2 Krungchakuüa 26

Juda pren kowi Uzia chowm mang mih

1Juda pren kowi kowh maru maten dow Amazia takcha achapa Uzia kowi ta pe chowmah mang khai. Nakhowk khe Uzia dow laitaruk ning chekhai. 2A-pa Amazia kowng kung kowi dow Uzia mih Elat marow plan ta powngta khai iawk, now nami marow mih aia plan thawpah khai.

3Uzia chowm mang mih dow laitaruk ning khe chekhai. Aia dow 52 ning mowr Jerusalem marow kowi chowmla mang khai. A-u dow Jerusalem marow hownia kowh Jekolia chekhai. 4Uzia dow a-pa Amazia iawng CHAKRAMANG mik kowi aiungma mih lup chang reng chekhai. 5Nami khin khe kowh uamow hai mang kowh prengia pek mih dow Zekaria chekhai. Zekaria sing uowi mowr Uzia dow Thurai nau iawng chang reng chekhai. Tawngplawng kowchow panow Thurai kowi ringkaw krang mih aia kowi Zekaria tüngsangah reng chekhai. Thurai nau iawng Uzia chang mowr dow Thurai paw aia kowi peah iungra khai.

6Uzia dow Filistinuüa kowi kowsenah khai. Now Gat marow tap, Jabne marow tap hai Asdawd marow tap dow aia piakta pe khai. Nami kung kowi dow Asdawd marow ria hai Filistinuüa kowh akeng mih arah kowi tap uowi mih marow aia krawi thawp khai. 7Filistinuüa, Gur-Bal marow kowi kowh Arabuüa hai Meuniuüa hown aia tasen mih khin khe aia kowi Thurai tawi khowngah khai. 8Amawnuüa dow aia kowi peah mangmu reng chekhai. Naiawng hai Uzia dow uang kür ngamlam khai. Naiawng rakowi aia kowh ming iung nang iung mih Aigupta pren kowi pat cham tahowng khai.

9Uzia dow Jerusalem marow kowi kowh Anui tapplawt kowi, Lawngrawi tapplawt kowi hai tap nui kowi thawp kimkrowng khai. 10Aia dow süngrüp süngkangma kowi paw kimkrowng krawi thawp khai, now tuikuam paw ahuma aia krawi thai khai. Tawngplawng kowchow panow awkaw süng hai anaima mih süng kowi aia kowh tawncher thing uowi ahuma chekhai. Aia dow kheti bakan hai uih-ien pantawn chang kowi aklumma chekhai. Naiawng rakowi aia dow aia kowh maru-uüa kowi aiamat kowh asi uowi mih krawng kowi pe changah lup khai, now aiamat kowh hungh kowi dow pe changah grep krum khai.

11Uzia kowh dow tasen kiakma mih siphai thum aiukma uowi chekhai. Amatni dow pathum pathumchow cham tasen kown mih kamrüt taiama chekhai. Naiawngün siphaiuüa mut mih hai pathum pathumchow bak mih dow Jeiel hai Maseia iüah chekhai. Amatni luk kowi kowh siphai aluchow dow Hanani chekhai. 12Naiawngün siphaiuüa pungmadawng kowi dow aluchowuüa uowi 2,600 ia chekhai. 13Now tasen kiakma mih siphaiuüa mut dow bowkbowk kowi 307,500 ia chekhai. Naiawngün akürma mih siphai hawmh dow mang cham sen ransu-uüa khe aia kowi lainowmma tawi khowngah reng chekhai.

14Uzia dow siphaiuüa maten kowi kawngma, reh, akhawtma mih lukruk, kow taka müa kowrmow, leba hai iaiba ap müa hua peah reng chekhai. 15Jerusalem marow kowi kowh akiakma mih uanh thawp sarauüa thawpah mih tasen müa rutchün khawkleng dow kimkrowng kowi hai tap nui towng kowi aia krawi towah khai. Nakowi aia krawi towah mih auan dow nami hownia leba hown nahawt ia apla kownkow hai aiuk aiukma mih huaklu hown nahawt ia kuakla kownkow chekhai. Aia kowh ming iung nang iung dow alakma mih pren mowr cham tahowng khai. Tawngplawng kowchow panow aia kowi dow lainowmma CHAKRAMANG khowngah khai, now aia dow uang kür ngamlam khai.

Chang bawri rakowi Uzia ka ripra mih

16Nachenganchepaw aia dow uang kür ngamlam hanow chang bawri khai bowt. Naiawng rakowi aia luk kowi dow piakra uang towm khai. Pakat dow aiamat ngengche maikhük towk rah phuchuara luk kowi kowh nam iungma mih maikhük natowk kownkow CHAKRAMANG kim kowi kowkup khai, now naiawng hai aia dow CHAKRAMANG aia kowh Thurai kowi kingküala mih angak changta khai. 17Uamow lang kri mih Azaria hai sakkraingma mih uamow 80 ia dow aia kung tawi hanow alak kowi kowkup büah khai. 18Nakhowk khe hangah se amatni tek pe mang mih, “Mangkri, CHAKRAMANG vüi nam iungma mih maikhük natowk kown mih alow en kowh uowi dowi. Nam iungma mih maikhük natowk kown mih alow uowi mih dow Arawn krungchakuüa hownia lang kraah mih uamowuüa krowngchow taih. Mami chimsaima mih arah hownia lawt diah, en changta ngak khai bowt. Naiawng rakowi CHAKRAMANG Thurai kowh prasi en naka kown nadowi bowt,” pabüah khai.

19Nakhowk khe Uzia dow CHAKRAMANG kim kowi kowh nam iungma mih maikhük towk müa phuchuara pur kowi chekhai, now aia rut kowi dow maikhük towk müa puh uowi lowk chekhai. Aia dow uamowuüa kowi lainowmma kunmarauah khai, now nakhowk khe linlanma aia kaubeng kowi pik rawka ngak uang phaw khai. 20Uamow lang kri mih Azaria hai akeng mih uamowuüa dow aia prakowi haimü hanow kaubeng kowi kowh pik rawka ngak dow khita khai. Naiawng rakowi amatni mih aia kowi alenma lawtta khai. Now aiamat paw lenlenma lawt khai. Tawngplawng kowchow panow CHAKRAMANG ripah mih dow aiamat tatuk khai bowt.

21Mang Uzia kowh pik rawka ngak dow aia kowng dowi mowr uowi khai. Aia dow akeng kim kowi aia malowkchow lang uowi khai, now CHAKRAMANG kim kowi aia kowi dow mapaw pe kowiah dowi bowt chekhai. Now mang kim dow achapa Jotham mih ta mingkhet khai, now aia dow ta kruitown pren khai.

22Uzia kowh akeng mih lup lawnguan maten auown hownia achur pat rui mih dow Amawz chapa risi Isai chekhai. 23Akung kowi Uzia dow kowng khai bowt. Aia kowi dow manguüa chengrawng ria kowi kowh dowm kowi maru dupah khai. Tawngplawng kowchow panow maru kawmuüa tek mih, “Aia kowh pik rawka ngak uowi,” pakhai. Aia takcha kowi dow achapa Jotham mih ta chowm mang khai.