Daniel 11

1“Media pren kowi Darius uown chowm mang mih ning khe Mikael kowi natawi khowngah kownkow hai natawi peah kür kownkow ang matia paw kowtawi chekhai,” pahai maru powm iawng mih kramamu tek ang khai.

Tawngphak hai mrawkphak pra kowh manguüa

2Kramamu plan tek ang mih, “Kawmat kowh ang natek en kown mih laiklow dow nauang phaw ngengche kown. Persia pren kowi dow mang sum ia nachowm mang kown. Amatni kung kowi paw mang nauang chowm lowk ia kown. Nami mang dow akeng mih manguüa lak-e nalang kureng kown. Aia dow aia kowh kurengra hown nauang kür ngamlam hanow maru maten kowi kür hown Grisuüa kowi nape senah kown. 3Nami kung kowi dow Gris pren kowi akürma mih mang nauang uowi lowk ia kown. Aia dow kri kraingma hown nakruitown pren kown, now aia nau iawng nachang kown. 4Aia chowm mang kung kowi dow aia kowh pren mih natapiak nak hanow nachowng tali bak kown. Tawkche aia kowh pren bak dow aia kowh chuprek chaprekuüa natawi ka kown nadowi. Nami pren kowi kowh chowm mang mih dow rik chowm mang miuüa iawng nakür kown nadowi. Tawngplawng kowchow panow aia kowh pren dow napiak hanow akeng miuüa kowh nacham chowng kown chekhai.

5“Mrawkphak pra kowh pren mang dow akürma naphaw kown. Tawkche aia kowh siphai lowk ia dow aia lak-e nalang kür ngamlam kown. Aia dow pren aiukma nakruitown lowk kown. 6Pre sum ning kung kowi aia dow tawngphak pra kowh pren mang hown natatow sangbowk laitawm kown. Naiawng rakowi aia dow aia kowh chama hown tawngphak pra kowh mang hown nape tachawngah kown. Tawkche achama mih nami sangbowk laitawm naia town pe kown nadowi. Now tawngphak pra kowh pren mang dow namata kür kown. Naiawng rakowi nami masiuüa, nami masiuüa kowh pa hai aia kowh narma narla kowi maru nasaita pe bowk kown.

7“Nami kung kowi dow nami masiuüa kowh tasin taken miuüa hownia tawngphak pra kowh pren kowi nauang chowm mang lowk ia kown. Nami mang dow tawngphak pra kowh mang siphaiuüa kowi nauang senah hanow kangchawngra kimkrowng akhawtma mih kowi nakowkup kown. Now amatni kowi dow nasenah hanow nanowngta kown. 8Aia dow amatni kowh thuraiuüa, singh hai hua hown kowh thawpah mih arup aren maten napawta pe kown. Nami klen kowi kuh hai tai hown kowh thawpah mih asung khakma mih uanh ün paw napawta pe bowk kown. Nahanow naiawngün uanh maten dow mrawkphak pra kowh pren kowi aia napawla kown. Now pre sum ning mowr dow tawngphak pra kowh mang kowi aia nauang senah kown nadowi. 9Nami kung kowi dow tawngphak pra kowh mang mih mrawkphak pra kowh mang kowi nauang senah kown. Tawkche aia dow sum hanow aia pren kowi nauang plan kown. 10Akung kowi tawngphak pra kowh pren mang chapauüa dow nacham dowk tasen kownkow nakamrüt hanow siphai akawmma nakua nalawmah kown, now dowkla tasen se siphai hawmh hown tuikling mangma lawt khe kowh iawng mrawkphak pra kowh mang kangchawngra kimkrowng akhawtma mih mowr nakowkowi büah kown.

11“Nami khin khe mrawkphak pra kowh mang dow lainowmma nakunmarau hanow tawngphak pra kowh mang kowi nauang dowk tasen kown. Tawngphak pra kowh mang dow siphai akawmma krawi kuala chepaw nasum kown. 12Mrawkphak pra kowh mang dow tawngphak pra kowh siphaiuüa kowi nowng sumta kung kowi lainowmma nachang bawri kown. Now aia dow athawng aiawng ransu kowi nasaita kown. Nachenganchepaw aia dow chur pat naawng kown nadowi. 13Nami kung kowi tawngphak pra kowh mang dow aia rik kuaah mih siphai hawmh lak-e akawmma naplan kua siphai hawmh iawk kown. Now aia dow pre sum ning kung kowi siphai akawmma hai tasen müa uanh ahuma napawla now nakowtarü kown.

