1 Manguüa 6

Sawlawmawn thawp Thurai chup kim mih

1Aigupta pren hownia Israeluüa uang lawt mih kung kowi 480 ning khe Sawlawmawn mih uown thawp CHAKRAMANG chup kim khai. Nami dow Israeluüa luk kowi aia chowm mang mih tali ning nga kowi kowh pre la khe chekhai. Nami dow Ziv la chekhai.

2Mang Sawlawmawn changah mih CHAKRAMANG chup kim dow areng aklang 60 muk, adowng phia 20 muk, now akro 30 muk chekhai. 3Thurai chup kim kowi kowh towklak lang iuk mih pur kowi kowh kimpuk dow kim downg phia hown katsang chekhai, now areng klang dow hamüt muk chekhai. 4Now nami Thurai chup kim kowi dow aia thawpla pe tawngpawk hanow tow pe lawngha lawkrachow khai. 5Now Thurai chup kim uat prakowi areng pre pra trui hai akhung pra kowh bang chawnah hanow thawp pe sum krowng kim lowk khai. Nami sum krowng kim kowi dow towklak huma aia thawp pe khai. 6Adak krowng kowi kowh towklak iuk dow tanga muk chi, pre krowng kowi kowh towklak iuk dow taruk muk chi, now sum krowng kowi kowh towklak iuk dow ranit muk chi chekhai. Now nami kimkrowng vüi kowi kowh klowng maten Thurai chup kim lak pra akrua naklala dowi kownkow prang hownia abang kowi thawp pe klowng tang müa khai.

7Thurai chup kim chang müa kowi kowh tawngah mih hua maten dow cham huila prowng kowh uang pawla mih hua kangowh chekhai. Naiawng rakowi thawp Thurai chup kim mih khin khe matul, marek hai tawng iawng mih lawngha rutchün khawkleng tünteu taah dowi chekhai.

8Adak krowng kowi kupla kown mih aplawt dow Thurai chup kim mrawkphak prakowi chekhai. Nami hownia pre krowng hai sum krowng kowi awr pünla kown mih dow thawp pe dawngbowk khai. 9Naiawng hai aia dow Thurai chup kim mih thawpah khai, now chur paw aia ia churta khai. Kimluk dow sidar singh phen hown klowng luk kowi aia iu lukah khai. 10Nami sum krowng kim kowi mih towklak ahuma aia thawpla khai. Naiawngün towklak dow akro tanga muk chi chekhai, now akrowng towng kowi sidar singh hown kowh klowng dow Thurai chup kim akhung pra kowh bang hown tachawn khai.

11Sawlawmawn kowi CHAKRAMANG tek pe mih, 12“En che ang kowh alow pek iawng mang khai, ang kowh rirow maten chün hai ang kowh ana pek maten chün khai hanow en thawpah mih CHAKRAMANG chup kim lawnguan kowi en pa David tut-e kowh ang takhamta iawng ang nachang en kown. 13Now Israeluüa pungmadawng kowi ang natawi uowi kown, now ang kowh maru Israeluüa kowi katpaw ang napowtta kown nadowk,” pakhai.

14Sawlawmawn mih CHAKRAMANG chup kim uown chang hanow naiawng hai churta khai bowt. 15Aia dow kimphai hownia kimluk mowr kim lak pra kowh kimbang maten kowi sidar singh hown kowh phen hown krawi pingah khai, now kimphai maten kowi dow karpowng singh hown kowh phen hown aia krawi phaiah khai. 16Now nami Thurai chup kim lak kowi dow Lang Chimsai mih towklak paw aia thawpla pe lowk khai. Nami towklak dow Thurai chup kim akhung pra kowh downg kowi chekhai. Nami towklak dow areng klang pirmi muk chekhai, now kimphai hownia kimluk mowr mih sidar singh hown kowh phen hown krawi pingah khai. 17Lang Chimsai mih towklak pur kowi kowh chimsaima mih towklak dow areng klang 40 muk chekhai. 18Thurai chup kim alak pra kowh kimbang dow nakhila hua dowi kownkow dan pe sidar singh phen khai. Now nami phen maten kowi dow uih rup hai pau rup her pe khai.

