Rôm 7

1Wơ ŏh mi (bơ yơng ăñ jai ngơi ta nêh gư̆t pơp bhiên), mdăh ŏh mi so gư̆t năl ôh pơp bhiên mau pơp dơi tŏng ju nau nêh dŏng ŏk yau nêh hư̆n hôm brêh lăh? 2Bơ yơng nêh u ur mau sai hư̆n jêng pơp bhiên kăt ju băk ta nêh sai hôm brêh de di, ƀê̆ dăh ndă di sai khư̆t, hư̆n de tlĕh băh pơp bhiên yơng ta sai hư̆n. 3Hư̆n yơh, jăng jai sai hôm brêh, ndă di de gŭk ju băk tlau dơ dêh, hư̆n de lăm pơl de tơm jêng nêh dŏng tư̆r. Ƀê̆ dăh ndă di sai de khư̆t, hư̆n de dơi tlĕh băh pơp bhiên, de so hôm jêng nêh dŏng tư̆r wăt di lăh gŭk băk sai dơ dêh. 4Iên ya, wơ ŏh mi ăñ ji, ŏh mi tơm ăt jêh dơi nai lăm khư̆t yơng ta pơp bhiên mơn băh săk jăn Yang Tŏng Tlĕh di, no di ŏh mi dơi tăm tlăc̆ ta nêh dơ dêh, hư̆n jêng ta Mtao jêh nai lăm brêh hư̆t băh tŭk khư̆t, no di băl băn dơi mau ple ta Yang Trôk. 5Bơ yơng jăng jai băn hôm gŭk mŏng lŏng săk, grăp pơp he khơñ pơp tih găn gao pơp bhiên ĕh khăng mhŏ bruă mŏng grăp khăn săk jăn băn di no di mau ple ta pơp khư̆t. 6Ƀê̆ dăh nar o băl băn jêh dơi tlĕh băh pơp bhiên, bơ yơng băn jêh khư̆t yơng ta pơp ĕh khăng kăt băl băn, hư̆n yơh băl băn dơi mhŏ bruă ta pơp mĭn mhei Yang Ngăt Găl di ƀê̆ dăh so geh hui si truông yau yơng ta pơp nai čih.

7Kơt iên, năn pơp băn jrăng ngơi? Pơp bhiên jêng pơp tih lăh? Bruă hư̆n so mau ƀă. Ƀê̆ dăh, ăñ so gư̆t năl pơp tih ndă so mau pơp bhiên. Bơ yơng ăñ so gư̆t năl pơp tih he khơñ ndă pơp bhiên so tơ ti lăh: “Ei ru me he khơñ.” 8Ƀê̆ dăh pơp tih, jai jêh sŏk dơn mông găl găn gao pơp bhiên, ĕh ndơp grăp pơp he khơñ mŏng ăñ. Bơ yơng so mau pơp bhiên hư̆n pơp tih jrăng khư̆t. 9Gao băh iên, luôr lak, ăñ khăng brêh so mau pơp bhiên, ƀê̆ dăh jai jêh trôh pơp bhiên, hư̆n pơp tih wêh brêh hư̆t, 10ƀê̆ dăh ăñ hư̆t khư̆t. Jêh iên pơp bhiên jêng pơp lăm ndơp trôh ta pơp brêh, ƀê̆ dăh ĕh lŏ lăm ndơp ăñ ta pơp khư̆t. 11Bơ yơng jai jêh mau mông găl mơn băh pơp bhiên, pơp tih jêh mblơm ăñ, jêh iên găn gao băh iên, ĕh lăm khư̆t ăñ. 12Kơt iên, pơp bhiên jêng ƀrăh, pơp tơ tă jêng ƀrăh ya, geh tŏng, jêh iên nhăp găl.

13Kơt iên, pơp nhăp găl ĕh ñjêng pơp khư̆t ta ăñ lăh? Bruă hư̆n so dơi trôh ƀă. Ƀê̆ dăh, no di găn gao pơp nhăp găl, pơp tih dơi lăm ƀlang jêng pơp tih, hư̆n jêng pơp lăm ndơp pơp khư̆t mŏng ăñ, no di găn gao pơp tơ tă, pơp tih ndôl ĕh ñjêng djŏh ƀai. 14Bơ yơng băn gư̆t klă pơp bhiên jêng myang, bơ ăñ tơm jêng lŏng săk, jêh nai tăč blŏ jêng dư̆k mŏng sô̆ pơp tih. 15Yơng băh ăñ so wơng bruă ăñ mhŏ. Bơ yơng so geh ăñ mhŏ bruă ăñ khơñ. Ƀê̆ dăh ăñ mhŏ bruă ăñ hao nuih. 16Ƀê̆ dăh ndă di ăñ mhŏ pơp so ăñ khơñ, hư̆n ăñ tŭ ư ju băk pơp bhiên jêng pơp bhiên ñjêng nhăp găl. 17Ƀê̆ dăh mông ho ăñ tơm so hôm mhŏ bruă hư̆n ôh, ƀê̆ dăh pơp tih jai ĕh gŭk brêh mŏng ăñ! 18Bơ yơng ăñ gư̆t klă pơp so găl hôm gŭk mŏng ăñ, hư̆n jêng mŏng lŏng săk ăñ. Bơ yơng nuih nhăm khơñ pơp găl ăt hôm ĕh gŭk mŏng ăñ, ƀê̆ dăh khơñ mhŏ pơp găl so dơi. 19Bơ yơng pơp găl ăñ khơñ mhŏ hư̆n ăñ so mhŏ, ƀê̆ dăh pơp djŏh jêng pơp ăñ so khơñ, hư̆n ăñ mhŏ ĕh. 20Ndă di ăñ mhŏ pơp so ăñ khơñ, hư̆n so geh ăñ tơm mhŏ pơp hư̆n ôh, ƀê̆ dăh jêng pơp tih gŭk brêh mŏng ăñ. 21Hư̆n yơh, ăñ gư̆t năl pơp bhiên ho mŏng ăñ, jêng mŏng kuôn nêh khăp khơñ mhŏ pơp găl ho, hư̆n jêng pơp djŏh ƀai ăt hôm ĕh gŭk mŏng ăñ. 22Bơ yơng ăñ čhô̆ brơn yơng băh pơp bhiên Yang Trôk di hui si kuôn nêh mŏng nuông tŏ. 23Ƀê̆ dăh ăñ so ƀơn pơp bhiên dơ dêh mŏng săk jăn ăñ ĕh tŏng mblăh tăm dăng ta pơp bhiên mŏng pơp mĭn ăñ jêh iên ĕh dlăn ăñ ta pơp bhiên pơp tih di, jêng pơp bhiên jai ĕh gŭk mŏng grăp khăn săk jăn ăñ ji. 24Ăñ jêng ju nau nêh knap! Nêh tơm jrăng lăm tlĕh ăñ băh săk jăn pơp khư̆t di ho? 25Lăh găl Yang Trôk mơn băh Yang Tŏng Tlĕh Yê-su, Khua Yang băn! Bơ yơng hư̆n yơh, wăt di lăh ta pơp mĭn, ăñ tơm mhŏ bruă pơp bhiên Yang Trôk di, ƀê̆ dăh yơng ta lŏng săk hư̆n jêng thêm ñăt ta pơp bhiên pơp tih.