1 Krungchakuüa 20

Rabba marow David powngta mih

1Chungrau khin chur prakowi manguüa dow cham tasen reng chekhai. Nakhowk khe Joab paw cham tasen kownkow aia kowh siphaiuüa hown cham tarü khai. Aia dow Amawnuüa pren piakta pe hanow Rabba marow kri mih umta pe lut khai. Now nami marow dow Joab mih senah hanow piakta pe khai. Nachenganchepaw nami khin khe David dow Jerusalem marow kowi ta uowi khai.

2Now Rabba marow kowi David kowting khe Amawnuüa mang kowh lukruk mih lu hownia David pawta pe khai. Nami lukruk dow kuh 34 set ngia hown kowh thawpah mih chekhai, now nami lukruk kowi asung khakma mih hua paw dan pe khai. Nami lukruk dow David kowh lu kowi kruk pe khai. Nami khin khe nami marow hownia mih uanh ahuma David pawla khai. 3David mih nami marowchakuüa kowi dow uang lawtla hanow kür hown sawksak, marek hai singh lup chang müa lawngha uanh hown pe changah lup khai. Now Amawnuüa kowh akeng mih marow maten kowi kowh maru-uüa kowi paw naiawng David pe changah khai. Nami kung kowi dow David mih Jerusalem marow kowi kowplan mang khai bowt.

Filistinuüa kowi David nowngta mih

4Nami kung kowi David kowh siphaiuüa mih Gezer marow kowi Filistinuüa hown tasen khai iawk. Nakhowk khe Husa krungchak Sibekai mih lainowmma iuk kro mih chenchap Sippai pami maru kowi saita lowk ia khai, now Filistinuüa dow sum khai.

5Nami kung kowi paw Filistinuüa hown plan tasen hanow Jair kowh chapa Elhanan mih Gat marowchak Goliat kowh naumow Lami kowi saita khai. Lami dow Refaim krungchak chekhai. Aia kowh reh dow aiuk pawngpai khowt chekhai.

6Nami kung kowi paw Gat marow kowi Filistinuüa hown plan tasen khai iawk. Nakhowk khe paw lainowmma iuk kro mih chenchap maru uowi lowk ia chekhai. Nami maru kowh dow arut pre pra trui kowi hai akhawk pre pra trui kowi aprüm uowi taruk klüng chi chekhai. Nami maru paw Refaim chenchap chekhai. 7Nachenganchepaw Israel chenchap kowi nami maru khareah khe David taimow Simea kowh chapa Jonathan mih saita khai.

8Naiawngün tali ia mih Filistin siphaiuüa dow Gat marow kowi kowh uowi mih Refaim chenchap chekhai. Amatni kowi dow David hai aia kowh maru-uüa mih saita khai.