Lai Ching 4

Lusa kowi tawng sia paw mrawkra uowi dowi

1Lusa kowi kowh tachang nowng tachang powng mih maten ang krawi plan tang mü khai. Nowng chang powng changra kowi uowi miuüa dow kar hai mik tui hown uowi khai. Nachenganchepaw amatni kowi peah sakklamra mih miapaw uowi dowi chekhai. Krawi chang nowng miuüa kowh dow kür ahuma. Nachenganchepaw nowng chang powng changra kowi uowi miuüa kowh dow akhowng mih uowi dowi chekhai. 2Naiawng rakowi kawmat kowh sing uowi miuüa lak-e alai kowh rik kowng miuüa kaucha lang iung padow ang ka tuak khai. 3Tawkche naiawngün lak-e kawmat kowh uang dia dowi tak miuüa kowh kaucha lang iung. Tawngplawng kowchow panow amatni dow lusa kowi kowh lup ngak phaw mih tawi khi dowi tak chekhai.

4Nami klen kowi lusa kowi kowh maru aklumma uowi mih hai iuksown mih dow kimping namkhetuüa ka mih kowi irsi kowh chekhai pami ang plan khi khai. Tawkche nami paw tawngpaw auan uowi dowi. Naiawngün paw li kung kowi kowh krawi iowm mih iawng krowngchow taih chekhai. 5Tawngbak mih maru tek dow, “Tawngpaw chang kown nau dowi kowh tadawi owmlowm uowi mih dow bualama chekhai. Chang lup dowi mih dow ka cha dowi rakowi akowng takla,” pakhai. 6Nami laiklow na nowm chepaw naia. Tawkchedow ahuma ka kown nau rakowi ahuma chang lup mih lak-e ka ditchow chepaw thaulangma uowi mih lang iung. Ahuma ka kown nau kowh chang lup mih dow li kung kowi kowh cham krawi iowm mih hown katsang chekhai.

7Nami klen kowi paw mukuang dak kowi kowh uowi mih vüi tawngpaw auan uowi dowi mih ang plan khi pachap iawk. 8Tawngbak mih maru kowh dow chauüa paw uowi dowi, tainau paw uowi dowi, aia malowkchow taih uowi. Nachenganchepaw aia dow lainowmma chang lup khai. Tawngplawng kowchow panow aia dow aia kowh dawngthawnguan uowi mowr mih luk kowi katpaw sak-ih dowi chekhai. Aia kowh piawpara nuata khükhü mia vüi chow khowt pat aia chang lup? Nami paw tawngpaw auan uowi dowi; akawm akrat klen kowi tawngpaw na dowi chekhai.

9Lowk iachow uowi mih lak-e dow pre ia taiua uowi mih lang iung. Tawngplawng kowchow panow pre ia mih dow lowkkowlowk nowng takhowng chekhai. 10Pre ia khe dow lowk ia mih che tim hanow alowk mih auiua nowng krüngah kown. Tawkche lowk iachow mih maru dow lainowmma nga khai. Tawngplawng kowchow panow aia kowh dow akhowng mih uowi dowi chekhai. 11Nami klen kowi pre ia dow taiua mawk hanow pik den reng. Tawkche lowk iachow mih maru dow tawng iawng chow naden kown? 12Lowk iachow mih maru dow aiachow nowng sum reng. Tawkche pre ia mih maru dow amatchi mih nanowng takhowng kown. Sum rüa mih leng dow tarai naklak dowi chekhai.

13Maru kowh prengia lai sünta kown nau dowk mih alawngtangma mih mang lak-e ngaraichow chepaw prengia chakma mih klanguüa lang iung chekhai. 14Naiawng mih klanguüa dow mang kim kowi dia mih nadowi chepaw, kla thawng mih chepaw, now ngaraima chepaw nowng chowng mang chekhai. 15Ang khi mih lawngtangma mih mang kung kowi dow nami klanguüa ta chowm mang khai, now mukuang dak kowi kowh sing uowi miuüa nami mang klanguüa kung kowi tawi krawi bowk chekhai. 16Aia krüa kowi maru akawmma uowi chepaw naia. Tawkche aia uowi dowi bowt mih khin khe dow aia changla mih lup lawnguan kowi miapaw sak kowi nata towah kown nadowi chekhai. Nami paw tawngpaw auan uowi dowi. Nami paw li kung kowi kowh krawi iowm mih iawng krowngchow taih chekhai.