14“Nakhowk khe tawngbak mih maru dow mrawkphak pra kowh mang kowi nakingküaah kown. Mami mukmang nauang tachila kownkow en chenchapuüa pungmadawng hownia sak ngakma mih maru-uüa nakingküaah ne kown; tawkche amatni dow nanowng kown nadowi. 15Nami kung kowi dow tawngphak pra kowh mang mih nauangah hanow tap tapat lut mih marow nauang rumta lut kown, now nami marow dow aia napowngta pe kown. Nakhowk khe mrawkphak pra kowh pren siphaiuüa mih tawngphak pra kowh pren kowi nasenah kown nadowi bowt. Amatni kowh tasen lang kiak mih siphaiuüa khowm padow kowbüah kowi naia sen kown nadowi bowt. 16Tawngphak pra kowh mang dow aia nau iawng amatni kowi nachangah kown. Aia kowi dow amiapaw naia kingküa kown nadowi. Aia dow klangiungma mih Israel pren paw napawta kown, now nami pren mih aia krüa kowi natowah kown. 17Tawngphak pra kowh mang dow aia pren paprenma kür hown mrawkphak pra kowh mang tut-e nauang kownkow nakamrüt kown. Now aia dow mrawkphak pra kowh mang hown nauang chang auiua kown. Nami pren napiakta kownkow aia dow aia kowh chama kowi mih mrawkphak pra kowh mang hown nape tachawngah kown. Tawkchedow aia kamrütta iawng nachowng kown nadowi, now marat paw namarat kown nadowi. 18Nami kung kowi dow tawngphak pra kowh mang mih akeng pren prakowi nape ching kown, now aia dow pren ahuma napowngta kown. Tawkche akeng pren siphai lowk ia dow nami mang kowh bawrira mih napiakta pe kown. Now aia kowh prawng renra dow aia luk kowi nauang pe tingah iawk kown. 19Nami kung kowi aia dow aia kowh akhawtma mih kangchawngra kim kowi nauang plan kown. Nachenganchepaw aia dow ransu-uüa rut kowi nakowng kown; aia kowi dow nakhi-ah kown nadowi bowt.

20“Nami kung kowi dow aia takcha kowi mang nauowi lowk ia kown. Nami mang dow pren klangiungra nauang plan pawla iawk kownkow mu kawk miuüa kowi nakrawi chinah kown. Nachenganchepaw aia dow pre sum ning takra kowi nakowng kown. Naiawng aia nakowng kown mih dow kunmaraura hai tasenra hown nadowi chekhai.

Tawngphak pra kowh mang ngak

21“Aia kung kowi kowh nauang ta chowm mang kown mih dow maru ngakma chekhai. Nami maru dow nachowm mang kown mih tataing dowi chekhai. Nachenganchepaw aia dow thaulangma maru uowi mih khin khe limmara hown nakrawi powng pren kown. 22Aia kowi kowh kingküaah mih akürma mih siphaiuüa dow nasum hanow napiak kown, now lang kri lang kraing mih Thurai kowh uamow lang kri mih khowm napiak kown. 23Taking tasangra ki thawp kung kowi nami mang dow nakrawi limma kown. Now aia dow maru tawi tangila pre sum iachow taih chepaw nauang kür ngamlam kown. 24Kurengma mih prenchakuüa thaulangma pahai tatuak mih khin khe aia dow amatni kowi nakowsenah kown. Now apipu-uüa nowng changah dowi mih ün aia dow nachang kown. Kür hown cham rupah mih uanh hai cham khünah mih dawngthawnguan ün dow aia maru-uüa kowi aia naret pe kown. Aia dow akhawtma mih kangchawngra kim ün napiakta kownkow nakamrüt kown. Tawkche nami dow pre sum ni chow vüi chowtaih.

25“Aia dow siphai akawmma pawla now aia kowh kür hai sakkraingra mih mrawkphak pra kowh mang kowi natüng pe kown. Nakhowk khe mrawkphak pra kowh mang dow akürma mih siphai hawmh kowi pawla hanow amatni kowi nauang senah kown. Tawkche lowra iawng amatni sangkrang chepaw aia kowi kingküaah huma rakowi tawngphak pra kowh mang tut-e dow nasum büah kown. 26Aia hownia kowh tawi ka chakkham bak miuüa dow aia kowi napiakah kown. Aia kowh siphai hawmh dow napiak kown, now aia kowh siphaiuüa dow ahuma nakowng kown. 27Nami mang pre ia kowh saktuak dow angak prakowi kangowh chekhai. Naiawng rakowi amatchi dow arasang taiua chowm chepaw lowkkowlowk nata dai iüah kown. Tawkche naiawngün dai lai hown dow tawngpaw naphaw kown nadowi. Tawngplawng kowchow panow khowm bowkta mih akhin khe amatni dow bowkbowk napiak kown.

28“Mrawkphak pra kowh mang dow ahuma napawla dawngthawnguan hanow aia pren prakowi namang kown. Aia mang mih khin khe aia dow Thurai maru-uüa kowh kawngmu napiakta kownkow nasangkrang kown.

