1 Samuel 6

Filistinuüa uang plan sata sangbowk laitawm tawkpla mih

1CHAKRAMANG kowh sangbowk laitawm tawkpla dow ranit la mowr Filistinuüa pren kowi uowi khai. 2Akung kowi Filistinuüa mih uamowuüa hai hawra sarauüa kowi hawah khai. Now lüntaah büah mih, “CHAKRAMANG kowh sangbowk laitawm tawkpla hown tawng chow anging changla kown? Sam tek anging madiah, mami kowi aia uowi rah kowi anging nasaah kown mih tawng chow anging napawla pe kown?” pabüah khai.

3Nakhowk khe uamowuüa hai hawra sarauüa tek pe mih, “Enni che Israeluüa kowh Thurai kowh sangbowk laitawm tawkpla nasata kown now akhawma hangkow sa büah. Enni kowh aprek sung uanap vüi kowi enni nakrawi sa pe uanh ngengche kown takla. Nahanow enni kowh rawka paw naiung kown towbowt, now tawng rakowi chow aia rip enni rengreng mih paw enni natuk kown towbowt,” pabüah khai.

4Nakhowk khe Filistinuüa lüntaah mih, “Aprek sung uanap vüi tawng chow anging nakrawi sa pe kown?” pabüah khai. Now uamowuüa hai hawra sarauüa tek pe mih, “Filistinuüa kowh kruitown mih enni uowi tanga ia chedow kuh hown kowh thawpah mih thuaik rup tanga klüng, now kuh hown kowh thawpah mih utmow rup tanga klüng krawi sa pe büah bowt. Tawngplawng kowchow panow enni hai enni kowh kruitown miuüa luk kowi kowh thuaik uang phaw mih dow katsang chekhai. 5Naiawng rakowi enni buk kowi kowh phaw mih thuaik rup hai piak enni pren mih utmow rup thawpah büa diah, now Israeluüa kowh Thurai kowi rowsiah büa diah. Nahanow enni hai enni kowh thuraiuüa hown enni kowh pren luk kowi aia uang pawla mih ripra dow aia nahenta enni chepaw naia kown. 6Tawngplawng kowchow Faraw hai Aigupta maru-uüa iawng saktuak akhawtma enni lang changah rereng? Amatni kowi Israeluüa kowh Thurai ripah khowk khe amatni mih Israeluüa kowi alawt nadowi bow takla?

7“Kawmat mih thawp kari sar büah lowk diah. Now achah kham iawn reng tak mih chiama cham paw büah pre pum diah. Nami chiama dow katpaw thawnla laih dowi tak mih naown kown takla. Nami chiama pre pum mih kowi dow pe küngah kari büa diah. Tawkche achah kowi dow chia rum kowi takhuowkla büa diah. 8Nami kung kowi dow CHAKRAMANG kowh sangbowk laitawm tawkpla mih nami kari luk kowi towah büa diah. Now aprek sung uanap vüi kowi kowh enni krawi sa pe mih kuh uanh dow thawp pe atowk rah tawkpla lowk hanow nami kowi towah büa diah. Now nami kuh uanh towk rah tawkpla dow CHAKRAMANG kowh sangbowk laitawm tawkpla re-e towah diah. Naiawng hai nami sangbowk laitawm tawkpla dow enni nasaah kown. 9Tawkchedow pela pe ching büah kaneu. Sangbowk laitawm tawkpla küng mih chia che amatni pren kowi kowh Bet-Semes marow prakowi mang khai hanow a-i luk kowi kowh uang kla mih kramra uowima mih hawi dow CHAKRAMANG uang pawla a-i mih chekhai pami tukah büa diah. Nachenganchepaw nami chia che Bet-Semes marow prakowi mang dowi hanow a-i luk kowi kowh uang ting mih hawi dow akeng hownia kowh taih; CHAKRAMANG hownia kowh nadowi pami a-i natukah kown,” pape khai.

