Skip to content
BibleKenya

Mpoto Bible Version

Utumbulilu 16

Hajili na Ishimaeli

Bhela Salai nhwanu waka Abulamu, akabhi akali ngacheambelaki ndomi waki mwana. Nambu akabhi na mtumika wa chimbomba wa ku Misili, lihina laki akalowakiki Hajili. Salai akumpwaghi Abulamu, “Umanyi kubha Bambo ngacheanyangatili kupata mwana. Untolaje Hajili mtumika wangu wa chimbomba, pangi nhweza kupata bhana kwaki.” Abulamu akaghajetakili malobhi ghaakalongi Salai. Bhela, Abulamu paakatami mu inchi ja Kanaani hyaka komi, Salai akuntoliki mtumika waki wa chimbomba wa ku Misili, yani Hajili na kumpekeha Abulamu ndomi waki, abya nhwanu wake. Abulamu akaghonili na Hajili, najombi Hajili akapatiki chitumbu. Nambu chikahi pela Hajili paakamanyi kubha abhi na chitumbu, akatumbwili kulilumbalila na kumpoha lihamu Salai.

Panihapa Salai akumpwaghi Abulamu, “Uhakau ghonupata na ubya panani jaku wehapa. Nepani nakukupekihi mtumika wangu, sajenu kwa kubha amanyi kubha abhi na chitumbu, amboha lihamu nepani. Bambo Chapanga na atemulaje pachilanda jaku wehapa na nepani!”

Abulamu akumpwaghi Salai, “Mtumika waku abhi pahi ja lujiniku lwaku. Untendilaje lijambu lokapi lela leubhona kubha nde lambone nakanope.” Bhela, Salai akung'ahiki Hajili mbaka akatilike.

Mtumika wa kunani waka Bambo Chapanga akumbweni Hajili pambipi na chemichemi ja machi kulipololu hoku, chemichemi jejibhi ku indela jejijenda ku muchi wa Shuli. Mtumika waka Bambo Chapanga akumpwaghile, “Hajili, mtumika waka Salai, uhuma kwako, na ujenda kwako?”

Hajili akayangiki, “Nepani nuntila mbuja wangu Salai.”

Panihapa mtumika wa kunani waka Bambo Chapanga akumpwaghile, “Ukelabhukaje kwaka mbuja waku Salai na ukaliheliyaje na kumtii.” Mtumika wa kunani waka Bambo Chapanga jola akajendali kupwagha, “Ananyonjukya bhabhelakeka bhaku hata ngabhiwezi kubhalangika kwa ntundu mobhijolukyaje.” Kabhete mtumika wa kunani waka Bambo Chapanga akumpwaghile, “Wehapa sajenu ubhi na chitumbu, na anaubhelakaje mwana wa chikambaku. Wandoha lihina laki Ishimaeli, maghambu Bambo Chapanga ajowini chilelu cha mang'ahiku ghaku. Ishimaeli anaakubha ngati liponda la muchitengu pachilanda ja bhandu, anaakubha adui waka kila mundu, na kila mundu anaakubha adui waki. Najombi anaatamaje kwa kuhakalanila na bhalongu bhaki bhokapi.”

Bhela, Hajili akumpeki Bambo Chapanga lihina aleli, “Wehapa nde Chapanga weubhona,” kwa ndandi akapwaghiki, “Sajenu numbweni jombi joamona nepani.” Bhela chilibha chenihechi chakalowakiki Beel Lahai Loi. Chilibha chenihechi chakali chibhile pachilanda ja Kadeshi na Beledi mbaka lalenu.

Hajili akumbelakili Abulamu mwana wa chikambaku, na Abulamu akundohiki mwana hoju lihina laki Ishimaeli. Abulamu akabhi na hyaka semanini na sita chikahi Hajili paakumbeliki Ishimaeli.

Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.

Full source notice & licence · CC BY-SA 4.0 · SourceEdition imported 2026-11-09.

BibleKenya

Reader settings

Theme
Font
Alignment
Reading width

Saved in this browser and used offline too. Press ? for keyboard shortcuts.