Plan Rui 22

Akeng mih rirow

1“Enni Israeluüa pungmadawng kowi mia iawng mih kowh chünchü chia chepaw, ruapur chepaw cham takuowng kowh akeng prakowi cham mang mih enni khi hanow enni namüta hüah kown nadowi. Nami tawncher kowi dow aiah tut-e enni nakowpawla ngengche kown takla. 2Nami tawncher iah che enni re-e kowh maru nadowi, now aiah kowi tuk paw enni tuk dowi hanow nami tawncher dow enni tut-e enni napawla kown. Aiah uang krawi cham dowi mowr nami tawncher dow enni matia tut-e enni natowla kown. Tawncher iah uang krawi chet mih khin khe nami tawncher dow aiah kowi enni nahawt peah kown. 3Enni tainau-uüa kowh tama mih kawrngaramchük chepaw, dawnguan chepaw, akeng mih uanh chepaw enni khi hanow nakhe paw enni namüta hüah kown nadowi. Naiawngün uanh dow ka aiah dowi mowr enni tut-e enni natowla kown, now uanh iah uang krawi chet mih khin khe naiawngün uanh dow enni nahawt peah kown.

4“Enni tainau-uüa kowh kawrngaramchük chepaw, chia chepaw tiama kowi tim mih che enni khi hanow enni namüta hüah kown nadowi. Nami tawncher dow naia rüla kownkow enni natawi khowngah ngengche kown takla.

5“Mia iawng mih masiuüa paw kachakuüa tawnguat naia tawng kown nadowi, now kachakuüa paw masiuüa tawnguat naia tawng kown nadowi. Naiawng chang mih maru kowi dow CHAKRAMANG enni kowh Thurai sui chekhai.

6“Enni cham mang cham kat khe tia keng kowi kowh singh kowi lah, krawng kowi lah enni cham khi uakling bai chepaw naia kown. Nami uakling bai kowi dow adui luk kowi lah, achah luk kowi lah a-u awp phülü chepaw naia kown. Naiawng che enni khi khai hanow nami uakling dow tawm u tawm chah enni naia pawla kown nadowi. 7Achah dow enni naia paw kown taih. Tawkche a-u kowi dow enni nalawtta kown takla. Naiawng che enni chang hanow enni naiung kown, now chowngdawng sakklangma enni nasing kown.

8“Enni chang chawkku kim mih khin khe kimluk kowi tavir lut akro sangrumchow enni napingah kown. Naiawng che enni chang hanow enni kowh kimluk hownia maru uang dowh kowh kowng khai chepaw nami aprek dow enni nakur kown nadowi bowt.

9“Grep krum kowi dow akeng mih chap enni naia sawtla kown nadowi; enni che sawtla khai hanow nami uih hai grep uih paw enni naiung cha kown nadowi.

10“Chiala hai kawrngaramchük hown patim sang changah now enni nathawn laih kown nadowi.

11“Tawncher pawi hai adipükchow mih la hown kowh kawngah mih tawnguat dow enni nakhup kown nadowi.

12“Enni kowh uanchow kowi anui towng enni nachawp pe amawm lowk chi kown takla.

Tachawng talang rirow

13-14“Paw masi kowh taphua taiuala kung kowi amasi kowi nauah dowi bowt mih maru uowi chepaw naia. Aia dow amasi kowi napeah ming ngak kownkow maiawng natek kown, ‘Mami masiuüa kowi ang chawng nowm chowdiah. Tawkchedow aia mih kachakuüa hown taphua taiua dowi tak mih malauüa pami amatra ang khi pe dowi,’ napa kown. 15-16Nami kachakuüa che naiawng chang khai hanow masiuüa u-pa mih achama cham taphua taiua dowi tak pami amatra napawah kown. Now nami dow marow tapplawt kowi kowh lawngtang aluchowuüa tut-e masiuüa u-pa nakowpawla kown. Now masiuüa pa natek pe kown mih, ‘Mami kachakuüa hown ang chama kowi ang pe tachawngah chowdiah. Tawkchedow mami kachakuüa mih ang chama kowi nauah dowi bowt. 17Kawmat dow ang chama kowi peah ming ngak kown nau kowh mawkchow tek mih, “Ang masi cham taphua taiua dowi tak pami amatra ang khi dowi,” pakhai. Tawkchedow mow, mü büah madiah; ang chama cham taphua taiua dowi tak pami amatra,’ panow masiuüa u-pa mih amawkchow hai achama iüah tapaw mih iak khe kowh mawkla mih uan naawr phat pe kown. 18Nakhowk khe che naiawng ia tüng pe amatra khai hanow nami masiuüa hua kowi kowkhümah now lawngtang aluchowuüa mih lengker hown nabawpah kown. 19Now nami maru kowi dow lawngtang aluchowuüa mih tai 100 iun napaw pe iawk hanow masiuüa pa kowi napeah kown. Tawngplawng kowchow panow aia dow Israel chenchap taphua taiua dowi tak mih malauüa kowi piak pe ming mih chekhai. Now nami masiuüa dow aia masi nachowng iawk kown. Nami masiuüa kowi dow chownglawng kowi sing uowi mowr mih katpaw aia naia khua kown nadowi bowt.

