Daniel 7

Daniel mang khi-ah mih kaurawng uaramchak tali chap

1-2Babulawn pren kowi Belsazar uown chowm mang mih ning khe mang lak kowi achap ahuma Daniel khi khai. Mang lak kowi kowh aia khi-ah mih lawnguan dow maiawng aia ruiah khai,

“Uar-e khe mang lak kowi mukuang tali tingnui hownia li uangah hanow sata aiukma mih kowi uang hutah mih ang khi khai. 3Nami khin khe nami sata hownia kaurawng uaramchak aiukma mih uang awr towk tali klüng khai. Naiawngün kaurawng uaramchak dow apowm alang alangma kangowh chekhai. 4Lowk mih dow krangsi powm iawng panow uamu kowh iawng alap uowi chekhai. Ang tang müah reng tak khe aia kowh lap pre buk mih dow thükta pe hanow aia kowi mih krawng kowi awr pe iowngah khai. Nahanow aia dow maru iawng klowng pre chüng hown iowng dawnglawng khai, now aia kowi dow maru saktuak peah khai bowt.

5“Nami kung kowi dow pre kowi kowh kaurawng uaramchak ang plan khi lowk iawk. Nami dow tawm powm iawng. Aia dow purdowng khawk hown iowng dawnglawng khai, now aia nawr kowi dow aia cham makah mih chak hut uowi sum buk chekhai. Aia kowi tek pe mih, ‘Awr rü now en du pat cham cha chaknga diah,’ pakhai.

6“Nami kung kowi paw sum kowi kowh kaurawng uaramchak ang plan khi lowk iawk. Nami dow pri rengchow powm iawng chekhai. Aia kum kowi dow uakling kowh iawng alap uowi tali klüng chekhai, now alu paw uowi tali klüng. Aia kowi dow nachang alow kown mih kür peah khai.

7“Nami kung kowi paw tali kowi kowh kaurawng uaramchak ang plan khi lowk iawk. Nami dow kramra uowima, now kür paw akürma chekhai. Aia kowh iüng dow aiukma kangowh panow lawngha hown kowh thawpah mih kangowh chekhai. Aia kramah mih chak dow naiawngün iüng hown taiah hanow iawnah reng, now ta lat mih dow khawk hown aia thuaah reng chekhai. Nami kaurawng uaramchak dow akeng mih kaurawng uaramchak hown tatu dowi, now anang paw uowi hamüt klüng chekhai. 8Naiawngün nang ang mü reng tak khe naiawngün nang takra hownia achalachow mih nang uang plan awm lowk iawk. Now nami nang sar ria kowi kowh nang prim dow letta pe sum buk khai. Nami achalachow mih nang kowi dow lusa maru kowh mik powm iawng amik uowi chekhai, now tekla bawri lai mih nawr paw uowi lowk chekhai.

9“Nami kung kowi dow mang chowm rah chowmta pre sum buk mih ang khi khai,

now Alawngtangma Mih Lowk Ia1 dow naiawngün mang chowm rah lowk mih kowi chowm phülü khai.

Aia kowh tawnguat dow nang iawng akawma,

now sam paw lapuk iawng akawma chekhai.

Aia kowh mang chowm rah hai mang chowm rah lawngkua khawk ün kowi dow maih lün pluplup chekhai,

10aia pur hownia dow tui talowng phunglung mih iawng maih uang lawt iualua khai.

Aia kowi dow athawng aiawng kramamu-uüa chang pe lup khai,

now aia pur kowi dow maru iun tasawng tasawng iowngla rim khai.

Nami kung kowi dow tara chet mih uown khai bowt,

now ming tang bowih mih lowt khai bowt.

11“Ang tang müah reng tak khe nami achalachow mih nang dow chang bawri reng tak chekhai. Nami tali kowi kowh kaurawng uaramchak kowi saita dowi mowr ang tang müah khai. Aia kowi saita kung kowi aia kowh uak dow lün pluplup mih maih kowi nawmah khai. 12Now akeng mih kaurawng uaramchak sum buk hownia dow nachang alow kown mih kür pawta pe khai bowt. Nachenganchepaw amatni kowi khowm bowkta pe mih akhin mowr dow pe singah reng tak chekhai.

