Plan Rui 11

CHAKRAMANG kowh kraingra

1“CHAKRAMANG enni kowh Thurai kowi enni nasakrauah kown, now aia nau iawng enni nauowi kown. Now aia kowh rirow, ana pek hai alow pek maten dow atungma enni nachünah kown. 2Maiawngün ang tekah mih laiklow dow enni chauüa tut-e nadowi pami ani mih sak kowi towah büa diah. Maiawngün dow enni tut-e kowh ang tekah mih chekhai. Tawngplawng kowchow panow enni kowh chauüa dow CHAKRAMANG enni kowh Thurai kowh ripra lawnguan kowi tuk paw tuk dowi, now khi paw khi dowi tak chekhai. Amatni dow CHAKRAMANG kowh kraingra hai kür khi dowi tak chekhai. 3Now Aigupta pren kowi kowh Faraw hai aia prenchakuüa luk kowi aia chang pe mih awdara lup maten paw amatni tawi khi dowi tak chekhai. 4Now Aigupta siphai hawmh, amatni kowh kawrnga hai kawrnga kari luk kowi tawng iawng chow CHAKRAMANG changah mih amatni khi dowi chekhai; Aigupta maru-uüa uang kawikrawi enni mih khin khe tawng iawng chow sata Rik kowi aia pe tamirah mih hai asaima aia piakah mih tawi khi büah dowi chekhai. 5Mami arah kowi enni uang ting dowi mowr süngrüp süngkangma kowi enni vüi CHAKRAMANG changah mih srui paw enni kowh chauüa tawi khi dowi chekhai. 6Now Reuben krungchak kowi kowh Eliab chapa Dathan hai Abiram iüah luk kowi CHAKRAMANG changah mih paw tawi khi büah dowi chekhai. Amatchi hailawm amatchi kowh kimchakuüa, amatchi kowh tangbung hai amatchi kowh tawncher maten kowi amatchi iowngra re-e krawng awr talak phak hanow iawnta bowk mih paw enni kowh chauüa tawi khi dowi chekhai. 7Nachenganchepaw enni dow naiawngün akraingma mih lup CHAKRAMANG chang mih enni matia mik hown enni khi khowk chekhai.

Khamah mih pren kowi kowh prasira

8“Naiawng rakowi ani kowh ang pe enni mih ana pek maten dow enni nachünah kown takla. Nahanow Jawrdan aw paipra pown kowi kowh pren nakowpowng kown mih kür enni kowh nauowi kown. 9Now nami pren kowi dow chowngdawng sakklangma enni nasing kown. Nami pren dow enni kowh pipu-uüa kowi hai amatni kowh krungchakuüa kowi napeah kownkow CHAKRAMANG khamah mih chekhai. Nakowi dow iawn tui, kuai tui hai tawng chap paw akhawr uowi dowi chekhai. 10Nami enni nakowpowngah kown mih pren dow enni uang lawtla mih Aigupta pren iawng nadowi. Aigupta pren kowi dow enni sawt liu hanow tui paw enni athut takla reng chekhai. 11Nachenganchepaw Jawrdan aw paipra pown kowi kowh enni nakowpowngah kown mih pren kowi kowh hungh hai lawngrawi dow ka uang tui reng chekhai. 12Nami pren dow CHAKRAMANG enni kowh Thurai mingkhetah reng chekhai. Nami pren kowi dow ning uown hownia ning chur pat aia müah reng chekhai.

13-14“Enni che ani kowh ang pe enni mih ana maten kaneuma chünah khai, CHAKRAMANG enni kowh Thurai kowi enni sakrauah khai, now enni kowh sak maiow hown aia kowh lup enni chang pe khai hanow aia dow akhin khe nape enni uang kown. Nahanow luprak ün, grep tui sar ün hai kanrawn sau ün ahuma enni naka kown. 15Now enni kowh tawncher hawmh vüi paw aia dow dowm kowi bawrchak nape awmah kown. Now enni paw du pat naka cha kown.

