Kubhoka 22

Shelia ja kundepa njaku

1“Ngati mundu anajibhiki ng'ombi au limbeleli na kunchinja au kunhemalela, mundu jonihoju apalika alepaje ng'ombi nhwanu kwa ng'ombi jimu jeajibhike, na mambeleli nchechi kwa limbeleli limu leajibhike. 2Ngati mwihi anakamuliki abhombola nyumba ikilu na kulapulika mbaka kupotela, mundu joankomiki mwihi hoju ngacheakubha na lihoku la kujitila mwahi. 3Nambu lijambu heli analipitalili chikahi lyobha analipitiki, mundu joankomiki mwihi hoju akubha na lihoku la kujitila mwahi.

“Mwihi hoju impalika alepaje, nambu ngati ngacheabhili na chindu cha kulepa, apalika ahemaliwaje nahuli alepaje kwa ndandi ja wihi waki. 4Ngati chinyama chechijibhakiki chihimaniwi chibhili chomi mumabhoku ghaka mwihi hoju, ikubhi ng'ombi au liponda au limbeleli, impalika kulepa mala pabheli.

5“Ngati mundu anaalekakili hinyama yaki mu ngonda au ngonda wa mizabibu, na kuileka ikulaje mu ngonda waka mundu jongi, impalika alepaje hindu hinyahi kuhuma mu ngonda waki mweni au kuhuma mu ngonda waki wa mizabibu.

6“Ngati mundu anapambakili moto mungonda waki, na moto hoghu anaujochiki mikongu ja miha na kujaghanila mbaka kutinyiha miganda ja chilebhi, au chilebhi chaka mundu jongi panga kuchihuna, au ngonda wokapi anautinyiki, mundu joapambakili moto hoju impalika kulepa.

7“Mundu anaampekihi njaki mbija au hindu hengi angohilaje, na ngati anaijibhakiki kuhuma mu nyumba jaka njaki hoju, na ngati mwihi hoju anaakamuliki, impalika alepaje mala pabheli pa hindu yeajibhike. 8Nambu ngati mwihi ngacheakamuliki, mweni nyumba hoju anapelakikaje palongi ja bhatemula, nahuli kulangiha kubha ngacheatoliki hindu yaka njaki.

9“Ngati bhandu bhabheli bhakomanela ng'ombi, au liponda au limbeleli, au ingobhu, au chindu chokapi chechihobhiki ambachu kila mundu apwagha nde chaki, bhandu bhanihabha anabhaletakikaje palongi ja bhatemula. Jola ambaju bhatemula anabhumbona kubha abhili na lihoku anaandepa njaki mala pabheli.

10“Ngati mundu anaampekihi njaki liponda, au ng'ombi, au limbeleli au chinyama chengi chokapi achighohaje, na chinyama hechi anachiwili au anachilipotiki au anachitolakiki panga mundu jokapi kumanya, 11lijambu heli analitemuliwaje kwa kulapa kwaka mundu hoju palongi jaka Bambo Chapanga, kubha joakapekiwi ngacheakajibhiki chinyama chaka njaki. Na ngati mweni chinyama hoju anaajetakili kulapa hoku, njaki hoju ngayilepi chindu chokapi. 12Nambu ngati chinyama chikajibhakiki kwaka njaki, anaimpalika andepaje mweni chinyama. 13Ngati chinyama hechi chakakomakiki na chinyama chikali cha muchitengu, mundu joakapekiwi chinyama hoju impalika aleta mahighalilu gha chinyama hechi ngati ulandilu, mundu hoju ngayilepi malepu ghokapi ghala kwa ndandi chinyama hechi chakakomakiki na chinyama chikali cha muchitengo.

14“Ngati mundu anaajahiki chinyama kwaka njaki, na ngati chinyama hechi chitehi kulipoteka au chihwili na mweni chinyama ngacheabhili, mundu joajahiki chinyama hechi impalika alepaje chinyama hechi. 15Nambu ngati mweni chinyama hoju anaabhili panihapa, mundu joajahiki hoju ngayilepi chokapi. Ngati chinyama chakabhili chitehi kukodiwa, mweni chinyama hechi atolaje mbija ja kodi pela.

Moibhapalakila bhandu kutama

16“Ngati mundu anaanswembiki mwali jwangakughonela na mwanalomi, na jwangakutoghuleka na kughonela naku, impalika mundu hoju kulepa mahali, na kuntoghola kamwali hoju. 17Nambu tati waka kamwali hoju anaakaniki katakata kuntoghukela mundu hoju kamwali waki, mundu hoju analepa mbija ya mahali yeipalika kwaka kamwali jwangakughonela na mwanalomi hoju.

18“Ngawandeka mbomba nhwabhi kubha mwomi.

19“Mundu jokapi joaghonela kihyegha na chinyama ipalika akomakikaje.

20“Mundu jokapi joambokeha kichapanga jongi nyambiku badala jaka Bambo Chapanga, ipalika akomakikaje.

21“Ngamwantendela ngeni uhakau au kung'aha, maghambu na mwehapa mkabhili mwagheni ku Misili hoku. 22Ngamwantendela uhakau mbomba joahweliwi na ndomi waki, wala mwana nkebha. 23Ngati anamwatendili uhakau bhanihabha nabhombi anabhanelili nepani, chakaka nepani ananyowanyaje chilelu chabhu, 24na inyela yangu anaibhelalaje, na nepani ananuntendaje mkomakikaje kwa lipanga pamwikubha ku ngondo, na akabhahanu bhinu anabhakubhaje bhabhahweliwi na bhalomi bhabhu na bhana bhinu anabhakubha bhakebha.

25“Ngati anaunjahiki mbija mundu jokapi pachilanda ja bhandu bhangu bhabhabhili akakahochu, ngawampwaghila akulepaje mbija heji, na wala ngawandepesha nyonjeka. 26Ngati njaku anaabhekiki poni ingobhu jaki, ipalika ukelabhuhaje kwaki ingobhu heji mangani ja lyobha kujibhila, 27kwa ndandi jeniheji nde ingobhu jaki ja kanjika ja kuliyeka. Nde kiki chengi cheanaaliyekaje nacho? Payinelilaje, ananyowanaje, kwa ndandi nepani mili na chiha.

28“Ngawantondola Chapanga au kumpekeha masolu mahakau mtawala wa bhandu bhaku.

29“Ngawikotoka kuleta nyambiku kubhokana na umaheli wa hilebhi yaku na divai yaku.

“Ipalika umbekyaje mbelakeka wa kutumbula wa chikambaku wa bhana bhaku. 30Bhelabhela umokihaje nepani bhabhelakeka bha kutumbula bha ng'ombi hinu na mambeleli ghinu. Ubhalekaje bhatamaje na akamabhu bhabhu kwa machobha saba, nambu lichobha la nane umbekyaje nepani.

31“Mwehapa anamkubha bhandu bhangu bhahuhu. Bhela ngamwikula inyama ja chinyama chechikomakike na chinyama chikali cha muchitengo, nambu ndekalyaje nakawa inyama heji.