1 Manguüa 14

Jeroboam kowh chapa kowng mih

1Nami khin khe Jeroboam chapa Abija dow arau uowi khai. 2Nakhowk khe Jeroboam tek pe amasi mih, “Ang masi pami maru natukla en dowi kownkow akeng mih tawnguat khupla diah. Now Silo marow kowi risi Ahija tut-e kowkowi diah. Israeluüa luk kowi ang nachowm mang kown mih laiklow tek ang mih dow risi Ahija chekhai. 3En tarü mih khin khe kawmpah hamüt pa, kanrawn sau hown kowh thawpah mih kawmpah sangrum hai kuai tui sangrum risi Ahija kowi pawla pe diah. Aia dow achi kowh chapa tawng chow naown kown mih natek en kown taih,” pakhai. 4Nahanow Jeroboam kowh masi dow ahua tek pe iawng chang khai, now aia dow Silo marow kowi risi Ahija kim kowi kowkowi khai.

Nami khin khe risi Ahija dow lawngtang lai bowt rakowi khi mik dowi bowt chekhai. 5Tawkchedow CHAKRAMANG tek pe Ahija mih, “Jeroboam kowh masi mih aia kowh chapa arau uowi mih lawnguan kowi nauang lünta kownkow en tut-e uang tarü khowk. Aia klang en iawng aia kowi hawt klangah diah,” pakhai. Now nami masiuüa kowi tawng chow nahawt tek pe kown mih Ahija kowi CHAKRAMANG tek pe khai.

Now Jeroboam kowh masi dow akeng mih masiuüa powm iawng uang thula arup hanow uang tarü khai bowt. 6Naiawng rakowi kimplawt re-e Jeroboam masi uang towm mih khawk san klow tata hanow risi Ahija tek pe mih, “Jeroboam kowh masi ow, alak kowi uang kup bowt. Tawngplawng kowchow akeng mih masiuüa powm iawng en uang tuk thula arup khai? Naphowng en satang ngak kownkow CHAKRAMANG tekta ang khowk. 7En hua Jeroboam tut-e kowmang now maiawng kowtek pe diah: CHAKRAMANG Israeluüa kowh Thurai tek mih, ‘Maru kawmuüa pungmadawng hownia ang lang klo en khai, now ang maru Israeluüa luk kowi ang thawp en aluchow khai. 8David kowh krungchak hownia pren mih ang rupah hanow ang pe en khai. Nachenganchepaw en dow ang kowh nar David iawng nadowi chekhai. David dow ang kowh ana pek chün reng, now aia dow sak matiow hown ang tek iawng chang reng chekhai. Aia dow ang mik kowi iung mih lup kangowh chowtaih chang khai. 9Nachenganchepaw en dow rik uowi mih manguüa hownia kawmat mowr kowh manguüa maten lak-e lang chang lup ngak khai. En matia vüi thurai hai arup aren ün en thawpah khai. Naiawng hai en towk ang kunmarau khai, now en kung prakowi en towta ang hüah khai. 10Naiawng rakowi Jeroboam krungchak luk kowi dow alenma ang nauang pawla pe phih kown. Nami phih hown aia krungchak hownia kowh kachakuüa nget kowi nar lah, nar nadowi mih lah ang nakowngta bowk kown. Now Jeroboam krungchak kowi dow mawngchawng chun towk iawng asaima ang namitta kown. 11Marow kowi kowh kowng mih aia krungchakuüa kowi dow kui nachaah kown, now dowm kowi kowh kowng miuüa kowi dow uakling uaber hawmh nachaah kown. Mami laiklow dow ang CHAKRAMANG tek khowk,’ pakhai.

12“Kawmat kim kowi kowplan diah. Marow kowi en kowchawp hown krowksang en chapa nakowng kown. 13Now Israel maten dow aia vüi kowi uowila uiting uangtak se aia kowi nadupah kown. Jeroboam kowh maru-uüa pungmadawng kowi aia chowtaih naka tadupra kown. Tawngplawng kowchow panow aia luk kowi chowtaih CHAKRAMANG Israeluüa kowh Thurai sak-ih khai.