20-21“Tawkchedow nami kachakuüa tekah iawng amasi che cham taphua taiua khai bowt nowm hanow nami masiuüa kowi a-pa kimplawt re-e nakowpawla kown takla. Nami masiuüa kowi dow a-pa kimplawt re-e kowng pat huaklu hown nakowi kowh kachakuüa hawmh nakuakah kown. Tawngplawng kowchow panow aia dow u-pa kim kowi uowi khe chang iang khai. U-pa kim kowi chang iang mih dow Israeluüa pungmadawng kowi suiiai kaniaima mih lup chekhai. Naiawng hai enni pungmadawng hownia naiawng mih angak dow enni nachurta kown.

Chang iang mih kowi naripah kown mih rirow

22“Lowra mih kachakuüa kowi maru masi hown taphua taiua mih che ka khüm khai hanow nakowngta kown takla; naiawng chang mih kachakuüa hailawm masiuüa kowi paw nakowngta kown takla. Naiawng hai Israeluüa pungmadawng hownia naiawng mih angak dow enni nachurta kown.

23-24“Hua kham uowi khowk mih malauüa kowi marow kowi kür hown maru phua iuaah khai hanow nami kachakuüa hailawm nami malauüa kowi dow nakowngta kown takla. Amatchi pre ia trui kowi nakowi kowh tapplawt re-e kowng pat hua hown maru nakuakah kown. Nami malauüa kowi kowngla kown takla mih auan dow maru phua iuaah mih khin khe maru nauang khowngah kownkow hek dowi pla dowi rakowi chekhai. Now kachakuüa kowi kowngta kown mih auan dow maru masi kham kowi krawi piak rakowi chekhai. Naiawng hai enni pungmadawng hownia naiawng mih angak dow enni nachurta kown.

25“Tawkche hua kham uowi khowk mih malauüa kowi kaurawng kowi aia malowkchow khe che kür hown maru phua iuaah khai hanow naiawng krawi chang mih kachakuüa kowi chowtaih enni nakowngta kown. 26Tawkche masiuüa kowi dow tawngpaw enni nachangah kown nadowi; masiuüa kowh dow nakowngla pat mih aprek uowi dowi chekhai. Naiawng mih lup dow lowkkowlowk kowi tasai mih iawng chekhai. 27Tawngplawng kowchow panow nami malauüa kowi dow kaurawng kowi uowi khe kowh townah mih chekhai. Nami khin khe nauang khowngah kown mih maru uowi dowi smü dow nami malauüa mih hek khowk chekhai.

28-29“Now hua kham uowi dowi tak mih taphua taiua dowi tak mih malauüa kowi kür hown krawi taphua taiua mih kachakuüa paw nauowi kown. Naiawng krawi chang mih kachakuüa kowi dow ka khüm hanow napaw pe aiawk kown. Nami kachakuüa mih masiuüa pa kowi napeah tai 50 iun kown. Now nami malauüa kowi paw aia piakta pe siri khai bowt rakowi aia nachawngah kown takla. Nami malauüa kowi dow aia sing uowi mowr naia khua kown nadowk.

30“U-uai hown miapaw naia tachawng kown nadowi; tachawng mih maru dow piak pe apa kowh siri mih chekhai.