Mpoto Bible Version
Kubhoka 1
Bhaizilaeli bhang'ahakika ku Misili
Aghagha nde mahina gha bhana bha chikambaku bha Izilaeli, ambabhu bhakapiti ku Misili na Yakobo tati wabhu, kila jumu papamu na bhandu bha munyumba jake: Leubeni, Simioni, Lawi na Yuda, na Isaka, Zebuloni na Benyamini, na Dani, Nafutali, Gadi na Asheli. Bhabhelakeka bhokapi bhaka Yakobo bhakabhi bhandu sabini. Chikahi chenihechi Yusufu akabhi ajomwili kulongulela kutama ku Misili. Panakatai, Yusufu na bhalongu bhaki bhokapi, na chibheleku chela chokapi chakapotile, nambu bhabhelakeka bhaka Izilaeli bhakajonjukiki namaa, bhakabhi bhamaheli na bhakabhi na makili nakanopi, bhakajaghanili kila pandu ku inchi ja Misili.
Bhela, akapitalili nkolongwa jongi kutawala ku Misili, jonihoju ngacheakummanyi Yusufu. Najombi akabhapwaghili bhandu bhake, “Ndingalyaje ntundu Bhaizilaeli mobhabheli bhamaheli na mobhabheli na makili kupeta tepani. Henu tulondaje indela ja kubhahengela kwa malangu na kubhahibhalakila nahuli ngabhijonjukeka, nangakutenda bhenibhela, ngati ngondu anajipitalili anabhakubha papamu na maadui bhitu na kukomana na tepani na kujitila inchi jenu.” Bhela, Bhamisili bhakabhahawili bhajemalela bha kubhajemalela Bhaizilaeli na kubhang'aha kwa lihengu lelinonwipe. Bhaizilaeli bhakahengiki lihengu la kunchengela Falao michi ja kubheka chilebhi chaki, Pitomu na Lamesesi. Nambu kwa ntundu mobhakajendalili kubhang'aha nde ntundu Bhaizilaeli mobhakapetalili kujonjukeka na kujaghanila mu inchi ja Misili. Henu Bhamisili bhakabhajowipi namaa Bhaizilaeli. Bhela, Bhamisili bhakabhajomalakili Bhaizilaeli bhahengaje lihengu lelinonwipe. Bhakaghatendiki matamu gha Bhaizilaeli kubha mabhabha kwa kutenda lihengu linonope la kulenganakela chokaa ja kuchengela na kufyatula matofali na mahengu gha mu mighonda. Mu mahengu ghabhu ghokapi gha kunonopa, Bhamisili bhakabhatendili Bhaizilaeli panga na chiha.
Bhela, nkolongwa wa Bhamisili akabhalaghalakili Shifula na Pua bhabhakabhi bhabhabheleha akambomba bha Kiebulania, akabhapwaghile, “Pamwabheleha akambomba bha Kiebulania, anaabhelakiki mwana wa chikambaku, munkomaje, nambu ngati mwana wa chimbomba, mundekaje atamaje.” Nambu bhabheleha bhanihabha bhakabhi bhuntopela Chapanga, ngachebhakatendiki ngati mobhalaghalakiwi na nkolongwa wa Misili, nambu bhakabhalekiki bhana bha chikambaku bhatamaje. Bhela nkolongwa wa Misili akabhalohiki bhabheleha habha, na kubhalalukila, “Kwa ndandi kiki mtendiki anana? Maghambu kiki mwalekiki bhana bha chikambaku kutama?”
Bhabheleha bhakamuyangiki Falao, “Akambomba bha Kiebulania ngachebhalengana na akambomba bha Kimisili, bhombi bhabhi na makili, nabhombi bhalibhopola bhana mangani ja bhabheleha kuhika.” Bhela, Chapanga akabhatendili ghamboni bhabheleha habha, nabhombi Bhaizilaeli bhakapetalili kujonjukeka na kubha na makili nakanope. Kwa kubha bhabheleha habha bhuntopila Chapanga, Chapanga akabhajangatili kubha na bhana bhabhu bhene. Bhela Falao akabhalaghalakili bhandu bhaki bhokapi, akapwaghaje, “Kila mwana wa chikambaku joanabhelakikaje kwa Bhaebulania mundekalaje mu nkoka Naili, nambu kila mwana wa chimbomba mundekaje atamaje.”
Mpoto Bible Version. Copyright © The Word for the World International. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.