Uown Lawt 18

Mosi pu Jethraw kiow Thurai mih

1Israeluüa hai Mosi luk kowi kowh Thurai chang pe mih lawnguan srui dow Mosi pu Jethraw mih tawi ta bowk chekhai. Nami klen kowi Aigupta pren hownia Israeluüa kowi tawng iawng chow CHAKRAMANG uang lawtla mih paw Jethraw tawi ta khai. Jethraw dow Midian pren kowi kowh uamow chekhai. 2Israeluüa kowi nalawngah kownkow Midian pren hownia Aigupta pren prakowi kowplan mih khin khe Mosi mih amasi Zipawr hai achapa pre ia kowi a-pu Jethraw tut-e kowsata khai. Now Jethraw dow naiawngünuüa kowi aia tut-e towla khai. 3(Mosi kowh chapa ta ming dow Gersawn chekhai. Achapa ta uang dia khe Mosi tek mih, “Akeng pren kowi ang cham uowi mih chekhai,” pakhai. Naiawng rakowi achapa ming dow Gersawn pahai aia rük pe mih chekhai. 4Now achapa sawi mih uang dia khe Mosi plan tek iawk mih, “Khowng ang mih dow apa kowh Thurai chekhai. Faraw rut hownia kowh lawng ang mih dow aia chowtaih,” pakhai. Naiawng rakowi achapa sawi ming dow Eliezer pahai aia rük pe mih chekhai. Eliezer pami auan dow “Thurai tawi khowng ang reng” pami chekhai).

5Mosi dow Thurai hungh ria kowi kowh süngrüp süngkangma kowi khup tangbung khai. Nakhowk khe a-pu Jethraw mih Mosi kowh masi chauüa kowi pawla now nakowi kowkrawi kowi khai. 6Nakowi uang towm dowi rawn khe Jethraw mih amawkchow Mosi kowi kowrik phowng pe satang khai. Jethraw tek pe mih, “Ang dow en pu Jethraw chekhai. En kowh masi hai en kowh chapa pre ia kowi uang pawla now en tut-e ang uang tarü khowk,” pakhai. 7Now amasi hai achauüa hown a-pu uang ting mih khin khe Mosi mih tangbung lak hownia uang lawtah hanow tabawk krawm se a-pu kowi chupah khai, now nam pe awm khai. Amatchi dow lowkkowlowk tapaw satang palang se tangbung lak kowi kup iüah khai. 8Israeluüa prakowi tangila kowh Faraw hai Aigupta maru-uüa luk kowi CHAKRAMANG changah mih srui Mosi mih a-pu kowi lawp pe khai. Nami klen kowi tiama rawng kowi kowh amatni ngarela mih hai tawng iawng chow amatni kowi Thurai lawngah mih lawnguan paw aia dow a-pu kowi lawp pe khai.

9Now Aiguptauüa rut hownia Israeluüa kowi lawngah khe kowh Thurai chang mih srui ta hanow Jethraw dow lainowmma awmrawm khai. 10Naiawng rakowi Jethraw tek mih, “Faraw hai Aiguptauüa rut hownia lawng enni mih CHAKRAMANG dow akiow pauowi lah! 11Enni kowh CHAKRAMANG dow akeng mih thurai lak-e lang kri lang kraing pami kawmat ang tuk khowk. Tawngplawng kowchow panow abawrima mih Aigupta maru-uüa kowh ngare towkra hownia Israeluüa kowi aia dow uang lawngla khai,” pakhai.

12Nami kung kowi dow Jethraw mih Thurai vüi tikah mih uanap hai akeng mih uanap nachangla kownkow uang pawla tawncher khai. Now Arawn hai Israel lawngtang aluchowuüa maten dow Thurai pur kowi Mosi pu hown taiua cha taiua kham büah khai.