Chün lai kown mih ana

16“Nachenganchepaw kaneuma uowiah büa diah. Naiawng nadowi now puanra kowi enni nacham kla hanow CHAKRAMANG hownia enni natala kown chekhai. Nahanow akeng thuraiuüa kowh lup enni nacham chang ün tarawng, now akeng thuraiuüa kowi enni nacham chupiia kown chekhai. 17Naiawng che enni chang khai hanow CHAKRAMANG dow lainowmma nakunmarau enni kown. Aia dow nataingta enni uang hanow enni kowh üa hai laih kowi dow luprak naphaw kown nadowi bowt. Now CHAKRAMANG pe enni mih klangiungma mih pren kowi alenma enni napiak kown chekhai. 18Naiawng rakowi maiawngün ang kowh ana pek maten dow sak kowi towah now ka tuakah büah reng diah. Maiawngün ana pek dow ruiah hanow bawng kowi hai kaubeng kowi sükah büah reng diah. Nami dow ana pek enni naia ka tuakla reng kown mih amat müa chekhai. 19Maiawngün ana pek maten dow enni kowh chauüa kowi plan plan tüngsangah büa diah. Kim kowi uowi khe, cham mang cham kat khe, tanai khe, now chang lup khe maiawngün lawnguan dow lawp pe büah reng diah. 20Now enni kowh kimplawt mawm kowi hai marow tapplawt kowi naiawngün ana pek dow enni naruiah kown. 21Naiawng che enni chang hanow enni pipu-uüa kowi napeah kownkow CHAKRAMANG takhamta khowk mih pren kowi dow enni hai enni kowh chauüa mih chowngdawng sakklangma nasing kown. Nami pren kowi dow krawng hai mukuang uowi mowr enni nasing kown.

22“CHAKRAMANG enni kowh Thurai kowi nasakrau kown mih, aia tiama kowi namang kown mih hai aia kowi naowmah kown mih ana ang pe enni khowk. Naiawngün ana maten dow enni nachünah kaneu kown takla. 23Nahanow akeng chenchapuüa kowi dow enni pur hownia CHAKRAMANG naprütta enni kown. Now enni lak-e kowh maru iun lang kawm mih hai lang kür mih chenchapuüa kowh pren dow enni napowngta pe kown. 24Enni krawi chawpah mih arah maten dow enni kowh pren nachowng kown. Enni kowh pren sünghi dow mrawkphak prakowi kowh süngrüp süngkangma hownia tawngphak prakowi kowh Lebanawn hungh mowr, now satlawt prakowi kowh Iufratis aw hownia satkup prakowi kowh Mediteranean sata mowr naown kown. 25Enni kowi dow amiapaw naia enni kown nadowi. Enni krawi kowiah mih pren kowi kowh maru-uüa kowi dow enni lawnguan kowi CHAKRAMANG enni kowh Thurai mih kramra hai takrow takraira napeah kown. Naiawng aia nachang kown mih dow aia khamta lai mih rakowi chekhai.

26“Sünta büah, ani mih enni pur kowi prasira hai piati ang towta enni khowk. 27Ani kowh ang pe enni mih CHAKRAMANG enni kowh Thurai kowh ana pek maten enni che chün khai hanow prasira enni naka kown. 28Nachenganchepaw CHAKRAMANG enni kowh Thurai ana pek enni che chün dowi, ani kowh ang pe enni mih ana pek iawng enni mang dowi, now katpaw enni tukah dowi mih thuraiuüa kowi enni cham chupiia khai hanow piatira dow enni luk kowi nauang kla kown. 29Enni napowngah kownkow enni kowkupah kown mih pren kowi dow CHAKRAMANG enni kowh Thurai nakowpawla enni kown. Nami khin khe dow Gerizim hungh hownia prasira laiklow enni naphuang kown, now Ebal hungh hownia dow piati laiklow enni naphuang kown. 30Nami pre buk mih hungh dow Jawrdan aw satkup prakowi kowh Kananuüa uowiah mih Jawrdan lawngrawi kowi chekhai. Nami dow Gilgal marow re-e kowh Mawre kowh chimsaima mih singh hown atawnchow chekhai. 31-32Enni dow Jawrdan aw haipown hanow CHAKRAMANG enni kowh Thurai nape enni kown mih pren nakowpowng kown chowbowt. Nakowi enni kowuowi mih khin khe dow ani kowh ang pe enni mih ana pek hai rirow maten enni nachünah ngengche kown takla.