Amaws 5

1Aw Israeluüa, enni lawnguan kowi ang tekah mih kar meng sünta büa diah.

2“Israel, en dow malauüa tadowklowt mih iawng;

en dow tim khai bowt.

En dow katpaw nowng rü dowi bowt,

en dow krawng kowi takuak hüah towbowt.

En kowi dow miapaw krüng en kown mih uowi dowi chekhai,” pakhai.

3CHAKRAMANG Thurai tek mih, “Israel kowi kowh marow hownia siphai 1,000 ia cham tarü tasen mih dow 100 iachow taih nauang plan kown,

now akeng mih marow hownia 100 ia cham tarü tasen mih dow hamüt iachow taih nauang plan kown,” pakhai.

Sing kown nau now CHAKRAMANG tut plan diah

4-5Israeluüa kowi CHAKRAMANG tek pe mih,

“Bethel, Gilgal hai Ber-Seba kowi hangkow kowi büah.

Tawngplawng kowchow panow Gilgal kowi kowh maru-uüa dow akeng pren kowi nacham takhang ngengche kown,

now Bethel dow napiak kown chekhai.

Naiawng rakowi ang tut-e uang büa diah;

nahanow enni nasing kown,” pakhai.

6Naiawng rakowi aw Israeluüa, enni nasingla kownkow CHAKRAMANG tut-e kowkowi büa diah.

Naiawng nadowi now maih iawng dow Israeluüa pungmadawng kowi aia nalün kown chekhai.

Nami maih dow nakamta enni bowk kown chekhai;

nami maih dow Bethel kowi miapaw nowng mit kown nadowi.

7Enni dow tara nowm kowi enni piakta khai,

now anowm kowi dow krawng kowi enni kuakah khai.

8CHAKRAMANG dow Rauleng hai Iakleng krek thawp miia chekhai.

Aia dow aiiu kowi anowi thawpah hanow ni kowi uar thawpah khai.

Aia dow sata tui kowi hawah hanow süngkangma kowi khükah khai.

Aia ming dow CHAKRAMANG chekhai.

9Aia dow akürma miuüa luk kowi uang pawla pe piakra reng,

now amatni kowh kim aiukma mih ün amaisang piakta pe reng.

10Angak kowi kingküa mih maru kowi enni suiah khai,

now tara chetra kowi kowh tek lainowm miuüa kowi enni toah khai.

11Ngarawng ngarai miuüa kowi enni changah nowng khai,

now amatni kowh luprak paw kür hown enni paw pe khai.

Naiawng rakowi hua aiuk aiukma mih hown enni thawp kim chepaw enni naka uowiah kown nadowi.

Grep rawng klangiung klangiungma enni ien chepaw enni naka khamah atui kown nadowi.

12Mün khowt chow enni kowh angak hu mih hai mün khowt chow enni kowh aprek kraing mih ang tuk.

Maru iunguüa luk kowi enni chang nowng hai enni cha büm khai.

Ngarawng ngarai miuüa kowi tara chetra kowi tara nowm enni chet pe dowi.

13Naiawng mih khin dow angak khin chekhai.

Naiawng rakowi chanlaima mih maru dow nami khin khe rarimma lang uowi phülü khai.

14Naiawng rakowi enni nasingla kownkow angak prakowi mang dowi kowi aiung prakowi mang büa diah.

Nahanow enni tekah mih iawng lang kri lang kraing mih CHAKRAMANG Thurai natawi uowila enni kown.

15Angak kowi suiah büa diah, now aiung kowi nauah büa diah.

Marow kowi kowh tara chetra kowi tara nowm chetah büah reng diah.

Naiawng che enni chang hanow lang kri lang kraing mih CHAKRAMANG Thurai nasana enni chepaw naia,

Israeluüa pungmadawng kowi kowh ta lat miuüa luk kowi aia nasanaah chepaw naia.

16Lang kri lang kraing mih CHAKRAMANG Thurai tek mih,

“Marow kowi kowh akuangma mih rah maten kowi maru nanguk nakar kown,

now tiama towng kowi naphek kaucha büah kown.

Amatni dow üa lup chang miuüa kowi paw nahawla büah kown,

now nanguk nakar kownkow ngaah miuüa hown nape taiua karah kown.

17Grep krum maten kowi paw enni nanguk nakar kown.

Tawngplawng kowchow panow enni pungmadawng iawng ang nauang len hanow ang nauang rip enni kown chekhai.

Ang CHAKRAMANG mami laiklow ang tek khowk,” pakhai.

CHAKRAMANG kowh ni

18CHAKRAMANG kowh ni khi kown sakkrowng miuüa luk kowi piakra nauang ting kown mih dow kramra uowi lai kowbow!

Tawngplawng kowchow nami ni nakhi kown enni tuk prüa khai?

Nami ni dow ni iung nadowi;

ni ngak chowtaih enni vüi naown kown.

19Nami ni dow maiawng naown kown;

krangsi rut hownia powt now tawm pur kowi cham towm mih iawng naown kown,

now kowmatia kim kimbang kowi tane khe rua chawtah mih iawng naown kown.

20CHAKRAMANG kowh ni dow ni iung nadowi;

nami ni dow ni ngak chowtaih naphaw kown.

Nami ni dow aiung ditchow paw nauowi kown nadowi;

nami ni dow angak churma naown kown.

21CHAKRAMANG tek mih,

“Enni kowh kawngmu pawi ün ang sui, ang nau dowi.

Enni kowh takua talawmra mapaw ang awmrawm dowi chekhai.

22Tikah mih uanap enni uang ap ang chepaw ang nahawt paw enni kown nadowi,

now uih-ak uanap enni uang ap ang chepaw ang hawt paw enni kown nadowi.

Aiuk akauma mih tawncher hown taking tasangra uanap pawi enni chang chepaw naia;

tawkche nami prakowi ngeu khowm ang nangeu enni kown nadowi.

23Enni kowh meng klow rimta prang.

Enni kowh taraw tün ün ang nasünta enni kown nadowi.

24Nami lak-e tara nowm dow aw tui iawng pacham hawr lah,

now lainowm dow achowngma hawr mih tui iawng pacham hawr lah.

25“Aw Israel kowi kowh maru-uüa, süngrüp süngkangma kowi likawm ning enni uowi mih khin khe asadua hai akeng uanap ang kük enni dowi chekhai. 26Tawkche enni matia vüi enni thawpah mih mang Sakut rup hai enni chupah mih krek Kauan rup kowi enni kawtla khai. 27Naiawng rakowi Damaska klen kowi ang nacham sa enni kown, now nakowi mih enni nacham takhang kown. Ang mukuang siphaiuüa kowh CHAKRAMANG Thurai mami laiklow ang tek khowk,” pakhai.