Esther 2

Esther chowng masiuüa mang mih

1Nachenganchepaw aia kowh kunmarau prowng kung kowi dow mang Ahasuer mih amasi Vasti changta mih lup hai aia vüi kowi kowh lawtta ana mih lawnguan kowi tatuak khai. 2Nakhowk khe mang kowi aia kowh maru iukuüa tek pe mih, “Mangkri, en vüi malauüa klangiungma mih nakrawi cham kownkow pe ana diah. 3En pren kowi kowh pren powng maten kowi tow pe maru iuk diah. Naiawngün maru iukuüa mih malauüa klangiungma mih maten pakrawi cham en lah, now Susa marow kri kowi kowh en kim kowi kowh masiuüa nungra kowi pauang sa büah lah. Now nakowi kowh masiuüa nungra mingkhet mih akletia Hegai mih naiawngün malauüa hawmh kowi pacham mingkhet lah. Now naiawngün malauüa hawmh naklangiungla ngamlam kownkow tatawng müa chap maten Hegai pacham peah lah. 4Nami kung kowi dow mangkri nauah mih masiuüa kowi Vasti takcha napeah masiuüa mangra kown,” pakhai. Naiawng aia kowh maru iukuüa peah prengia mih dow mangkri mih lainowmma awmrawm khai. Naiawng rakowi aia dow nami powm iawng chang khai bowt.

5Nami khin khe Jihudi chenchap Benjamin krungchak Mawrdekai dow Susa marow kri kowi uowi khai. Aia dow Jair kowh chapa chekhai, Jair dow Simei kowh chapa, now Simei dow Kis kowh chapa chekhai. 6Juda pren kowi Jehoiakin chowm mang khe mang Nebuknezar mih Jerusalem marow hownia mang hailawm maru sangrum kowi khümla hanow Babulawn pren kowi pawla khai. Naiawngün maru-uüa pungmadawng kowi Mawrdekai kowh pipu-uüa paw tawi uowi chekhai. 7Mawrdekai kowh dow apahi kowh chama Hadasa pami uowi lowk ia. Hadasa kowh ming uowi lowk tak mih dow Esther chekhai. Aia dow kowru hai apowm klangiungma chekhai. Tawkche aia kowh dow a-u a-pa kowng bowk rakowi arak Mawrdekai mih achama iawng ta thum ta mawmah khai.

8Mang lawtta ana kung kowi dow malauüa akawmma kowi Susa marow kri kowi kowh mang kim kowi kowh masiuüa nungra kowi uang pawla khai. Nakhowk khe Esther kowi paw masiuüa nungra kowi uang pawla khai. Now naiawngün malauüa hawmh kowi dow Hegai kowi pe mingkhetah khai. 9Hegai dow Esther luk kowi lainowmma sak-ih rakowi aia kowi klangiungma klowpah klangah reng chekhai. Aia kowi dow uang uown uowi hownia naklangiungla ngamlam kownkow tatawng müa uanh hai chakkham lang iung mih Hegai peah khai. Aia vüi dow mang kim hownia ruiah mih narma Hegai tow pe ranit ia khai, now aia hai aia kowh narmauüa kowi dow mang kim kowi kowh masiuüa nungra kowi kowh lang iung mih towklak kowi towah khai.

10Esther dow aia kowh chen hai krungchak ming mia tut-e paw tek dowi chekhai. Tawngplawng kowchow panow aia kowi dow apama kowh chapa Mawrdekai mih pe tekah dowi chekhai. 11Now Esther iung reng tak chow mih hai tawng chow own mih own dowi mih natukla kownkow Mawrdekai dow ni towng mang kim kowi kowh masiuüa nungra kim viadawng kowi kowlen reng chekhai. 12Mang Ahasuer tut-e kowkowi kown mih masiuüa maten dow kowkowi kown mih akhin uang ting dowi rawn paning mowr naklangiungla ngamlam kownkow achang takla mih maten chang reng chekhai. Amatni dow taruk la mowr sau nam iungma mih hai taruk la mowr paingbawng hai tatawng müa uanh hown tatawng reng chekhai. 13Mang tut-e lowra mih masiuüa kowkowi mih khin khe dow mang kim kowi kowh masiuüa nungra hownia aia nauah mih tawnguat hai tatawng müa uanh hown ia tatawngla chekhai. 14Nami masiuüa dow uariiu khe mang tut-e kowkowi hanow auai rau uarthowi khe dow mang hown kowh ki taphua taiua mih masiuüa uowi rah kowi kowuowi reng chekhai. Naiawngün masiuüa hawmh dow mang sak-ih kowh rük pe ming khükhü hawah dowi bowt hanow mang tut-e kowka kowi dowi bowt chekhai. Naiawngün masiuüa hawmh kowh mingkhet mih dow akletia Sasgaz chekhai.

15Now Mawrdekai changla chama mih apahi Abihail chama Esther kowh paw mang tut-e kowkowi khin uang ting khai bowt. Nakhowk khe Esther dow aia kowh mingkhet mih akletia Hegai pe tatawngah mih klen kowi tawngpaw kük dowi bowt chekhai. Esther kowi dow khi mih maru maten naukhi bowk chekhai. 16Esther kowi mang kim kowi mang tut-e kowpawla mih dow mang Ahasuer chowm mang mih ranit ning kowi kowh hamüt la khe chekhai. Nami dow Tebet la khe chekhai.

17Esther kowi dow akeng mih masiuüa hawmh maten kowi lak-e mang lang sakrauah khai, now aia dow akeng mih malauüa hawmh maten lak-e mang tut-e saksing sanara hai sakraura lang ka khai. Naiawng rakowi aia kowi dow mang mih kruk pe mang lukruk lowk khai, now Vasti takcha kowi aia kowi dow peah masiuüa mangra khai. 18Nami kung kowi dow mang mih Esther kowi nakiowriah kownkow thak pawi kri lowk khai. Nami pawi kowi aia dow aia kowh maru iukuüa hai aluchowuüa maten kowi hawla khai. Now aia pren kowi kowh pren powng maten kowi nami ni mih lup chang tanai ni iawng hai nasunah kownkow aia krawi phuang khai, now awmrawmma hown maru kawmuüa kowi paw luah khai.

Mang kowi saita kown mih sangkrangra Mawrdekai tata mih

19Akung kowi malauüa hawmh plan takua mih khin khe Mawrdekai kowi dow mang kim kowi kowh maru iuk lowk ia mih arah peah khai. 20Esther dow arak Mawrdekai tek pe iawng aia kowh chen ming hai aia kowh krungchak ming itah khai. Esther dow arak Mawrdekai thumah mawmah mih khin khe kowh chün lai mih iawng nami khin khe paw chün reng chekhai.

21Mang kim tapplawt kowi Mawrdekai chang lup mih khin khe akat dow mang kim tapplawt chawng mih akletia Bigthana hai akletia Teres iüah dow kunmarau kowh mang Ahasuer kowi kowngta kown mih sangkrang khai. 22Nami sangkrangra laiklow tata hanow Mawrdekai dow masiuüa mang Esther kowi phowk pe khai. Now naiawng Mawrdekai tek pe mih lawnguan dow mangkri kowi Esther phowk pe khai. 23Now nami lawnguan dow nowm bow dai bow pami natukla kownkow krawi chetah hanow anowm chekhai pami mang tukta khai. Naiawng rakowi nami pre ia kowi dow aia saita khai. Naiawngün laiklow maten dow Amat Müa Bowih kowi ruiah bowk khai.