Mosi kowi a-pu Jethraw peah prengia mih

13Auai ni dow maru kawmuüa kowi nachet pe tara kownkow Mosi chowm khai. Rauchow hownia sat kup iüp mowr aia pur kowi maru kawmuüa mih iowngla rim khai. 14Maru kawmuüa hown naiawng Mosi chang mih khita now a-pu tek pe mih, “Naiawng khowt maru kawm dawng kowi tawngplawng kowchow en malowkchow en tuk chet pe tara khai? Tawngplawng kowchow rauchow hownia sat kowi iüp mowr en pur kowi maru kawmuüa iowngla rim khai?” pakhai.

15Now a-pu kowi Mosi tek pe mih, “Maru kawmuüa mih Thurai naukrang natukla kownkow ang tut-e uang mih chekhai. 16Amatni che takhowk taran ditchow now ang tut-e uang büah reng, now pre powchak kowi ang hawt chet pe tara reng. Amatni kowi mih Thurai rirow hai ana pek ang tüng ang sangah reng chekhai,” pakhai.

17Nakhowk khe Mosi kowi a-pu tek pe mih, “Naiawng en chang mih iung dowi. 18Naiawng en chang mih dow en hai en maru-uüa nabowm lai kown chekhai. Nami lup dow lainowmma krat chekhai. Naiawng rakowi nami lup dow en malowkchow en ia chang dowi tham. 19Kawmat dow ang kowh prengia lai sünta diah, now Thurai paw natawi uowila en kown taih. Thurai hown maru kawmuüa takra kowi kowh ria mang mih lup phai en chang diah: Maru kawmuüa kowh akrat pusa lawnguan Thurai kowi phowk pe diah, 20now Thurai rirow hai ana pek lawnguan dow amatni kowi en tüngsangah diah. Tawng iawng chow chowm uowi takla mih hai achang takla mih amatni kowi en tek pe diah.

21“Nami klen kowi maru kawmuüa pungmadawng kowi tating tataing mih maru maten kowi ruiah diah; Thurai kowi kram mih, tek lainowm mih hai bümsua kowi sui miuüa kowi ruiah diah. Now en ruiah miuüa kowi dow maru kawmuüa luk kowi aluchow en nathawpah kown. Tawngbak mih kowi dow 1,000 ia luk kowi kowh aluchow, tawngbak mih kowi dow 100 ia luk kowi kowh aluchow, tawngbak mih kowi dow 50 ia luk kowi kowh aluchow, now tawngbak mih kowi dow hamüt ia luk kowi kowh aluchow en nathawpah kown. 22Naiawngün aluchowuüa dow kawmat hownia maru kawmuüa kowi nachet pe tara bowt kown. Chili chalachow mih lawnguan dow naiawngünuüa nachet pe kown, now aiukma mih lawnguan dow en tut-e nauang pawla büah kown. Amatni paw tawi khowng kur en kurdik khai rakowi en kowh lup mih nalang howp kown. 23Thurai pe en ana mih iawng en che chang hanow naiawngün lup krat dow en naia kham kown taih, now maru kawmuüa paw thaulangma hown chowlowkkow kim kowi naia powt kown towbowt,” pape khai.

24Now Mosi dow a-pu kowh prengia pek chün khai; aia dow a-pu tek iawng chang khai bowt. 25Aia dow Israeluüa pungmadawng kowi kowh tating tataing miuüa kowi kloah now thawpah aluchow khai. Tawngbak mih kowi dow 1,000 ia luk kowi kowh aluchow, tawngbak mih kowi dow 100 ia luk kowi kowh aluchow, tawngbak mih kowi dow 50 ia luk kowi kowh aluchow, now tawngbak mih kowi dow hamüt ia luk kowi kowh aluchow aia thawpah khai. 26Now maru kawmuüa kowi dow aia ruiah mih maru-uüa chet pe tara khai bowt. Akratma mih lawnguan kowi dow Mosi tut-e kowpawla büah khai, now chili chalachow mih lawnguan kowi dow amatni chet pe khai.

27Nami kung kowi dow Jethraw mih aiamat pren prakowi mang khai bowt. Mosi dow a-pu Jethraw hown taprai khai bowt.