2 Krungchakuüa 16

Judauüa kowi Israel mang Basa senah mih

1Juda pren kowi Asa chowm mang mih 36 ning khe Israel pren mang Basa mih Judauüa kowi kowsenah hanow Rama marow mih kowpowngta pe khai. Now aia dow Rama marow kowi Judauüa ia kup lawtla dowi kownkow aia kowh siphaiuüa kowi towah khai. 2Naiawng rakowi Asa mih aia kim kowi kowh hai Thurai chup kim kowi kowh kuh hai tai pawah hanow aia kowh maru iuk rut kowi peah khai, now Siria pren mang Ben-Hadad tut-e kowchinah khai. Nakhowk khe Ben-Hadad uowi mih dow Damaska marow kowi chekhai. Ben-Hadad kowi Asa krawi tek pe mih, 3“Chu, apa hai en pa iüah iawng achi paw tatow sangbowk laitawm diah sik. Naiawngün kuh hai tai dow awmrawm sung iawng hai ang krawi sa en mih chekhai. Israel pren mang Basa hown kowh en tatowah mih sangbowk laitawm kawmat piakta diah, nahanow aia dow ang hownia napowt kown towbowt,” pakhai.

4Juda pren mang Asa kowh laiklow tata hanow Ben-Hadad dow nauta khai. Now aia dow aia kowh siphai aluchowuüa kowi Israeluüa kowi nakrawi sen kownkow krawi chinah khai. Nami khin khe amatni dow Ijawn marow, Dan marow, Abel-Bet-Maka marow hai Naptali süng kowi kowh chakkham krümra marow maten krawi powngta khai. 5Nami satang tata hanow Israel mang Basa mih Rama marow kowi akhawtma nachangah kown mih lup taingta khai bowt. 6Nami kung kowi dow Rama marow akhawtma changla kownkow Basa tawngah mih hua hai singh nakowkawt kown mih Juda prenchakuüa maten kowi Asa peah ana khai. Now naiawngün singh hai hua maten hown Asa mih Mizpa kua hai Benjamin süng kowi kowh Geba marow akhawtma changah khai.

Juda pren mang Asa kowi risi Hanani tüng pe atawi mih

7Nami khin khe risi Hanani mih Juda pren mang Asa tut-e uangah now tek pe mih, “CHAKRAMANG en kowh Thurai luk kowi en neplawng nesak dowi kowi Siria pren mang luk kowi en neplawng nesak khai. Naiawng rakowi Siria siphaiuüa mih en hownia nowng powt khai. 8Ethiawpiauüa hai Libiauüa kowh kawrnga kari hai kawrnga kowi kowh chowm mih siphaiuüa akawmma nadowi bow? Nachenganchepaw CHAKRAMANG luk kowi en neplawng nesak rakowi naiawngün siphaiuüa kowi en rut kowi CHAKRAMANG ap en khai. 9Lusa kowi lowra mih re-e cham uowi chepaw aia kowi ringkawah miuüa kowi dow CHAKRAMANG peah kür reng chekhai. En dow bualama mih maru iawng en chang lup khai. Naiawng rakowi kawmat hownia dow ransu-uüa hown atungma en natasen reng kown towbowt,” pakhai. 10Nami laiklow tata hanow Asa dow risi Hanani luk kowi lainowmma kunmarau khai. Naiawng rakowi aia dow risi Hanani kowi towah thawng khai. Nami klen kowi aia dow aia maru-uüa kowi paw mapaw sana dowi kowi changah nowng ne khai.

Mang Asa kowng mih

11Asa kowh akeng mih lup lawnguan dow auown hownia achur pat “Juda hai Israel Manguüa Lawnguan” pami bowih kowi arui uowi bowk chekhai. 12Aia kowh dow aia chowm mang mih 39 ning khe khawk kowi rawka phaw pachap chekhai. Nami rawka dow lainowmma nga chepaw aia mih CHAKRAMANG tut-e lü khowng dowi kowi daktawruüa tut-e taraw khai. 13Akung kowi dow aia chowm mang mih 41 ning khe aia mih kowng khai bowt. 14Now paingbawng nam iungma mih achap huma tow pe mih tadupra puk kowi aia kowh uak dow maru towah khai. Now David marow kowi aia kowh tadupra aia thawpla mih kowi aia kowh uak dow maru dupah khai. Now aia kowi ringkawah mih amat müa maih ahuma maru towk pe khai.