29“Aia dow khowmta bowkta mih khin khe mrawkphak pra kowh mang kowi nauang plan senah iawk kown. Tawkche nami leng dow auown khe kowh iawng nadowi kowi alangma naown kown. 30Tawngplawng kowchow panow tasen müa chawnlawng hown aia kowi Kittimuüa nauang sen kown. Nahanow aia kowh sak dow napiak kown. Naiawng rakowi aia dow nakunmarau hanow Thurai maru-uüa kowh kawngmu napiakta kown mih nasangkrang kown. Now Israeluüa pungmadawng hownia Thurai kowh sangbowk laitawm nuata miuüa kowi dow aia napeah awmrawm sung kown. 31Tawngphak pra kowh mang siphaiuüa dow Thurai chup kim nasürlawkta kown, now ni towng kowh phuchua pawi paw nataingta pe büah kown. Nami kung kowi dow maru tasür talawkla pat mih asür alawkma mih uanh Thurai chup kim kowi natow büah kown. 32Aia dow chimsaima mih rirow chün dowi miuüa kowi nasowr pe lai iung hanow aiamat prakowi napakla kown. Tawkche tuk Thurai miuüa dow kür hown aia kowi nahangah kown.

33“Naiawngün maru-uüa pungmadawng kowi chanlai miuüa dow maru kawmuüa kowi natüng nasangah kown. Nachenganchepaw nawngchow vüi kowi amatni pungmadawng hownia nakowng ne kown: Tawngbak mih dow tasenra kowi nakowng ne kown, tawngbak mih kowi dow maih kowi nanawmah kown, tawngbak mih kowi dow thawngrum kowi natowah kown, now tawngbak mih kowi dow narupta pe uanh bowk kown. 34Naiawng nowng chang powng changra uowi mih khin khe naka khowng büah ditchow kown, now amatni hown uang tawi tabawng miuüa dow kowmatia marat müa chowtaih nachang lup kown. 35Chanlai miuüa pungmadawng hownia paw tawngbak mih dow nowng chang powng changra kowi nauowi ne kown. Naiawng rakowi khin chur dowi mowr dow Thurai maru-uüa kowi achangma, achinawmma hai anowmma nachangah kown. Thurai khowm bowkta mih akhin uang ting dowi mowr dow naiawng nauowi kown.

36“Tawngphak pra kowh mang dow aiamat nau iawng nachang lup kown. Aia dow akeng thuraiuüa lak-e lang iuk pahai nachang bawri kown, now akeng thuraiuüa kowh Thurai kowi paw kingküala mih laiklow natek kown. Aia luk kowi kowh khowm bowkta mih Thurai kowh kunmaraura uang ting dowi mowr dow aia mih naiawng nachang reng kown. 37Aia dow aia pipu-uüa kowh thuraiuüa kowi naringkaw kown nadowi, now masiuüa hawmh nauah mih thuraiuüa kowi paw naringkaw kown nadowi. Aia dow tawng iawng mih thurai kowi paw naringkaw kown nadowi. Tawkche maru maten lak-e aia lang kri lang kraing pahai aia mih nachang bawri kown. 38Aia dow naiawngün thuraiuüa kowi lak-e akhawtma mih kangchawngra kim kowi takhula mih thurai kowi nachupiia kown. Aia dow aia pipu-uüa tukah dowi mih nami thurai kowi kuh, tai, asung khakma mih hua hai awmrawm sung hown naring nakawah kown. 39Aia dow akhawtma mih kangchawngra kim ün natowkala kownkow akeng thuraiuüa kowi chup mih prenlang maru-uüa natawngah kown. Aia dow aia kowi nami pren kruitown mih ching pahai chün miuüa kowi ringkawra huma napeah kown; amatni kowi dow chowra lup kowi kowh pankrima mih arah kowi aia natowah kown, now aia kowi amatni ringkawah mih rakowi aia krawi powngah mih pren hownia awmrawm sung iawng hown aia nabak pe bawn kown.

40“Khin chur khe dow mrawkphak pra kowh mang mih tawngphak pra kowh mang kowi nauang senah kown. Nahanow nami tawngphak pra kowh mang dow kawrnga kari, kawrnga luk kowi kowh chowm mih siphaiuüa hai chawnlawng ahuma uang pawla hanow mrawkphak pra kowh mang kowi uangchak iawng nauang senah kown. Naiawng hai tawngphak pra kowh mang dow pren ahuma nakrawi senla kown, now tuikling mangma iawng amatni kowi dow asaima nanawmta kown. 41Aia dow Israel pren klangiungma mih paw nasenla kown. Naiawng hai pren mih ahuma aia napiakta kown. Tawkche Edawmuüa, Moabuüa hai ta lat mih Amawnuüa dow aia rut hownia naplai kown. 42Aia dow pren maten kowi nakrawi chang alow kown, now Aigupta pren paw aia rut hownia naplai kown nadowi. 43Kuh, tai hai Aigupta pren kowi kowh dawngthawnguan maten dow aia napawta pe bowk kown. Now Libiauüa hai Ethiawpiauüa dow aia nimkrüa kowi nauowi kown. 44Tawkche aia dow satlawt hai tawngphak hownia kowh satang tata hanow nakram kown. Now aia dow kunmarauma hown nakrawi piak kownkow hai maru kawmuüa kowi nakrawi sai kownkow nalawt kown. 45Now aia dow sata hai Jerusalem marow klangiungma mih hungh chimsaima mih takra kowi nakhup mang tangbung kown. Nachenganchepaw aia dow nakowng kown; aia kowi dow amiapaw nakhowngah kown nadowi,” pakhai.