Esther 5

Esther kowh sangkrangra

1Sum ni mowr hawm khang prasi lük ki sun kung kowi auai ni dow Esther mih mang tawnguat khupla hanow mang kowh towklak pur kowi alak kowi kowh viadawng kowi kowiowng khai bowt. Nakhowk khe mang dow aia kowh towklak plawt prakowi dang se mang chowm rah kowi chowm phülü khai. 2Aia dow aia kowh towklak pur kowi kowh viadawng kowi Esther uang iowng dawnglawng mih khita now Esther luk kowi awmrawm kowh aia rut kowi kowh kuh raitua Esther prakowi haiiaw pe khai. Nakhowk khe Esther dow mang prakowi kowkowi hanow nami kuh raitua chem kowi kowdowk khai.

3Nakhowk khe Esther kowi mang lüntaah mih, “Esther, en tek kown mih uowi bow? Tawng chow en nau mih uowi? En che nau hanow ang kowh pren dawnglang paw ang nape en kown taih,” pakhai.

4Esther klangah mih, “Mangkri, en vüi amülüng mih chakkham ang kamrütta hüah. En che sak-ih ang khai hanow sakrauma hown ani dow Haman enchi ang kim kowi uang tawi cha hawm iüa diah,” pape khai.

5Nakhowk khe aia kowh naruüa kowi mang peah ana mih, “Esther tek iawng lup nachowngla kownkow kawmat Haman kowi uang hawla dit,” pakhai.

Nahanow mang hai Haman iüah dow Esther kim kowi tawi cha hawm khai bowt. 6Now khamla grep tui se Esther kowi mang lüntaah mih, “Tawng chow en nau mih uowi? En nau mih ang nape en kown. Ang kowh pren dawnglang en lü ang chepaw ang nape en kown taih,” pakhai.

7Nakhowk khe mang kowi Esther klangah mih, “Ang lü kown mih hai ang nau mih dow maiawng: 8En che ang luk kowi sak-ih hai ang nau mih pe ang kown nau khai hanow tharau paw Haman enchi ang kim kowi uang tawi cha hawm iüah iawk diah. Nakhowk khe ang nau mih chap ang tek en sow,” pape khai.

Mawrdekai kowi saita kownkow Haman kamrüt mih

9Nami ni dow Haman mih kow sowrma hai awmrawmma powt khai. Nachenganchepaw aia dow mang kim tapplawt re-e khita Mawrdekai hanow lainowmma kunmarau khai. Tawngplawng kowchow panow Mawrdekai dow aia kowi khi chepaw iowng dowi chekhai, now tawng iawng paw aia kowi ringkaw mih krang tüng pe dowi chekhai. 10Nachenganchepaw nakow ni dow Haman mih town sak hanow aia kim kowi kowpowt khai. Now kim kowi kowting khe aia dow a-auiuauüa hai amasi Zeres kowi aia re-e hawah khai. 11Nakhowk khe aia dow aia kowh dawngthawnguan uowi mih lawnguan, aia kowh chapauüa kawm mih lawnguan, aia kowi tawng iawng ngai chow mang tüng pe ringkawra mih lawnguan, maru iukuüa hai akeng mih maru maten lak-e lang kri mih rah aia kowi mang peah mih lawnguan bawrima hown kowbüah kowi lawp pe khai. 12Nami klen kowi paw kowbüah kowi Haman tek pe mih, “Naiawngün krowngchow nak dowi tak; mang kowh masi Esther paw mang hown taiua cha hawm kownkow ang klen kowi mia kowi paw hawla dowi chekhai. Tharau paw mang hown taiua cha hawm kownkow aia kim kowi mang masi Esther haw angching iawk. 13Nachenganchepaw mang kim tapplawt re-e Jihudi chenchap Mawrdekai kowi chowm phulu mih ang khita hanow mapaw ang kowh sak thaulang dowi chekhai,” pakhai.

14Nakhowk khe Haman kowi a-auiuauüa hai amasi Zeres tek pe mih, “Naiawng chekhai hanow Mawrdekai kowi naawkla kownkow aklang 50 muk mih singh phükta hüah lowk bowt. Tharau rau-e khe mangkri tut-e lü ana hanow Mawrdekai kowi nami singh kowi awkah bowt. Nami kung kowi dow awmrawmma hown mangkri enchi mang Esther kim kowi ka tarü hawm chak kown towbowt,” pape khai. Nami laiklow dow Haman mih nauta khai. Naiawng rakowi aia dow Mawrdekai awk müa kamrütta singh lowk khai.