2 Manguüa 15

Juda pren kowi Uzia chowm mang mih

1Juda pren kowi Amazia chapa Uzia chowm mang mih dow Israel pren kowi Jeroboam chowm mang mih 27 ning khe chekhai. 2Uzia dow laitaruk ning khe chowm mang khai. Aia dow 52 ning mowr Jerusalem marow kowi chowmla mang khai. A-u dow Jerusalem marow hownia kowh Jekolia chekhai. 3Uzia dow a-pa Amazia iawng CHAKRAMANG mik kowi aiungma mih lup chang reng chekhai. 4Nachenganchepaw arah kroma mih kowi kowh chupiiara dow aia krawi piakta dowi tak chekhai. Naiawngün arah kowi dow maru kawmuüa mih tawncher hown chang phuchua reng chekhai, now nam iungma mih maikhük paw towk reng chekhai.

5CHAKRAMANG dow mang kowi peah ripra khai. Naiawng rakowi mang kowh dow kowng dowi mowr par rawka uang phaw khai. Aia dow akeng mih kim kowi cham lang uowi khai. Now mang kim dow achapa Jotham mih ta mingkhet khai, now aia dow ta kruitown pren khai.

6Uzia kowh akeng mih lup lawnguan maten dow “Juda Manguüa Lawnguan” pami bowih kowi arui uowi bowk chekhai. 7Akung kowi Uzia dow kowng hanow David marow kowi maru dupah khai. Aia takcha kowi dow achapa Jotham mih ta chowm mang khai.

Israel pren kowi Zekaria chowm mang mih

8Israel pren kowi kowh Samari marow kowi Jeroboam chapa Zekaria chowm mang mih dow Juda pren kowi Uzia chowm mang mih 38 ning khe chekhai. Aia dow taruk la mowr Samari marow kowi chowmla mang khai. 9Zekaria dow apipu-uüa iawng CHAKRAMANG mik kowi angakma mih lup chang khai. Now Nebat chapa Jeroboam changah mih lup ngak dow aia paw chang khai.

10Jabes chapa Salum dow Zekaria kowi nasaita kownkow sangkrang khai, now aia dow Ibleam marow kowi maru kawmuüa pur kowi Zekaria kowi saiah khai. Now Zekaria takcha kowi dow aia ta chowm mang khai. 11Zekaria kowh akeng mih lup lawnguan maten dow “Israel Manguüa Lawnguan” pami bowih kowi arui uowi bowk chekhai. 12Maiawng hai Jehu kowi kowh CHAKRAMANG tek pe mih laiklow dow uang tachih khai bowt. Nakhowk khe kowh CHAKRAMANG tek pe Jehu mih, “En kowh krungchakuüa dow tali chowng mowr Israel pren kowi naka chowm mang kown,” pakhai.

Israel pren kowi Salum chowm mang mih

13Israel pren kowi kowh Samari marow kowi Jabes chapa Salum chowm mang mih dow Juda pren kowi Uzia chowm mang mih 39 ning khe chekhai. Aia dow pala mowr Samari marow kowi chowmla mang khai. 14Nami kung kowi Gadi chapa Menahem dow Tirza marow hownia Samari marow kowi uang khai, now nakowi dow Salum kowi aia saiah khai. Now aia dow Salum takcha kowi ta chowm mang khai. 15Salum kowh akeng mih lup lawnguan maten hai aia kowi kowh kingküaah mih lawnguan dow “Israel Manguüa Lawnguan” pami bowih kowi arui uowi bowk chekhai.

16Nakhowk khe Menahem dow Tirza marow hownia uang lawt hanow Tapua marow, marowchakuüa maten hai aria aret kowi kowh maru-uüa maten kowi senah khai. Now kum nau mih masiuüa hawmh kowh mu paw aia khuekla pe bowk khai. Tawngplawng kowchow panow marowchakuüa dow aia kowi hawt ho pe marow tapplawt dowi chekhai.

Israel pren kowi Menahem chowm mang mih

17Israel pren kowi kowh Samari marow kowi Gadi chapa Menahem chowm mang mih dow Juda pren kowi Uzia chowm mang mih 39 ning khe chekhai. Aia dow hamüt ning mowr Samari marow kowi chowmla mang khai. 18Aia dow CHAKRAMANG mik kowi angakma mih lup chang khai. Now Nebat chapa Jeroboam changah mih lup ngak dow aia paw chang khai. 19Akat khe Asuria pren mang Tiglat-Pileser mih Israel pren kowi uang senah khai. Nakhowk khe Menahem dow Tiglat-Pileser khowngra hownia pren kowi kowh aia kowh mang chowm rah naia uowila reng kownkow Tiglat-Pileser kowi peah tai 875 mawn ngia chekhai. 20Naiawngün tai tangka dow Asuriauüa kowh mang kowi napeah kownkow Israel kowi kowh kurengma miuüa hownia kür hown Menahem krawi pawah mih chekhai. Aia dow lowk ia kowi tai taruk iun chi krawi pawah khai. Naiawng rakowi Asuria pren mang dow Israel pren hownia powt khai.

