Plan Rui 26

Rik kuaah mih luprak naap kown mih

1“Nachangla dawngthawnguan kownkow CHAKRAMANG enni kowh Thurai nape enni kown mih pren dow enni nakowpowngah now nakowuowi kown. 2Nami khin khe nami pren kowi kowh krawng kowi dow enni nachang üa nachang laih kown. Nami üa hai laih hownia kowh enni rik kaah mih luprak dow kharang kowi enni natowah ne kown. Now aia kowi maru kawmuüa nachupiiala kownkow aia nalang kloah kown mih aia uowi rah kowi naiawngün luprak dow enni nakowpawla kown. 3Nakhowk khe nakowi kowh hawt uowi mih uamow kowi enni natek pe kown mih, ‘Mami pren napeah kownkow alai kowh anging pipu-uüa kowi CHAKRAMANG khamah khai. Now nami laikham powm iawng ani dow mami pren kowi ang uang uowi khai bowt. CHAKRAMANG vüi mami awmrawm sung ang uang pawla mih nami laikham uang tachih rakowi chekhai,’ napape kown. 4Nakhowk khe enni kowh rut hownia nami kharang dow uamow pawah kown, now CHAKRAMANG enni kowh Thurai kowh phuchuara ria kowi aia natowah kown.

5“Nami kung kowi dow enni bowkbowk CHAKRAMANG enni kowh Thurai pur kowi natek kown mih, ‘Ang kowh pu1 dow Aramean maru; aia dow cham mang panglang mih maru chekhai. Aia dow maru iun a-echow hown Aigupta pren kowi kowkowi hanow kowuowi khai. Now Aigupta pren kowi uowi mih khin khe aia hownia dow chenchap aiukma hai akürma uang phaw khai; amatni dow maru iun akawmma uang uowi khai bowt. 6Nachenganchepaw Aigupta maru-uüa mih king anging dowi chekhai. Amatni dow towk anging ngare khai; amatni dow tow anging nar hanow lup akratma mih pe chang anging khai. 7Nakhowk khe CHAKRAMANG anging pipu-uüa kowh Thurai tut-e anging awr kar khai. Now CHAKRAMANG dow anging kowh kar klow ta khai. Aia dow anging ngare mih hai anging lup chang kawm mih khi khai. Nami klen kowi tawng iawng chow Aiguptauüa chang anging nowng mih paw aia dow khi khai. 8Naiawng rakowi CHAKRAMANG dow aia kowh rut akürma mih hown kramra uowima mih lup, awdara uowima mih amatra hai awdara lup chang pe hanow Aigupta pren hownia uang lawtla anging khai. 9Aia dow makowi uang pawla anging khai, now iawn tui hai kuai tui atekma mih pren dow pe anging khai. 10Naiawng rakowi aw CHAKRAMANG, en pe anging mih krawng hownia kowh rik kaah mih luprak en tut-e ang uang pawla khai,’ napa kown. Naiawng enni ki tek hanow enni uang pawla mih kharang dow CHAKRAMANG enni kowh Thurai pur kowi enni natowah kown, now tabawkah krawm se aia kowi enni nachupiiaah kown. 11Akung kowi enni hai enni kowh kimchakuüa kowi CHAKRAMANG enni kowh Thurai pe enni mih prasira aiungma mih srui hown enni napiaw kown. Now Leviuüa hai enni tut-e kowh tawi uowi mih prenlang maru-uüa kowi paw enni hown enni nape piawla kown.

Hamüt bak kowi pabak naap kown mih

12“Enni kowh luprak hownia ning towng hamüt bak kowi pabak chi CHAKRAMANG kowi enni peah khai. Nachenganchepaw sum ning kowi pakat chi hamüt bak kowi pabak dow Leviuüa, prenlang maru-uüa, saratchow chah hai mamaimowuüa kowi enni napeah kown. Naiawng che enni chang hanow naiawngün maru-uüa paw enni pren kowi chakkham aduma natawi ka kown towbowt. 13Nami kung kowi dow CHAKRAMANG enni kowh Thurai kowi enni natek pe kown mih, ‘En kowh ana pek iawng ang kaah mih luprak hownia en vüi kowi kowh ang lang towah mih srui dow ang uang pawla bowk khowk. Naiawngün luprak dow Leviuüa, prenlang maru-uüa, saratchowuüa hai mamaimowuüa kowi ang peta khowk. En kowh ana pek ang üa dowi, now tama paw ang tamata dowi chekhai. 14Kowng miuüa vüi uowila uiting uangtak khe paw en vüi kowi kowh lang towta mih dow tawng chap paw ang cha dowi chekhai, now ang cham tasür talawk khe paw naiawngün dow kim hownia ang cham lawtla dowi. Nami klen kowi naiawngün dow kowng miuüa vüi kowi kowh pawi kowi paw ang cham pe dowi chekhai. Aw CHAKRAMANG, ang dow en kowh laiklow iawng ang chang reng chekhai. En kowh ana pek maten iawng ang chün reng chekhai. 15Aw CHAKRAMANG, en kowh uowi rah chimsaima mih mukuang pren hownia uang iu mü diah, now en kowh maru Israeluüa kowi uang iu peah prasi diah. Anging kowh pipu-uüa tut-e en takhamta iawng iawn tui hai kuai tui atekma mih pren dow en pe anging khai; nami pren kowi paw uang iu peah prasi diah,’ napa kown.

CHAKRAMANG aiamat kowh maru Israeluüa

16“Ani mih maiawngün ari arow hai ari aiang nachün kownkow CHAKRAMANG enni kowh Thurai pe enni ana khai. Maiawngün dow enni kowh saktuak maten hown nachünah kaneu kown takla. 17CHAKRAMANG chowtaih enni kowh Thurai pami ani mih enni taphuang khai. Now aia tiama kowi namang kown mih enni taphuang khai; aia kowh ari aiang, aia kowh rirow, aia kowh ana pek hai aia laiklow nachün kown mih paw enni taphuang khai. 18Now CHAKRAMANG paw aia takhamta iawng enni mih aia maru hai aia matia kowh dawngthawnguan nachowng kown mih ani uang phuang enni khowk. Naiawng rakowi aia kowh ana pek maten enni nachün kown takla. 19Chenchap maten dow CHAKRAMANG thawpah mih chekhai. Tawkchedow enni kowh rowsira, ming iungra hai kraingra mih akeng chenchapuüa luk kowi natow enni kownkow aia phuangla khai. Nami klen kowi aia laikham powm iawng aiamat vüi kowi kowh aia lang kraah mih chenchap enni nachowng kown mih paw aia phuangla khowk chekhai,” pakhai.