Plan Rui 24

Takhua talan khe kowh rirow

1“Tachawng kung kowi amasi luk kowi sak-ihah dowi mih lup ahua khi pe chepaw naia kown. Naiawng sak-ihah dowi mih chap che uowi khai hanow amasi vüi takhua talan cha ahua naia rui kown, now nami cha mih amasi kowi ahua naap pe hanow naia khuata kown. 2-3Now nami masiuüa mih ahua kim hownia lan hanow akeng mih kachakuüa tut-e cham plan mang chepaw naia. Tawkchedow aia cham rik mang rah kowi kowh hua iawng nami kachakuüa paw sak-ihah dowi kowh khuata chepaw naia kown, nadowi now ahua kowng khai chepaw naia kown. 4Naiawng mih masiuüa kowi dow ahua chük naplan ia chawngah iawk kown nadowi bowt. Tawngplawng kowchow panow naiawng mih masiuüa dow asür alawkma khowk chekhai. Naiawng mih tachawng talang dow CHAKRAMANG sui chekhai. Nachangla dawngthawnguan kownkow CHAKRAMANG enni kowh Thurai nape enni kown mih pren kowi enni kowuowi mih khin khe naiawng mih lup ngak dow enni naia chang kown nadowi.

Paw masi thowi khe kowh rirow

5“Paw masi thowi mih maru kowi dow tasenra kowi lah, pren lup chang rah kowi lah enni nacham ia chinah kown nadowi. Aia kowi dow paning mowr amasi hown kim kowi apiawma enni nape uowiah tak kown takla.

Lowi pek mih maru kowh rirow

6“Enni peah lowi mih maru kowi dow apawng iawng hai mi küa müa lah, mi küa müa luk kowi kowh hua lah enni naia pawta pe kown nadowi. Tawngplawng kowchow panow aia dow nami hown kowh sing mih chekhai. Nami uanh pawta pe mih dow aia kowi rupta pe chakkham mih iawng chekhai.

Ku maru mih kowi naripah kown mih rirow

7“Enni Israeluüa pungmadawng hownia krawi ku maru kowh cham changla nar mih paw nauowi kown, now cham sumah mih paw nauowi kown. Naiawng krawi kuh maru mih kowi dow enni nakowngta kown takla. Naiawng hai enni pungmadawng hownia naiawng mih angak dow enni namata kown.

Par rawka phaw khe kowh nachünah kown mih rirow

8“Par rawka phaw mih che enni khi hanow uamowuüa nape enni kown mih ana klangiungma enni nachün kown takla. Uamowuüa kowi kowh ang peah mih ana iawng kaneuma enni nachün kown takla. 9Aigupta pren hownia uang lawt kung kowi tiama rawng kowi Miriam par phaw khe kowh CHAKRAMANG chang pe mih hangkow tamata büa diah.

Kakra kowi kowh uanh pawk rirow

10“Lowra maru kowi enni cham pe lowi chepaw naia kown. Tawkchedow nami lowi rakowi apawng iawng hai napaw pe uanh kownkow enni peah lowi mih maru kim kowi dow enni naia kup kown nadowi. 11Nakhowk khe prang kowi enni nauowi kown, now aia dow nami uanh mih prang kowi nauang pawla enni kown. 12Now aia ngarai lai kowh tawngpaw pe kown uowi dowi rakowi aia kowh müi müa uan apawng iawng hai uang pe enni chepaw naia kown. Naiawng mih uanh pawng dow uar-e hangkow towla büa diah. 13Nami uan dow aia müi müa chekhai rakowi aia nanowng müila kownkow ni towng iak pra khe kutplan sa pe büa diah. Naiawng che enni chang hanow CHAKRAMANG tut-e aia mih nalü enni iungra kown. Nahanow CHAKRAMANG enni kowh Thurai mih enni luk kowi nasak-ih kown towbowt.

Sukkri kha lawnguan

14“Enni Israel chenchap kowi lah, enni pren kowi kowh tawi uowi mih akeng chenchapuüa kowi lah — ngarai miuüa hai akhawr a-awng hown uowi miuüa kowi dow enni ngaah hanow hangkow kuanah büa diah. 15Amatni kowh sukkri kha dow sat kup dowi rawn enni napeta kown takla. Tawngplawng kowchow panow amatni dow ngaraima chekhai; amatni dow nami sukkri kha luk kowi kowh neplawng nesak mih chekhai. Ni towng sat kup dowi rawn enni che peah sukkri kha dowi hanow amatni dow enni vüi nachet tara kownkow CHAKRAMANG tut-e nanguk nakar chepaw naia kown, now nami angak prek dow enni nakur kown chekhai.

Kowmatia angak rakowi kowh ripra

16“Chauüa changta angak rakowi u-pa kowi naia kowngta kown nadowi, now u-pa changta angak rakowi chauüa kowi paw naia kowngta kown nadowi. Kowmatia angak rakowi chowtaih nakowng ngengche kown.

Tara nowm chet lawnguan

17“Prenlang maru-uüa kowi lah, siring saratchowuüa kowi lah anowm nadowi mih tara enni nachet pe kown nadowi. Now lowra mih mamaimowuüa kowi apawng iawng hai aia kowh mamaimow tawnguat mih enni naia pawta pe kown nadowi. 18Aigupta pren kowi enni paw uowila nar akat chekhai, now nami pren hownia dow CHAKRAMANG enni kowh Thurai uang lawt enni khai pami sak kowi towah büa reng diah. Nami sak kowi enni natowah kown mih dow anowm nadowi mih tara enni hang pacham chet lah pakowh chekhai.

Luprak kua lawnguan

19“Üa kowi lah, laih kowi lah enni ki kua luprak mih khin khe enni ta lawtta mih luprak dow hangkow krawi plan paw büah tham bowt. Enni tama pawla khowk mih dow prenlang maru-uüa, siring saratchowuüa hai mamaimowuüa vüi ta towla pe büa diah. Nahanow enni changah mih lup srui kowi CHAKRAMANG enni kowh Thurai mih nape enni prasi kown towbowt.

20-21“Enni klek kanrawn uih hai grep uih mih khin khe paw pamiachow mih hownia pre kat enni naia klek kown nadowi. Klekta akat kung kowi kowh ta uowi mih dow prenlang maru-uüa, siring saratchowuüa hai mamaimowuüa vüi tow pe büa diah. 22Aigupta pren kowi enni uowila nar akat mih hangkow tamata büa diah. Naiawng enni nachang kown mih ana ang pe enni mih dow naiawng rakowi chekhai.