nami uamow kowh chamauüa mih a-pa kowh tawncher hawmh kowi pe khamah tui kownkow nami tuikuam kowi uang towng tui büah khai. 17Nachenganchepaw akeng mih tawncher thing miuüa uangah now nami masiuüa hawmh kowi tuikuam hownia uang prütta khai. Nami khita hanow Mosi mih nami masiuüa hawmh kowi kowtawi khowngah khai, now amatni kowh tawncher hawmh kowi pe khamah tui khai. 18Nami masiuüa hawmh dow a-pa Reuel1 tut-e kowplan khai bowt. Nakhowk khe a-pa hawt lüntaah mih, “Tawngplawng kowchow ani dow enni uang lüa mang lai kowbow?” pakhai.

19Amatni tek pe mih, “Ani dow akeng mih tawncher thing miuüa rut hownia Aigupta maru lowk ia lawng anging khai. Nami klen kowi tawi towng anging tui hanow anging kowh tawncher hawmh kowi paw pe khamah tui khai,” pakhai.

20Achamauüa kowi a-pa lüntaah mih, “Aia dow tawng kowi chow? Tawngplawng kowchow aia kowi enni towla hüah? Aia kowi uang hawla now pe cha pe khamah diah snow,” pakhai.

21Akung kowi Mosi dow nami uamow kim kowi tawi uowi kown mih nauta khai. Nami uamow mih aia kowh chama Zipawr kowi Mosi hown pe tachawngah khai. 22Nami kung kowi Zipawr dow ka chapa lowk ia khai. Now achapa ming dow Gersawn pahai Mosi rük pe khai. Tawngplawng kowchow panow aia tek mih, “Ang dow akeng pren kowi kowh cham uowi mih chekhai,” pakhai.

Israeluüa prakowi Thurai plan pe ching mih

23Ning kawmma rawn khowk kung kowi Aigupta mang mih kowng khai bowt. Nachenganchepaw Israeluüa kowh nar lup chang dow uang lang krat ngamlam chekhai. Naiawng rakowi amatni dow kar büah sawmlawm khai. Nami kar klow dow Thurai tut-e kowtowm khai bowt. 24Thurai mih Israeluüa kowh kar klow ta hanow Abraham, Isak hai Jakawb büah tut-e kowh aia towah mih sangbowk laitawm laiklow ka tuak khai. 25Aia dow Israeluüa prakowi iu mü khai bowt, now amatni prakowi pe ching khai bowt.