Uown Lawt 16

Mukuang hownia kowh manna kawm

1Israeluüa dow Elim pami arah hownia plan lawt khai iawk. Amatni dow Aigupta pren hownia uang lawt kung kowi pre la kowi kowh lacher laitanga ni khe Sin pape mih süngrüp süngkangma kowi kowtowm khai. Nami arah dow Elim hai Sinai hungh takra kowi chekhai. 2Sin süngrüp süngkangma kowi uowi büah mih khin khe Israeluüa mih Mosi hai Arawn iüah kowi kamcheah khai. 3Amatchi kowi Israeluüa tek pe mih, “Tawngplawng kowchow Aigupta pren kowi uowi khe CHAKRAMANG rut kowi anging tuk kowng dowi? Nakowi dow chaknga puh tawnla se kawm hai chaknga du pat chi anging ka cha reng chowdiah. Nachenganchepaw kawmat dow mami süngrüp süngkangma kowi akhawr hown nape kowng anging kownkow enchi uang pawla anging mih chekhai,” pabüah khai.

4Nami khin khe CHAKRAMANG tek pe Mosi mih, “Mukuang hownia uangchak iawng enni vüi ang naiu pe enni chakkham kown. Nami chakkham dow panichow chak müa taih enni naia lüm kown. Panichow chak klen kowi ahuma enni naia lüm kown nadowi. Ang kowh ana pek enni chün tak chünchü ang nachaing enni kown. 5Taruk ni mih ni khe dow pre ni chak vüi naia lüm büah kown, now nathawpla chakkham büah kown,” pakhai.

6Nami khin khe Mosi hai Arawn iüah tek pe Israeluüa mih, “Aigupta pren hownia uang lawtla enni mih dow enni kowh CHAKRAMANG chekhai pami aiak sat kowi prakowi enni natuk kown. 7Tharau rau-e khe dow CHAKRAMANG kowh kraingra enni nakhi kown. Tawngplawng kowchow panow CHAKRAMANG kowi kowh enni kamcheah mih maten aia ta bowk chekhai. Angching dow iawngpa mih maru chowtaih; tawngplawng kowchow enni tuk kamche angching khai?” pakhai. 8Mosi plan tek pe Israeluüa mih, “CHAKRAMANG mih sat kup khe nape enni chaknga kown, now rau-e dow ahuma nape enni kawm kown. Tawngplawng kowchow panow aia kowi kowh enni kamcheah mih maten dow aia ta bowk khowk chekhai. Angching dow enni tut-e tawngpaw nadowi. Naiawngün enni kamche mih dow angching kowi kowh enni kamche mih nadowi; CHAKRAMANG kowi enni kamcheah mih chekhai,” pakhai. 9Nami kung kowi mami laiklow Israeluüa kowi nakowtek kownkow Mosi tek pe Arawn mih, “CHAKRAMANG kowi kowh enni kamcheah mih maten aia ta bowk khowk. Naiawng rakowi enni bowkbowk CHAKRAMANG pur kowi kowkowi diah,” pakhai.

10Israeluüa hown Arawn taklang mih khin khe Israeluüa dow süngrüp süngkangma prakowi haitang mü khai. Now uangnim dawng kowi CHAKRAMANG kowh kraingra dow khi büah khai. 11Nakhowk khe CHAKRAMANG tek pe Mosi mih, 12“Israeluüa kamche ang mih maten ang ta bowk khowk. Naiawng rakowi mami laiklow amatni kowi kowtek pe diah. Sat kup khe dow nacha chaknga büah kown, now rau-e khe dow du pat naka cha kawm büah kown. Nahanow ang dow CHAKRAMANG amatni kowh Thurai chekhai pami natuk büah bowt kown,” pape khai.

13Now CHAKRAMANG tekah iawng sat kup khe dow uamuk hawmh uang iow hanow Israeluüa kowh tangbung tapat lut uang krawi chawp khai. Nahanow rau-e dow tangbung tapat lut nang uang kla khai. 14Naiawngün nang kang kung kowi dow dam lip iawng apaklepchow krawng kowi talüp mih khi büah pachap khai. Naiawngün dow nang takheu khe kowh iawng chekhai. 15Nami khita hanow lowkkowlowk Israeluüa tatek mih, “Naiawngün tawng chow?” pakhai. Naiawngün dow tawng chap chow mih tuk büah dowi chekhai.

Nakhowk khe Mosi tek pe Israeluüa mih, “Naiawngün dow enni chak müa CHAKRAMANG pe enni mih manna1 kawm chowbowt. 16CHAKRAMANG dow maiawng pe enni ana khai. Enni bowkbowk kimchakuüa lawk mowr chi enni nalümla kown. Maru lowk ia vüi pathun (aset hown 800 gram) chi tangbung kowi kowh uowi mih maten vüi enni nalümla kown,” pakhai. 17Israeluüa dow Mosi tek iawng chang khai bowt. Tawngbak mih dow ahuma lümla khai, now tawngbak mih dow a-echow lümla khai. 18Nachenganchepaw khaiah khe dow ahuma lümla miuüa kowh paw chüt dowi, now a-echow lümla miuüa kowh paw e dowi chekhai. Amatni dow chowlowkkow kimchak vüi lawk mowr chi lümla khai.

