2 Krungchakuüa 14

Juda pren kowi Asa chowm mang mih

1Akung kowi Abija dow kowng hanow David marow kowi maru dupah khai. Aia takcha kowi dow achapa Asa mih ta chowm mang khai. Asa chowm mang mih khin khe hamüt ning mowr dow Juda pren kowi thaulangma chekhai.

2Asa dow CHAKRAMANG mik kowi aiungma mih lup chang reng chekhai. 3Aia dow prenlang arup aren phuchuara ün, arah kroma mih kowi kowh chupiiara hai changla phuchua mih hua ün aia krawi piakta khai, now Asera limpu ün paw aia krawi kripta khai. 4Now Judauüa kowi aia tek pe mih, “CHAKRAMANG enni pipu-uüa kowh Thurai kowi cham büa diah, now aia kowh ari arow hai aia kowh ana pek mih chün büa diah,” pakhai. 5Juda pren kowi kowh marow towng kowi arah kroma mih kowi kowh chupiiara hai maikhük towk müa phuchuara ün aia krawi piakta khai. Now Juda pren dow aia nimkrüa kowi thaulangma chekhai. 6Asa chowm mang mih khin khe Judauüa kowi dow Thurai peah prasi rakowi amatni mih thaulangma uowi khai. Naiawng rakowi aia dow Judauüa kowh marow mih krawi rawah khai.

7Judauüa kowi aia tek pe mih, “Chu, a-i thawp marow hai ariaret kowi a-i krawi thawp tap diah sik. Now nami tap kowi kimkrowng, tapplawt hai aklia müa akhawtma thawpah diah sik. Tawngplawng kowchow panow CHAKRAMANG a-i kowh Thurai nau iawng a-i chang reng chekhai, now aia dow ransu-uüa maten hownia pe a-i thaulangra khai,” pakhai. Naiawng hai amatni dow naiawngün lup chang mih krawi churta khai.

8Juda krungchak hownia mang Asa kowh kawngma iuk dowk mih hai reh dowk mih siphai dow 300,000 ia chekhai, now Benjamin krungchak hownia kawngma hai leba dowk mih siphai dow 280,000 ia chekhai. Naiawngün siphaiuüa dow tasen kiakma kangowh chekhai.

Ethiawpiauüa kowi Judauüa senah mih

9Nami kung kowi Ethiawpia pren hownia Zera dow Judauüa kowi nauang senah kownkow siphai 1,000,000 ia hai kawrnga kari 300 klüng hown Maresa marow mowr uang büah khai. 10Now mang Asa paw aia kowh siphaiuüa hown nakowdowk tasen kownkow kowtarü khai. Nahanow pre thumchak maru-uüa dow nadowk tasen kownkow Maresa marow re-e kowh Zefatha lawngrawi kowi kamrüt büah khai.

11Nami khin khe Asa chup Thurai mih, “Aw CHAKRAMANG, akürma mih maru rut hownia kür uowi dowi mih maru kowi nowng khowng mih dow en chowtaih. En klen kowi dow miapaw nowng khowng mih uowi dowi bowt. Aw CHAKRAMANG anging kowh Thurai, khowng anging diah. Anging dow en luk kowi neplawng nesak reng chekhai, now en ming hown nadowk tasen kownkow anging uang mih chekhai. Aw CHAKRAMANG anging kowh Thurai, mia iawng mih maru kowi en luk kowi hangkow pe awngah diah,” pakhai.

12Nakhowk khe CHAKRAMANG dow Asa hai Judauüa tut-e Ethiawpia siphaiuüa kowi pe sumah khai. Nahanow Ethiawpiauüa dow Judauüa hownia powt büah khai. 13Nakhowk khe Asa hai aia kowh siphai hawmuüa dow Ethiawpia siphaiuüa kowi Gerar marow mowr kawikrawiah khai, now Ethiawpiauüa kowi dow ahuma saiah khai. Naiawng rakowi Ethiawpiauüa dow nadowkla tasen kown mih kür hing uowi dowi bowt chekhai. Amatni dow CHAKRAMANG hai aia kowh siphaiuüa pur kowi hing chum khai. Nahanow Judauüa dow amatni kala mih uanh ahuma uang pawla khai. 14Judauüa dow Gerar marow riaret kowi kowh kua uowi mih maten krawi nowng piakta bowk khai. Tawngplawng kowchow panow Gerar marow riaret kowi kowh kuachakuüa dow CHAKRAMANG kowi lainowmma kram khai. Now nami kua kowi dow napawah kown mih dawngthawnguan ahuma uowi khai. Naiawng rakowi amatni dow nami kua hownia ahuma dawngthawnguan uang pawla khai. 15Nami klen kowi tawncher thing miuüa kowh tangbung paw piakta pe bowk khai, now amatni kowh ruapur hawmh, rua hawmh hai ut hawmh mih ahuma uang pawla pe khai. Nami kung kowi amatni dow Jerusalem kowi uang plan büah khai.