Mpoto Bible Version
Kubhoka 37
Kulenganakela Lisanduku la Lulaghilu
Kubhoka 25:10-22
Bezaleli akalenganakili Lisanduku la Lulaghilu kwa mbau ya nkongu wa mshita, lelakabhili na ulachu wa sentimita mia moja na komi, upana wa sentimita sitini na sita, na kimu cha sentimita sitini na sita. Bhela akaliyekiki Lisanduku heli kwa zahabu jinyahi mkati na kunja, na kulenganakela ukengu wa zahabu ipambala yokapi. Akalenganakili peti nchechi ya zahabu na kuihwatika mu magholu ghaki, kila chigholu peti jimu. Bhelabhela akalenganakili mipeku kwa nkongu wa mshita na kujihyeka kwa zahabu. Akajipetishi mipeku heji mu peti yeyabhili mu ipambala ibheli ya lisanduku, nahuli kulitotola lisanduku heli. Bhela akalenganakili chifuniku cha zahabu, na pachifuniku hapa pakabhili na chifuniku cha chiha, ulachu waki ukabhili sentimita mia moja na komi, na upana waki sentimita sitini na sita. Bhelabhela akalenganakili picha ya makelubi ghabheli kwa zahabu jejigholulike, na kughabheka pa ujomukelu ubheli wa chifuniku hechi. Bhela akalenganakili picha jaka kelubi jumu upambala ghumu na jongi upambala ghongi, na akaghalombanishi makelubi hagha kubha chindu chimu na chifuniku cha chiha hechi, jumu akoku na jongi akoku. Makelubi hagha ghakatei kulingalanila, na mapapanilu ghabhu ghakahatambwiki kunani, na nhwili wabhu kuhyekalela pa chifuniku cha chiha hechi. Pamihu jabhu pakajinamili kulingalila pa chifuniku cha lisanduku heli.
Meza ja kubhekela mabumunda ghaghabhekakiki palongi jaka Chapanga
Kubhoka 25:23-30
Bhelabhela Bezaleli akalenganakili meza kwa nkongu wa mshita jejibhili na ulachu wa sentimita semanini na nane, na upana wa sentimita alobaini na ncheche, na kimu cha sentimita sitini na sita. Akajipakiki meza heji kwa zahabu jinyahi na kujiyongoloha na ukengu wa zahabu. Bhela akalenganakili ukengu wa ubau wa zahabu na kuyongoloha upambala wokapi, ghowabhili na upana wa milimita sabini na nhwanu. Bhelabhela akalenganakili peti nchechi ya zahabu kwa ndandi ja meza heji, na kuikonga mu ipambala nchechi, mu magholu nchechi hagha. Bhela peti heyi yakabhili pambipi na ubau ghola wa kujiyongolota meza na yakabhili ya kujingakila mikongu ja kujitotulela meza heji. Bhelabhela akalenganakili mipeku jibheli ja mshita, na kujiyeka kwa zahabu, mipeku heji jakabhili ja kutotulela meza heji. Bhela akalenganakili mbali na hikombi ya kubhekela ubani pameza, papamu na bilika na bakuli ya kujeghalela nhupu ya kunywa. Akalenganakili yombu yokapi heyi kwa zahabu jinyahi.
Kulenganakela chinala cha taa
Kubhoka 25:31-40
Bhela Bezaleli akalenganakili chinala cha taa kwa zahabu jinyahi. Chitamilu chaki na ufitu wa chinala hechi yakabhili chindu chimu, bhelabhela na ingonyu yaki, lihundwa laki, yakalengini na malobha ghaki, yokapi yakalenganakiki kwa zahabu na kubha chindu chimu.
Mambandi sita ghakapitalili mu ipambala ya ufitu waki, mambandi ghatatu upambala ghumu na mambandi ghatatu upambala ghongi. Mu kila limbandi kukabhili na ingonyu itatu yeilengana na malobha gha mlozi, kila chimu na lihundwa laki na lilobha laki. Mu ufitu hoghu kukabhili na ingonyu nchechi yeilengana na malobha gha mlozi, papamu na mahundwa ghaki na malobha ghaki. Pahi ja kila paghapitalila mambandi ghabheli pachilanda ja mambandi sita ghala, pakabhili na lihundwa limu lelilombanishwi na ufitu wa chinala hechi. Mahundwa ghanihagha na mambandi ghaki ghakabhili chindu chimu na chinala hechi, na chokapi chakalenganakiki kwa zahabu jinyahi. Bhela akalenganakili taa saba, na hindu ya kulenganakela utambi na mbali yake, yokapi yakalenganakiki kwa zahabu jinyahi. Akatumili kilu selasini na nhwanu ya madini gha zahabu jinyahi, kulenganakela chinala hechi na hindu yaki yokapi.
Kulenganakela lisanduku la kuhukila ubani
Kubhoka 30:1-5
Bhela Bezaleli akalenganakili lisanduku kwa nkongu wa mshita kwa ndandi ja kuhukila ubani. Lisanduku heli lakalengini ipambala yokapi, ulachu na upana waki sentimita alobaini na nhwanu, na kimu chaki sentimita tisini. Manyelu ghaki ghakabhili chindu chimu na lisanduku heli. Bhela jokapi akajipakiki kwa zahabu jinyahi, upambala waki wa kunani, ipambala yaki yokapi ya muluteta na manyelu ghaki, kabheti akayongalwihi ukengu wa zahabu munkeghi jaki. Akalenganakili peti ibheli ya zahabu kwa ndandi ja lisanduku pahi punkeghi, yengi ibheli upambala wa kabheli nahuli kukamulila mipeku heji chikahi cha kuchitotola. Akajilenganakili mipeku jibheli kwa nkongu wa mshita, na kujihyeka kwa zahabu.
Kulenganakela mahuta gha kubhahimika bhandu na hindu yengi
Kubhoka 30:22-38
Bhela Bezaleli akalenganakili mahuta mahuhu gha kubhahimika bhandu na hindu yengi, na ubani unyahi ghounungila wichu, ghowalenganakiki na fundi joalenganakela manungilu kwa hindu yeinungila wichu.
Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.