Skip to content
BibleKenya

Mpoto Bible Version

Utumbulilu 40

Yusufu ahyekula ndoto ya bhakongeka

Bhela, paghapetiki mambu ghanihagha, mundu joakabhi aghoha hindu yokapi ya kunywa yaka nkolongwa, na mundu joakabhi ajocha mabumunda, bhakunhokili bambo wabhu, nkolongwa wa Misili. Falao akabhayomili bhatumika bhaki bhakolongwa bhabheli, joakabhi alenda hindu yokapi ya kunywa, na mundu joakabhi ajocha mabumunda. Akabhajighalili mkati ja nyumba jaka nkolongwa wa manjolinjoli, muchifungu chela chela cheakunkongiki Yusufu. Nkolongwa wa manjolinjoli akumpeki Yusufu bhandu bhanihabha, najombi akabhatumakile, na bhakabhili muchifungu kwa chikahi chilachu.

Bhela, ikilu jimu bhokapi bhabheli bhakalotiki ndoto, kila jumu ndoto jaki kwa ikilu jimu, na kila ndoto jakabhi na ndandi jake, nkolongwa wa hindu ya kunywa na nkolongwa wa kujocha mabumunda ghaka nkolongwa wa Misili bhabhakongiki muchifungu bhala. Yusufu paakapiti lukela kubhabhona, akabhahimanili bhokapi bhabheli bhabhi na lujoghopo. Bhela, Yusufu akabhalalukili bhatumika bhaka Falao habha, bhabhakabhi papamu naku munyumba jaka bambo waki, akapwaghaje, “Bho, mbona pamihu jinu pabhili na ngwinyanila?”

Bhakamuyangike, “Tepani tabhokapi tukalotiki ndoto, nambu pachifungu pani ngachepabhili na mundu jokapi wa kuhyekula ndandi ya ndoto heyi.”

Yusufu akabhapwaghile, “Bho, kuhyekula ndoto nga lihengu laka Chapanga? Mbwaghilaje ndoto heyi.”

Bhela, nkolongwa wa kughoha hindu ya kunywa akundandili Yusufu ndoto jaki. Akumpwaghile, “Mu ndoto jangu nakalotiki kubha, kukabhi na mzabibu palongi jango. Na mu mzabibu hoghu kukabhili na mambandi ghatatu, na ukabhi ngati utenda kumela, na kupiha malobha, na malobha ghaki ghakabhi ghapiha zabibu yeipile. Chikombi chaka Falao chakabhili mu mabhoku ghangu, nakaitoliki zabibu, na kuiminyila mu chikombi chaka Falao, na kumpekeha Falao chikombi mu mabhoku ghaki.”

Yusufu akumpwaghile, “Ndandi ja ndoto jaku nde ajeje: Mambandi ghatatu nde machobha ghatatu. Mu machobha ghatatu aghagha, Falao anaakubhohaje muchifungu na kukubheka kabhete mu pandu pako, nanau anaubhekaje chikombi chaka Falao mu mabhoku ghaki, ngati mowabhelili ntetu waku, paukabhi mundu waki wa kunkenga. Nambu chikahi mambu paghakujendila wichu, ukandendila chihomu na kunoghola palongi jaka Falao, nahuli amohaje muchifungu mone. Maghambu nakatolaliki kwa makili kuhuma ku inchi ja Bhaebulania, na hata pani pamile ngachenahengiki lijambu lokapi lela lelimbalika kubhekakeka muchifungo.”

Mundu joakabhi ajocha mabumunda jola paakaweni kubha Yusufu ahyekwili ndoto jela koni jakabya na ndandi jinyahi, akumpwaghi Yusufu, “Nepani nanatu nakalotiki ndoto: Lingalyaje, pamutu jangu pakabhili na itonga itatu yeibhi na mabumunda manyahi. Mu chitonga cha panane, kukabhili na kila ntundu wa ilebhe yeyajochakiki kwa ndandi jaka Falao, nambu hijuni yakabhi ikula kuhuma mu chitonga panani ja mmutu wango.”

Yusufu akumpwaghile, “Ndandi ja ndoto jaku nde ajeje: Itonga itatu nde machobha ghatatu. Mu machobha ghatatu aghagha, Falao anaahekata mmutu waku, na kukubheka panani ja nguzu ja nkongo, na hijuni anaikula inyama jako.”

Mu lichobha la tatu, kukabhili nde lichobha la kukomboka kubhelakeka kwaka Falao, najombi akabhaandalili bhatumika bhaki bhokapi uwangalalu. Akabhapihiki muchifungo mundu jola joakabhi nkolongwa wa kughoha hindu ya kunywa yaka Falao na nkolongwa wa kujocha mabumunda, na kubhabheka palongi ja bhatumika bhaki. Panihapa akunkelawihi nkolongwa wa kunkenga pa lihengu laki, najombi akumpekihi Falao chikombi mu mabhoku ghake. Nambu nkolongwa wa kujocha mabumunda jola, akunhwambiki pa nguzu ja nkongu ngati Yusufu moakapwaghile. Papamu na ghanihagha, mundu jola joakabhi nkolongwa wa kughoha hindu ya kunywa, ngacheankombwiki Yusufu, nambu akatei kunjewa.

Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.