Plan Rui 34

Mosi kowng mih

1Nami kung kowi Mosi dow Moab pren kowi kowh dowm nai hownia Pisga hungh kowi kowkowi khai, now Nebo hungh kowi kowh lang kro mih chut kowi kowpün khai. Nami chut dow Jeriko marow hown tatang dowk chekhai. Nami chut hownia Mosi kowi mih Kanan pren paprenma CHAKRAMANG tüng pe khai. CHAKRAMANG dow aia kowi Gileaduüa uowi rah süng hownia Dan krungchakuüa uowi rah süng mowr tüng pe khai. 2Now Naptali krungchakuüa uowi rah süng, Efraim krungchakuüa uowi rah süng hai Manase krungchakuüa uowi rah süng paw aia kowi CHAKRAMANG tüng pe khai. Now satkup prakowi paw Mediteranean sata mowr Juda krungchakuüa uowi rah süng maten aia kowi CHAKRAMANG tüng pe khai. 3Nami klen kowi aia dow Negeb süng hai Jeriko marow uowi mih süng paw Mosi kowi tüng pe khai. Jeriko marow kowi dow chekmarawng singh marow pahai maru tukah khai. Now Jawrdan aw mrawkphak pra kowh anaima mih süng hownia Zoar marow uowi mih süng paw Mosi kowi aia tüng pe khai. 4Nami kung kowi dow Mosi kowi CHAKRAMANG tek pe mih, “Abraham, Isak hai Jakawb büah kowi amatni krungchakuüa kowi napeah kownkow ang khamah mih pren dow mami chowbowt. Pren dow en matia mik hown khila kown mih khin ang pe en khai. Tawkche Jawrdan aw haipown hanow pai kowi dow en naka kowi kown nadowi,” pakhai.

5Now CHAKRAMANG tekah iawng CHAKRAMANG kowh nar Mosi dow Moab pren kowi kowng khai. 6Aia kowi dow Moab pren kowi kowh Bet-Peur marow re-e lawngrawi kowi CHAKRAMANG dupah khai. Tawkchedow Mosi kowh tadupra kuam mih tawng re-e chow mih kawmat mowr miapaw tuk dowi chekhai. 7Kowng khowk khe Mosi dow 120 ning khowk chekhai. Tawkchedow aia kowng mih khin khe aia kowh mik sa paw uak dowi tak chekhai, now aia kowh kow kür paw iaw dowi tak chekhai. 8Israeluüa dow Moab pren kowi kowh dowm nai kowi 30 ni mowr Mosi kowi karah khai. Nami kung kowi dow Mosi kowi karah mih hai uowila uiting uangtak mih khin chur khai.

9Mosi mih aia kowng dowi rawn tak khe Nun kowh chapa Josua luk kowi tang pe rut hanow peah prasi khai rakowi Josua dow prengia pek mih Lümlasai hown atekma uowi khai. Naiawng rakowi Israeluüa dow Josua laiklow iawng uowi khai bowt. Now Mosi hownia kowh amatni kowi CHAKRAMANG peah mih ana pek paw chün büah khai bowt.

10Mosi iawng mih risi dow ani mowr kowi Israeluüa pungmadawng kowi miapaw uang dia dowi tak chekhai. Mosi hown dow auiua iawng tamü maklak se CHAKRAMANG taklowp taklang khai. 11CHAKRAMANG mih Mosi kowi dow Aigupta pren kowi kowh Faraw hai aia kowh maru iukuüa tut-e kowchinah khai, now Aigupta pren paprenma kowi awdara uowima mih lup hai amatra pe changah khai. 12Israeluüa maten pur kowi akri kraingma mih kür Mosi tüng pe khai, now kramra uowima mih lup Mosi chang pe khai. Kawmat mowr pat paw Mosi iawng mih risi dow Israeluüa pungmadawng kowi miapaw uowi dowi tak chekhai.