19Naiawng hai natowla sangbowk laitawm tawkpla kownkow Lang Chimsai mih arah dow Thurai chup kim akhung kowi Sawlawmawn thawpah khai. 20Nami arah dow areng klang 20 muk, adowng phia 20 muk hai akro 20 muk chekhai. Nami towklak alak dow achangma mih kuh hown sowah khai, now phuchuara dow sidar singh phen hown pingah hanow kuh hown aia sowah khai. 21Thurai chup kim kowi kowh kimbang maten dow kuh achangma mih hown aia sowah khai, now Lang Chimsai mih towklak pur kowi dow kuh hown kowh leng chawp pe khai. 22Aia dow Thurai chup kim kowi kowh alak maten kuh hown sowah khai. Lang Chimsai mih Arah kowi kowh phuchuara paw kuh hown aia sowah khai.

23-26Lang Chimsai mih Arah kowi natowah kownkow kanrawn singh hown aia thawp pe Cherup rup pachum khai. Nami Cherup rup pre buk mih dow aiuk hai apowm katsang aia thawpah khai. Now Cherup rup pre buk mih akro dow hamüt muk chi aia thawpah khai. Nami Cherup rup kowh alap klang dow tanga muk chi chekhai. Nami Cherup rup kowh alap dow mami kowh lap tut hownia paimi kowh lap tut mowr kowi hamüt muk chekhai. 27Nami Cherup rup pre buk mih dow alap iangma kangowh Lang Chimsai mih Arah kowi aia towah khai. Cherup rup lowk mih kowh alap papra dow mapra kowh kimbang kowi takak khai, now alowk mih kowh alap paw papra mih dow alowk mih pra kowh kimbang kowi takak chekhai. Now akeng pra kowh lap dow lowkkowlowk alap chem takak chekhai. 28Now nami Cherup rup pre buk trui dow kuh hown aia sowah khai.

29Thurai chup kim kowi kowh towklak pre buk mih aping maten kowi dow Cherup rup ün, chekmarawng singh rup ün hai pau rup ün aia her pe khai. 30Now nami towklak pre buk trui kowh aphai paw kuh hown aia sawnah khai.

31Lang Chimsai mih towklak plawt dow kanrawn singh phen hown aia thawpah khai. Nami towklak plawt mawm kowh dow anui uowi tanga klüng chekhai. 32Nami towklak büng dow pre pra trui kowi Cherup rup ün, chekmarawng singh ün hai pau rup ün aia her pe khai, now nami towklak büng kowi dow aia sow pe kuh khai. 33-34Thurai chup kim vüi kowi dow kanrawn singh hown tali nui mih kimplawt mawm aia thawpah khai, now kimbüng dow karpowng singh phen hown pre phia chi aia thawpah pre buk khai. Nami kimbüng pre buk mih dow naia klepah kownkow pre phia chi mih kowi chawp pe akli khai. 35Nami kimbüng kowi paw Cherup rup ün, chekmarawng singh hai pau rup ün aia her pe hanow kuh hown sowah khai.

36Thurai kim lak kowi kowh viadawng dow klangiungchow bawpah mih hua sum tan hai sidar singh phen atatma mih hown aia pingah khai.

37Thurai chup kim vüi uown phük kimchüng mih dow Sawlawmawn chowm mang mih tali ning kowi kowh Ziv la khe chekhai. 38Now khowmta bowkta mih powm iawng aia dow lailowk ning nga kowi kowh Bul la kowi Thurai chup kim chang lup maten churta khai. Nami Thurai chup kim thawp dow Sawlawmawn mih ranit ning lakke khai.