19Nami kung kowi Mosi tek pe Israeluüa mih, “Nami dow auai rau kowh vüi hangkow towah büa diah,” pakhai. 20Nachenganchepaw tawngbak mih maru dow Mosi tek iawng chün dowi; amatni dow auai rau kowh vüi towah ne khai. Nahanow nami chakkham kowi dow dung uang uowi khai, now nami chakkham dow uang nam nga khai. Naiawng chang mih khi hanow Mosi mih amatni luk kowi lainowmma kunmarau khai. 21Maru kawmuüa dow amatni chowlowkkow kimchakuüa vüi lawk mowr chi rau towng uang lümla manna büah khai. Nachenganchepaw naiawngün dow sat den now ter khai.

22Now taruk ni mih ni khe amatni dow pre dungna chi uang lümla büah khai. Amatni dow maru lowk ia vüi pre thun chi uang lümla büah khai. Nami lawnguan dow Israel aluchowuüa mih Mosi kowi uang tek pe khai. 23Nakhowk khe Mosi tek pe mih, “CHAKRAMANG kowh ana pek maiawng: Tharau dow CHAKRAMANG vüi kowi kowh chimsaima mih Tanai Ni naown kown. Naiawng rakowi enni nau heuah mowr mih maih kowi heuah büa diah, now enni nau butah mowr mih butah büa diah. Ta lat mih dow auai rau kowh vüi towah büa diah,” pakhai. 24Now amatni dow Mosi ana pek iawng ta lat mih dow auai rau kowh vüi towah büah khai. Nakhowk khe dow naiawngün mih nam paw nam dowi, dung paw uowi dowi chekhai.

25Auai rau khe Mosi tek pe mih, “Ani dow naiawngün cha büa diah. Tawngplawng kowchow panow ani dow CHAKRAMANG kowh Tanai Ni chekhai. Ani dow naiawngün mih dowm kowi enni nakhi kown nadowi. 26Taruk ni mowr enni nalüm kown. Tawkche ranit ni mih ni khe dow enni naka kown nadowi tham. Tawngplawng kowchow panow nami ni dow CHAKRAMANG kowh Tanai Ni chekhai,” pakhai.

27Nachenganchepaw ranit ni mih ni khe maru-uüa dow naiawngün nakrawi lüm kownkow prang kowi cham lawt ne khai. Tawkchedow tawngpaw kowkrawi ka büah dowi chekhai. 28Nami khin khe CHAKRAMANG tek pe Mosi mih, “Mün ni tak chow ang kowh ana pek hai rirow pek enni nachün ang dowi kown? 29Sünta büa diah, mami Tanai Ni dow enni vüi kowi CHAKRAMANG towah mih chekhai. Naiawng rakowi taruk ni mih ni khe aia dow pre ni chak vüi pe enni mih chekhai. Naiawng kowh ranit ni mih ni khe dow kim hownia amiapaw prang kowi nalawt kown nadowi; kim kowi enni nauowi phülü kown takla,” pakhai. 30Naiawng rakowi maru-uüa dow ranit ni mih ni kowi tanai khai.

31Israeluüa dow nami chakkham kowi manna pahai tek pe khai. (Manna pami dow “Naiawngün tawng chow” pami chekhai). Naiawngün dow bakkawr nuk powm iawng chekhai, now arawng dow akawma chekhai; achak sowr dow kuai tui hown kowh thawpah mih kawmpah iawng chekhai. 32Nami kung kowi Mosi tek pe Israeluüa mih, “CHAKRAMANG ana pek maiawng: Enni mih enni krungchakuüa vüi lang towta manna kawm pathun diah. Nami dow Aigupta pren hownia CHAKRAMANG uang lawtla enni kung kowi süngrüp süngkangma kowi tawng chow pe cha enni mih enni krungchak maru-uüa nakhila kownkow chekhai,” pape khai.

33Nami khin khe Mosi tek pe Arawn mih, “Paw puh lowk hanow nami puh kowi tow pe manna kawm pathun now asima kümah diah. Nami dow a-i kowh chuprek chaprekuüa nakhila kownkow CHAKRAMANG pur kowi kowtowah diah,” pakhai. 34Now Mosi kowi CHAKRAMANG peah ana iawng tow pe manna kawm mih puh dow sangbowk laitawm tawkpla pur kowi Arawn towah khai. 35Amatni kowuowiah kown mih Kanan pren sünghi kowi kowting dowi mowr Israeluüa dow 40 ning mowr nami manna kawm cha büah khai. 36(Pathun kowi dow aset hown 800 gram chekhai).