Daniel 9

Aia maru-uüa vüi Daniel chup Thurai mih

1-2Mami dow Babulawn pren mang Darius uown chowm mang mih ning khe kowh phaw mih lawnguan chekhai. Mang Darius dow Media krungchak Ahasuer kowh chapa chekhai. Mang Darius uown chowm mang mih ning khe ang Daniel mih CHAKRAMANG laiklow iawng risi Jeremia ruila mih chabowih ang phat khai. Now nami chabowih hownia dow 70 ning mowr Jerusalem marow napiak kown mih lawnguan ang tuk khai. 3Naiawng rakowi hawm khang hown, sala uan khupma hown hai plawi phawkma hown CHAKRAMANG Thurai tut-e awr lü awr leng khai.

4Ang kowh CHAKRAMANG Thurai tut-e lü lawt se ang chup Thurai mih, “Aw CHAKRAMANG, en dow kri kraingma hai kramra hown ringkawra uowima mih Thurai chekhai. Sakrau en miuüa hai en laiklow chün miuüa kowi dow en kowh achur uowi dowi mih sakraura en napeah kown mih laikham en town pe reng chekhai. 5Nachenganchepaw anging dow chang ngak hai tawita mata khai. Anging dow chang lup ngak hai kingküa en khai, now en kowh ana pek hai ari aiang paw anging nuata khai. 6Anging kowh manguüa, aluchowuüa, pipu-uüa hai prenchakuüa kowi en nar risiuüa kowi kowh en pe tekah mih laiklow anging sünta dowi chekhai.

7“AW CHAKRAMANG, en dow achinawmma chekhai. Nachenganchepaw kawmat mowr kowi anging dow rukrai rakowi uowi reng tak chekhai. En luk kowi owmsak dowi rakowi Judauüa, Jerusalem marowchakuüa hai Israel maten kowi dow pren towng kowi en cham uetah khai. 8Aw CHAKRAMANG, anging kowh manguüa, aluchowuüa, pipu-uüa hai anging dow rukrai rakowi uowi reng tak chekhai. Nami dow kingküala en mih angak anging chang rakowi chekhai. 9Kingküala en mih angak anging chang chepaw en dow saksing sana hai pe lawt reng chekhai. 10CHAKRAMANG anging kowh Thurai laiklow anging chün dowi chekhai. Tawngplawng kowchow panow en nar risiuüa kowi en peah mih ana anging chün dowi chekhai. 11Israeluüa maten dow en kowh ana pek chün dowi kowi en kowh tiama hownia lang tahen khai, now amatni dow en klow sünta dowi chekhai. Naiawng rakowi en nar Mosi rirow bowih kowi kowh arui uowi mih piati hai tara chet laiklow anging luk kowi uang kla mih chekhai. Tawngplawng kowchow panow anging dow kingküala en mih angak changta khai. 12Anging luk kowi phih kraingma en uang pawla anging khai; nami dow anging hai anging kowh kruitown miuüa kowi kingküala mih laiklow en tekta mih nape tachiah kownkow en chang mih chekhai. Jerusalem marow kowi kowh en chang iawng palusama kowi tawng re-e paw en chang dowi tak chekhai. 13Mosi rirow bowih kowi arui uowi iawng maiawngün ripra dow anging luk kowi uang kla mih chekhai. Nachenganchepaw anging dow anging kowh angak hownia uang plan hanow CHAKRAMANG anging kowh Thurai tut-e naka saksing sanara kown mih kowi towk iowh dowi chekhai. Aia kowh anowmma mih prakowi anging pe ching dowi chekhai. 14En dow lup maten mih anowmma en changah reng chekhai. Nachenganchepaw en laiklow mih anging chün dowi. Naiawng rakowi aw CHAKRAMANG, naripla anging kownkow en kamrütta hüah mih phih anging luk kowi en nauang pe tingah kown mih mapaw tawi dowi chekhai.

15“Aw CHAKRAMANG anging kowh Thurai, en kowh rut akürma mih hown en maru-uüa kowi Aigupta pren hownia en uang lawtla khai. Naiawng rakowi kawmat pat en kowh aming anang dow iung reng tak chekhai. Nachenganchepaw anging dow chang angak hai chang lup ngak khai. 16Aw CHAKRAMANG, en dow achinawmma chekhai. En kowh chimsaima mih hungh Jerusalem marow kowi kowh en kunmaraura hai en sak-ih dowi mih maten prowngta diah. Tawngplawng kowchow panow anging hai anging kowh pipu-uüa changta ngak rakowi Jerusalem hai en maru-uüa kowi dow aria aret kowi kowh chenchapuüa changla rensi küakau khai bowt.