Bet-Semes marow kowi sangbowk laitawm tawkpla kowting mih

10Naiawng rakowi Filistinuüa dow uamowuüa hai hawra sarauüa tek iawng rowprowp chang büah khai bowt. Amatni dow uang pawla chiama pre pum hanow khuowk pe kari khai, now chia chah kowi dow chia rum kowi ta towla büah hüah khai. 11Nami kung kowi dow CHAKRAMANG kowh sangbowk laitawm tawkpla mih nami kari luk kowi towah büah khai bowt, now nami ria kowi dow kuh hown kowh thawpah mih thuaik rup hai kuh hown kowh thawpah mih utmow rup towk rah tawkpla tow pe büah khai. 12Nakhowk khe nami chiama pre pum mih dow hawmlawm lakuai prakowi cham tapleng dowi kowi pula bawlaw se Bet-Semes pra kowh tiama rowkrowk mang khai. Now Filistinuüa kowh kruitown miuüa dow nami kari kung kowi Bet-Semes rihi mowr krawi ta mang khai.

13Nami khin khe Bet-Semes marowchakuüa dow lawngrawi kowi hawt ngen püm thüm chekhai. Amatni dow haitang mü pache haikhita sangbowk laitawm tawkpla büah khai, now lainowmma piaw büah khai. 14Bet-Semes süng kowi uang ting hanow nami kari dow Josua pami maru lowk ia kowh laih kowi kowh huaklu aiukma mih re-e uang tanai khai. Now Israeluüa dow thawpla kari mih singh nachangla phuchua müa sawp kownkow pawah büah khai, now chiama pre pum trui dow CHAKRAMANG vüi tikah mih uanap changla büah khai. 15Nami dowi rawn khe Leviuüa mih CHAKRAMANG kowh sangbowk laitawm tawkpla hai towla kuh uanh mih tawkpla klaah now huaklu aiukma mih luk kowi towah khai. Nami ni khe Bet-Semes marowchakuüa dow CHAKRAMANG vüi tikah mih uanap hai akeng mih uanap chang büah khai. 16Now Filistinuüa kowh kruitown mih tanga ia dow Israeluüa chang mih srui müla now nami ni khe Ekrawn marow kowi kutplan mang büah khai.

17Filistinuüa mih nachangla aprek lawt müa uanap kownkow CHAKRAMANG vüi kuh hown kowh thuaik rup krawi sa pe tanga klüng khai. Naiawngün thuaik rup krawi sa mih dow Asdawd, Gaza, Askelawn, Gat hai Ekrawn marow kowi kowh aluchowuüa chekhai. 18Now Filistinuüa kowh kruitown mih tanga ia kowh tap uowi mih marow tanga klüng hai naiawngün marow riaret kowi kowh tap uowi dowi mih kua maten takcha kowi Filistinuüa mih kuh hown kowh thawpah mih utmow rup krawi sa pe khai. Bet-Semes marow kowi kowh Josua laih kowi huaklu aiukma mih uowi lowk. CHAKRAMANG kowh sangbowk laitawm tawkpla uang plan khe kari hownia klaah now towah mih dow nami huaklu luk kowi chekhai. Nami huaklu dow kawmat pat nakowi uowi reng tak chekhai.

Kiriat-Jearim kowi pawla sangbowk laitawm tawkpla mih

19Tawkche Bet-Semes marowchakuüa mih CHAKRAMANG kowh sangbowk laitawm tawkpla lak kowi kowruata khai rakowi CHAKRAMANG mih amatni kowi saiah khai. Nakhowk khe nakowi kowh maru-uüa kowi dow bowkbowk kowi 50,070 ia mowr CHAKRAMANG saita khai. Naiawng CHAKRAMANG saiah khai rakowi maru kawmuüa dow lainowmma kar büah nguk büah khai. 20Amatni dow tatek mih, “Naiawng khowt chimsai mih CHAKRAMANG Thurai pur kowi mia chow nakham kown chow? Mami sangbowk laitawm tawkpla kowi kawmat dow mami hownia mia tut-e chow a-i cham saah bowt kown?” pabüah khai.

21Nami kung kowi dow amatni mih Kiriat-Jearim marowchakuüa kowi maiawng nakowtek pe kownkow kowchin maru pre sum ia khai, “CHAKRAMANG kowh sangbowk laitawm tawkpla mih Filistinuüa uang sata khowk. Uangah büah now mami CHAKRAMANG kowh sangbowk laitawm tawkpla mih uang pawta büah bowt,” pakhai.