Skip to content
BibleKenya

Mpoto Bible Version

Utumbulilu 5

Ibheleku yaka Adamu

1 Mambu gha Chikahi 1:1-4

Chenjenu nde chitabu chechalembakiki cha ibheleku yaka Adamu. Lichobha lela Chapanga paakumbombiki mundu, akumbombiki kwa sula jaki. Akabhabhombiki mwanalomi na mbomba, akabhapengalili na kubhapekeha lihina “Adamu.” Adamu paakabhi na hyaka mia moja na selasini, akumbeliki mwana joalengini naku, joakabhi na sula ngati jaki, akundohiki Seti. Paakabhelakiki Seti, Adamu akatami hyaka yengi mia nane, na kubheleka bhana bhangi bha chikambaku na bha chimbomba. Adamu akatami kwa hyaka mia tisa na selasini, na akapotile.

Seti paakabhi na hyaka mia moja na nhwanu, akumbeliki Enoshi. Paakabhelakiki Enoshi, Seti akatami hyaka yengi mia nane na saba, na kubheleka bhana bhangi bha chikambaku na bha chimbomba. Seti akatami hyaka mia tisa komi na jibheli, na akapotile.

Enoshi paakabhi na hyaka tisini, akumbeliki Kenani. Paakumbeliki Kenani, Enoshi akatami hyaka yengi mia nane kumi na nhwanu, na kubheleka bhana bhangi bha chikambaku na bha chimbomba. Enoshi akatami hyaka mia tisa na nhwanu, na akapotile.

Kenani paakatami hyaka sabini, akumbeliki Mahalaleli. Paakumbeliki Mahalaleli, Kenani akatami hyaka yengi mia nane na alobaini, na kubheleka bhana bhangi bha chikambaku na bha chimbomba. Kenani akatami hyaka mia tisa na komi, na akapotile.

Mahalaleli paakabhi na hyaka sitini na nhwanu, akumbeliki Yaledi. Paakumbeliki Yaledi, Mahalaleli akatami hyaka yengi mia nane na selasini, na kubheleka bhana bhangi bha chikambaku na bha chimbomba. Mahalaleli akatami hyaka mia nane tisini na nhwanu, na akapotile.

Yaledi paakabhi na hyaka mia moja sitini na jibheli, akumbeliki Henoko. Paakumbeliki Henoko, Yaledi akatami hyaka yengi mia nane, na kubheleka bhana bhangi bha chikambaku na bha chimbomba. Yaledi akatami hyaka mia tisa sitini na jibheli, na akapotile.

Henoko paakatami hyaka sitini na nhwanu, akumbeliki Metusela. Paakumbeliki Metusela, Henoko akabhi ndongwana kwaka Chapanga kwa hyaka mia tatu, na kubheleka bhana bhangi bha chikambaku na bha chimbomba. Henoko akatami hyaka mia tatu sitini na nhwanu. Henoko akabhi ndongwana kwaka Chapanga, na akahobhike, maghambu Chapanga akuntolike.

Metusela paakatami hyaka mia moja semanini na saba, akumbeliki Lameki. Paakumbeliki Lameki, Metusela akatami hyaka yengi mia saba semanini na jibheli, na kubheleka bhana bhangi bha chikambaku na bha chimbomba. Metusela akatami hyaka mia tisa sitini na tisa, na akapotile.

Lameki paakatami hyaka mia moja semanini na jibheli, akumbeliki mwana wa chikambaku. Akundohiki lihina laki Nuhu, akapwaghaje, “Mwana ajoju nde joanatujeghala mtima kubhokana na lihengu litu lelinonwipi letulihenga kwa mabhoku ghitu, mu inchi ambaju Bambo Chapanga akajipeki masolu.” Paakabhelakiki Nuhu, Lameki akatami hyaka yengi mia tano tisini na nhwanu, na kubheleka bhana bhangi bha chikambaku na bha chimbomba. Lameki akatami hyaka mia saba sabini na saba, na akapotile.

Nuhu paakabhi na hyaka mia tano, akabhabheliki Shemu, Hamu na Yafeti.

Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.