21Menahem kowh akeng mih lup lawnguan maten dow “Israel Manguüa Lawnguan” pami bowih kowi arui uowi bowk chekhai. 22Menahem kowng kung kowi dow achapa Pekahia mih aia takcha ta chowm mang khai.

Israel pren kowi Pekahia chowm mang mih

23Israel pren kowi kowh Samari marow kowi Menahem chapa Pekahia chowm mang mih dow Juda pren kowi Uzia chowm mang mih 50 ning khe chekhai. Aia dow pre ning mowr Samari marow kowi chowmla mang khai. 24Aia dow CHAKRAMANG mik kowi angakma mih lup chang khai. Now Nebat chapa Jeroboam changah mih lup ngak dow aia paw chang khai. 25Remalia chapa Peka pami aia kowh siphai aluchow lowk ia dow aia kowi nakingküaah kown mih sangkrang khai. Nami aluchow dow Gilead süng hownia pawla maru 50 ia hanow Samari marow kowi mang kim kowi kowh akhawtma mih kim kowi mang Pekahia, Argawb hai Arie büah kowi saiah khai. Now Pekahia takcha kowi dow Peka mih ta chowm mang khai.

26Pekahia kowh akeng mih lup lawnguan maten dow “Israel Manguüa Lawnguan” pami bowih kowi arui uowi bowk chekhai.

Israel pren kowi Peka chowm mang mih

27Israel pren kowi kowh Samari marow kowi Remalia chapa Peka chowm mang mih dow Juda pren kowi Uzia chowm mang mih 52 ning khe chekhai. Aia dow pirmi ning mowr Samari marow kowi chowmla mang khai. 28Peka dow CHAKRAMANG mik kowi angakma mih lup chang khai. Now Nebat chapa Jeroboam changah mih lup ngak dow aia paw chang khai.

29Israel pren kowi Peka chowm mang mih khin khe Asuria pren mang Tiglat-Pileser mih Israeluüa kowi uang plan senah khai iawk. Aia dow Israeluüa kowh Ijawn marow, Abel-Bet-Maka marow, Janoah marow, Kedes marow hai Hazawr marow powngta pe khai. Nami klen kowi Gilead süng, Galili süng hai Naptali süng maten paw aia powngta pe khai. Naiawngün hownia maru kawmuüa kowi khümla hanow Asuria pren kowi aia pawla khai. 30Juda pren kowi Uzia chapa Jotham chowm mang mih pirmi ning khe Ela chapa Hosea dow Peka kowi nasaita kown mih sangkrang hanow saita khai. Now Peka takcha kowi dow Hosea mih ta chowm mang khai.

31Peka kowh akeng mih lup lawnguan maten dow “Israel Manguüa Lawnguan” pami bowih kowi arui uowi bowk chekhai.

Juda pren kowi Jotham chowm mang mih

32Juda pren kowi Uzia chapa Jotham chowm mang mih dow Israel pren kowi Remalia chapa Peka chowm mang mih pre ning khe chekhai. 33Jotham dow 25 ning khe chowm mang khai. Aia dow laitaruk ning mowr Jerusalem marow kowi chowmla mang khai. A-u dow Zadawk kowh chama Jerusa chekhai. 34Jotham dow a-pa Uzia iawng CHAKRAMANG mik kowi aiungma mih lup chang reng chekhai. 35Nachenganchepaw arah kroma mih kowi kowh chupiiara dow aia krawi piakta dowi tak chekhai. Naiawngün arah kowi dow maru kawmuüa mih tawncher hown chang phuchua reng chekhai, now nam iungma mih maikhük paw towk reng chekhai. Aia dow CHAKRAMANG kim kowi kowh alowngma mih tapplawt thawp mih chekhai.

36Jotham kowh akeng mih lup lawnguan maten dow “Juda Manguüa Lawnguan” pami bowih kowi arui uowi bowk chekhai. 37Nami khin khe CHAKRAMANG dow Juda pren kowi nakowsenah kownkow Asuria pren mang Rezin hai Israel pren mang Peka iüah kowi kowuown chinah khai. 38Akung kowi Jotham dow kowng hanow David marow kowi maru dupah khai. Aia takcha kowi dow achapa Ahaz mih ta chowm mang khai.