2 Krungchakuüa 19

Jehosafat kowh atawi

1Juda pren mang Jehosafat dow Jerusalem marow kowi kowh aia kim kowi aiungma uang plan khai. 2Nakhowk khe Hanani chapa risi Jehu dow uang lawt hanow aia tut-e uang khai. Now Jehosafat kowi tek pe mih, “Maru ngakuüa hai CHAKRAMANG kowi sui miuüa kowi tawngplawng kowchow en tuk sakrauah khai? Naiawng en chang rakowi CHAKRAMANG mih lainowmma kunmarau en khai bowt. 3Tawkche lup iung paw en changla ne khai. Pren kowi kowh maru kawmuüa chupiiaah mih Asera limpu dow en piakta khai, now Thurai kowi nacham kown mih en towsak khai,” pakhai.

Jehosafat tow tara chet miuüa mih

4Jehosafat dow Jerusalem marow kowi uowi khai. Tawkche aia dow Ber-Seba hownia Efraim süng mowr mih maru-uüa pungmadawng kowi krawi kowi reng chekhai. Now CHAKRAMANG amatni pipu-uüa kowh Thurai prakowi nauang plan kown mih maru kawmuüa kowi aia krawi tek pe reng chekhai.

5Juda pren kowi kowh tap uowi mih marow maten kowi dow tara chet miuüa kowi aia krawi tow pe khai. 6Tara chet miuüa kowi aia tek pe mih, “Tara chetra kowi aiung angak naphuang kown chowbowt khe kaneu büa diah . Tawngplawng kowchow panow nachet tara kownkow lusa maru tow enni mih nadowi, CHAKRAMANG tow enni mih chekhai. Tara chetra kowi aiung angak laiklow phuang mih khin khe CHAKRAMANG tawi uowila enni reng kown taih. 7CHAKRAMANG kowi kramah büa diah, now tara mih kaneuma chetah büa diah. Tawngplawng kowchow panow CHAKRAMANG a-i kowh Thurai dow lup ngak kowi nowng mü dowi chekhai. Aia dow amia iawng mih pra paw lang tangila rowt dowi, now cha büm cha sua dowi chekhai,” pakhai.

8Jehosafat dow Jerusalem kowi nachet tara kownkow uamowuüa, Leviuüa hai Israel krungchakuüa kowh aluchowuüa kowi towah khai. Naiawngünuüa kowh lup dow CHAKRAMANG kowh rirow tawita mata khe nachet tara kown mih hai takhowk taran khe nachet tara kown mih chekhai. 9Amatni kowi aia tek pe mih, “Enni kowh lup mih CHAKRAMANG kowi ringkawma hown, kaah sakowmma hown, now saktuak maiow hown enni nachang kown takla. 10Enni Israel tainau-uüa dow tasai mih lawnguan kowi lah, now CHAKRAMANG kowh rirow, ana pek, alow pek hai ari aiang lawnguan kowi lah enni tut-e nauang chet tara kown. Nakhowk khe amatni mih tek dai lai hown CHAKRAMANG kowi kingküala mih lup nachang büah dowi kownkow tek pe kaneu diah. Tawngplawng kowchow panow naiawng che amatni chang khai hanow enni hai amatni luk kowi CHAKRAMANG kowh kunmaraura nauang ting kown chekhai. Tawkche naiawng che enni chang khai hanow enni kowh aprek nauowi kown nadowi.

11“Kawngmu lawnguan kowi kowh tara chetra kowi aiung angak laiklow naphuang enni kown mih dow uamow lang kri mih Amaria, now akeng mih lawnguan maten kowi kowh tara chetra kowi aiung angak laiklow naphuang kown mih dow Ismael chapa Zebadia chekhai. Zebadia dow Juda krungchakuüa kowh aluchow chekhai. Tara chet kowi kowh phuangta mih iawng nachang lup kown mih kowi Leviuüa mih natawi khowng enni kown. Enni mih sakkhawtma hown chang lup diah. Lup nowm chang miuüa tut-e dow CHAKRAMANG pacham tawi uowi reng lah,” pakhai.