13“Mang lak kowi dow uangnim dawng iawng maru chapa powm iawng uang mih paw ang khi lowk ia khai. Aia dow Alawngtangma Mih Lowk Ia tut-e kowkowi khai, now aia kowi dow nami lawngtang tut-e kowpawla khai. 14Nami maru chapa kowi dow alow, ringkawra hai mangra peah khai. Naiawng aia kowi peah mih dow palusama kowi kowh chen towng chap towng maru aia kowh lai pacham chün lah pakowh chekhai. Aia kowh mangra dow chowngchowng saksakma; nami dow achur uowi dowi chekhai, now aia kowh pren dow katpaw piak kown nadowi bowt chekhai.

Daniel khi-ah mih mang uan

15“Naiawngün ang khita hanow mang lak kowi lainowmma ang tuak krat khai, now ang khita mih lawnguan kowi lainowmma ang kowh saktuak pusa khai. 16Naiawng rakowi mang chowm rah ria kowi kowh iowng miuüa lowk ia tut-e ang kowkowi hanow ang khi-ah mih auan ang kowlünta khai. Nakhowk khe ang khi-ah mih auan dow maiawng aia phuang ang khai: 17‘Naiawngün aiukma kangowh mih kaurawng uaramchak tali klüng mih dow lusa kowi kowh pren powng mang tali ia chekhai. 18Nachenganchepaw achur kowi dow lang kri lang kraing mih Thurai maru-uüa naka pren hanow chowngchowng saksakma nakruitown pren büah kown,’ pakhai.

19“Nami khin khe akeng mih kaurawng uaramchak lak-e alangma panow kramra uowima mih tali kowi kowh kaurawng uaramchak auan ang lüntaah khai. Nami kaurawng uaramchak kowh iüng dow lawngha hown kowh thawpah mih chekhai, now khawkprüm dow kri hown kowh thawpah mih chekhai. Aia kramah mih chak dow naiawngün iüng hown taiah hanow iawnah reng, now ta lat mih dow khawk hown aia thuaah reng chekhai. 20Now nami kaurawng uaramchak kowh anang hamüt klüng mih lawnguan paw ang lüntaah khai. Nami klen kowi achalachow mih nang awr awm lowk now nang prim talet sum buk mih lawnguan paw ang lüntaah khai. Nami nang sar kowi dow amik uowi, now changla bawri mih nawr paw uowi chekhai. Nami dow akeng mih kaurawng uaramchak lak-e iuk chamang lang iuk khai. 21Nami nang dow Thurai maru-uüa kowi kingküaah hanow senah khai, now nowng sumta khai. 22Nachenganchepaw achur kowi dow Thurai maru-uüa kowi nami alawngtangma mih maru tawi tangila se chet pe tara khai. Nami hownia bowt now Thurai maru-uüa mih powng pren khai bowt.

23“Nami kung kowi aia dow maiawng phuang ang khai, ‘Tali klüng kowi kowh achur mih kaurawng uaramchak dow lusa tali chowng khe kowh pren powng mang chekhai. Nami mang kowh pren dow akeng mih pren maten lak-e alangma naown kown, now aia dow palusama kowi nathuaah hanow nadita naknak kown. 24Nami kaurawng uaramchak kowh nang hamüt klüng mih auan dow nami pren kowi mang nauang uowi hamüt ia kown mih chekhai. Naiawngün manguüa kung kowi dow mang narü lowk ia iawk kown. Nami mang dow sum ia mih mang kowi nanowng sumta kown. 25Nami mang dow lang kri lang kraing mih Thurai kowi kingküala mih laiklow natek kown, now Thurai maru-uüa kowi nachang nowng kown. Aia dow khowmta bowkta khowk mih pawi ni hai rirow ün naklingklaita kown mih nakamrüt kown. Aia dow sum ning hown dawnglawng mowr Thurai maru-uüa luk kowi nachang alow kown. 26Nachenganchepaw nami kung kowi dow aia kowi nachet pe tara kown, now aia changla alow mih kür aia kowi napawta pe kown. Now aia kowi dow chowngchowng saksakma vüi asaima napiakta kown. 27Nami kung kowi dow mangra, alow changra hai lusa pren kowi kowh kür maten lang kri lang kraing mih Thurai maru-uüa rut kowi naap pe bowt kown. Lang kri lang kraing mih Thurai kowh pren dow chowngchowng saksakma nauowi kown. Manguüa maten dow Thurai kowh lup nachang pe kown, now Thurai lai nachün büah kown,’ pakhai.

28“Mang kowi kowh ang khi-ah mih dow nami chekhai. Ang Daniel, maiawngün ang krawi tuak hanow lainowmma ang kram khai; ang kowh lumowr khowm müakangma phaw khai. Nachenganchepaw ang kowh mang lawnguan dow mia kowi paw tek pe dowi chekhai, now sak kowi ang matah khai,” pakhai.