14“CHAKRAMANG dow aiamat vüi Israeluüa luk kowi nape chowmah mang lowk ia kown. Nami mang dow Jeroboam krungchak kowi napiakta bowk kown. Nami piakra dow ani hownia chowbowt. 15CHAKRAMANG dow Israeluüa kowi napiakah kown. Nahanow amatni dow khownawng tui kowi kowh tapowngla paw mih pram iawng naown kown. Now amatni pipu-uüa kowi kowh aia peah mih klangiungma mih pren hownia amatni kowi dow nacham pawla hanow Iufratis aw paipra pown kowi nacham setta plawt kown. Tawngplawng kowchow panow amatni dow thawp Asera limpu hanow CHAKRAMANG kowi towkah kunmarau khai. 16Jeroboam dow chang angak khai, now Israeluüa kowi paw aia pe changla ngak khai. Naiawng rakowi amatni kowi dow CHAKRAMANG mih nanuata kown,” pakhai.

17Nahanow Jeroboam kowh masi dow kim prakowi mang khai, now aia dow Tirza marow kowi kowtowm khai. Now kimplawt kowi aia haisan khawk hown krowksang achapa dow kowng khai. 18Now aia kowh nar risi Ahija kowi CHAKRAMANG tek pe iawng Israeluüa maten dow achapa vüi kowi uowila uiting uangtak se achapa kowi dupah khai.

19Jeroboam kowh akeng mih lup lawnguan maten, tasen lawnguan maten hai chowm mang mih lawnguan maten dow “Israel Manguüa Lawnguan” pami bowih kowi arui uowi bowk chekhai. 20Now Jeroboam dow 22 ning mowr chowmla mang khai. Nami kung kowi dow aia mih kowng khai bowt. Now aia takcha kowi dow achapa Nadab mih ta chowm mang khai.

Juda pren kowi Rehoboam chowm mang mih

21Now Juda pren kowi chowm mang mih dow Sawlawmawn kowh chapa Rehoboam chekhai. Aia dow 41 ning khe chowm mang khai, now Jerusalem marow kowi aia dow lairanit ning mowr chowmla mang khai. Israel chenchapuüa kowh arah maten hownia CHAKRAMANG aiamat nauowiah kownkow kloah mih dow Jerusalem marow chekhai. Rehoboam kowh u dow Amawnuüa chenchap Naima chekhai.

22Judauüa dow CHAKRAMANG mik kowi angakma mih lup chang khai. Amatni dow amatni kowh pipu-uüa lak-e chang angak khai. Amatni kowh angak changra hownia amatni dow CHAKRAMANG kowi towkah kunmarau ngamlam khai. 23Amatni dow arah kroma mih kowi kowh chupiiara hai aram chakma mih singh tut towng amatni vüi thawp chupiiara büah khai. Now chimsaima mih hua hai Asera limpu paw thawp büah khai. 24Nami klen kowi amatni pren kowi dow akeng thuraiuüa chup kim kowi kowh chang chawkkrawma lup mih masiuüa hai kachakuüa hawmh paw uowi chekhai. Israeluüa pur hownia kowh CHAKRAMANG prütta mih chenchapuüa kowh suiiai kaniaima mih lup dow Judauüa mih tawi chang khai.

25Rehoboam chowm mang mih tanga ning khe Aigupta pren mang Sisak dow Jerusalem marow kowi kowsenah khai. 26Now mang Sisak dow CHAKRAMANG kim hai mang kim kowi kowh uowi mih dawngthawnguan maten pawla bowk khai. Aia dow kuh hown kowh Sawlawmawn thawpah mih kawngma ün khowm padow pawla bowk khai. 27Naiawng rakowi mang Rehoboam dow kuh hown kowh kawngma takcha kowi kri hown kawngma mih thawpah khai. Now naiawngün kawngma naming nakhet kownkow aia dow aia kimplawt chawng mih siphaiuüa kowi peah kurdik khai. 28CHAKRAMANG kim kowi mang kowkowi mih khin khe kangchawng mih siphaiuüa dow naiawngün kawngma dowkla se mang tut-e tawi reng chekhai. Now akung kowi amatni dow naiawngün kawngma mih kangchawngra kim kowi uang towah büah khai.

29Rehoboam changah mih akeng mih lup lawnguan maten dow, “Juda Manguüa Lawnguan” pami bowih kowi arui uowi bowk chekhai. 30Now Rehoboam kowh siphai hawmh hai Jeroboam kowh siphai hawmh dow atungma tasen reng chekhai. 31Akung kowi Rehoboam dow kowng hanow a-pa David marow kowi maru dupah khai. A-u dow Amawnuüa chenchap Naima chekhai. Now Rehoboam takcha kowi achapa Abija mih ta chowm mang khai.