17“Aw anging kowh Thurai, en nar awr lü awr leng mih hawt sünta diah. Aw CHAKRAMANG, en kowh ming nang nauowila reng kownkow en kowh tapiak khowk mih en kowh chup kim prakowi saksing sanama hown tang mü iawk diah. 18Aw ang kowh Thurai, iu sünta diah, now pe ching diah. En kowh mik küah hanow en ming hown kowh hawah mih marow tapiak mih prakowi iu tang mü diah. Naiawng anging awr lü awr leng mih dow anging tachi tanawm mih rakowi nadowi; nami dow en kowh saksing sanara uowi rakowi chowtaih. 19Aw CHAKRAMANG, iu sünta diah. Aw CHAKRAMANG, lawt anging diah. Aw CHAKRAMANG pe ching diah, achap dow chang diah. Aw ang kowh Thurai, en kowh ming iung nang iung nauowila reng kownkow hangkow kra tham bowt. Tawngplawng kowchow panow en kowh marow hai en kowh maru-uüa kowi dow en kowh chekhai pami maru tuk khowk,” pakhai.

Daniel kowi Gabriel uang klangah mih

20Naiawng hai ang awr chup Thurai khai. Ang hai ang chenchap Israeluüa kowh angak dow ang awr taphuang khai. Now CHAKRAMANG ang kowh Thurai tut-e dow aia kowh chimsaima mih hungh naplan ia rawla kownkow ang awr lü awr leng khai. 21Naiawng ang chup Thurai reng tak khe mukmang kowi kowh ang khi-ah akat mih chintak mih Gabriel dow iow se ang tut-e uang khai. Aia uang mih dow iak pra kowh phuchua khin khe chekhai. 22Gabriel tek ang mih, “Daniel, kawmat mih natukla kown mih kür hai prengia nauang pe en kownkow ang uang mih chekhai. 23En uown chup Thurai hown akrowksang Thurai dow klang en khai bowt. Nami satang ang naphuang en kownkow ang uang mih chekhai. Tawngplawng kowchow panow aia dow lainowmma sakrau en khai. Naiawng rakowi en kowh mukmang uan natukla kownkow sünta kaneu diah.

24“En kowh maru-uüa hai en kowh chimsaima mih marow dow 7 ning chi 70 kat1 mowr amatni kowh angak rakowi naka ripra kownkow Thurai khowm bowkta khai bowt. Nami kung kowi dow angak maten narim bowt kown, lup ngak maten nachur bowt kown, now angak paw natakhu bowt kown. Anowm dow chowngchowng saksakma nauowi bowt kown, mukmang hai risiuüa phuangta khowk mih laiklow dow nauang tachi bowt kown, now Lang Chimsai Mih Arah dow nanümnapah bowt kown.

25“En mih mami lawnguan kowi tukah hai tuak kaneu diah. Jerusalem marow naplan raw hai naplan thawp kownkow lawt ana mih hownia kruitown mih Mesia2 uang ting dowi mowr 7 ning chi 7 kat mowr hai 7 ning chi 62 kat mowr naown kown. Jerusalem marow kowi dow tiama hai tap mih naplan thawpah iawk kown. Tawkche nami khin dow lainowmma nakrat kown. 26Now 7 ning chi 62 kat mowr kung kowi dow Mesia kowi maru nasaita kown. Nahanow aia kowh dow tawngpaw nauowi kown nadowi bowt3. Nami kung kowi dow kruitown mih narü lowk ia kown, now aia kowh siphaiuüa dow marow hai chimsaima mih arah napiakta bowk kown. Tawkche nami kruitown mih kowh achur khin dow tuikling mangma iawng nauang ting kown. Naiawng hown piakra hai tasenra dow achur khe pat nauowi rengreng kown. 27Nakhowk khe nami kruitown mih dow ranit ningchow vüi kowi maru sangrum hown natatow sangbowk laitawm kown. Tawkche nami ranit ning takra kowi dow tawncher hai kawmdi uanap mih aia nataingta pe kown. Naiawng krawi piak mih luk kowi kowh khowm bowkta khowk mih ripra uang ting dowi mowr Thurai chup kim kowi dow suiiai kaniaima mih uanh aia natowah kown,” pakhai.