Mnong Rlam Bible Literal Text
Ga-la-ti 5:22
Verse 22 is marked below, with the whole chapter around it. Read from the start
Yang Tŏng Tlĕh jêh lăm tlĕh băl băn no di dơi êngiê. Kơt iên, ăn gŭk kjăp jêh iên man wêh tung hư̆t nung pơp jêng dư̆k ôh.
Ăn ñjrăng, ăñ, kăn Pôl, ngơi ta ŏh mi gư̆t ndă di ŏh mi khơñ tŭ pơp čhiêt tau, hư̆n Yang Tŏng Tlĕh jrăng so ndơp pơp tŭ dơn ta ŏh mi ôh. Ăñ wêh kñăm ju dŏ hư̆t ta grăp nau nêh tŭ pơp čhiêt tau klăh iêu nêh hư̆n mau bruă ăn gưt lĕ mơt pơp bhiên. Ŏh mi nêh tơm khơñ dơi ngơp geh tŏng yơng băh pơp bhiên hư̆n jêh nai ndrŏh băh Yang Tŏng Tlĕh, jêh nga băh pơp đač. Bơ băl băn, mơn băh Yang Ngăt Găl, yơng băh pơp đăo, băl băn hur har kăp găn pơp čang mơn yơng ta pơp geh tŏng. Bơ yơng mŏng Yang Tŏng Tlĕh Yê-su, pơp yuôm bhăn so geh jêng pơp čhiêt tau mdăh so čhiêt tau ôh, ƀê̆ dăh pơp đăo dơi lăm ƀlang băh pơp khăp khơñ. Ŏh mi krĕh dhul găl. Nêh tơm dơi ghă ŏh mi no di so gưt pơp bhiên? Pơp čhôl trôt hư̆n so trôh băh Mtao kuôl ndơm ŏh mi ƀă! Dŏng nê̆ pei ĕh lăm dang lĕ ju klŏ ƀhŭk. Mŏng Khua Yang, ăñ mau nuih nhăm đăo kjăp yơng ta ŏh mi, hư̆n jêng ŏh mi jrăng so mĭn mdê ôh. Gao băh iên, nêh tơm lăm rŭng pơp mĭn ŏh mi jrăng tŭ pơp kmhal, wăt di lăh nêh tơm hư̆n jêng. Ƀê̆ dăh, wơ ŏh mi, wăt di lăh ăñ hôm tơ ti pơp čhiêt tau hư̆n pơp mhŏ nai hôm ñư̆p ăñ? Ndă iên pơp păk bông yơng băh jhi tăm kăng jêh ndrŏh lơi ru. Ăñ khơñ ta băl lăm rŭng ŏh mi găl hĭn čŏng kriêu dêh hên tơm yơh.
Wơ ŏh mi, bơ yơng ŏh mi jêh kuôl trôh ta pơp êngiê, băh gu jêng pơp êngiê so geh no di wêh ăn hư̆t mông găl ta knuih pơp tih, mlih mŏng iên, ăn đru bruă ndăng găp yơng băh pơp khăp khơñ. Bơ yơng lĕ mơt pơp bhiên dơi mhŏ nư̆m mŏng ƀơn pơp tơ tă; “Ăn me khăp khơñ nêh kiêu ma me ndrơm klăh di săk me tơm.” Ndă di ŏh mi tăm kăp jêh iên sa luôn ndăng găp, hư̆n ăn răng, ơn ŏh mi čang lăm khư̆t li ndăng găp.
Gao băh iên, ăñ ngơi, ăn djhuang sak hui si Yang Ngăt Găl, hư̆n ngĭn ngăn ŏh mi so hôm mhŏ nư̆m grăp pơp khơñ lŏng săk di ôh. Bơ yơng lŏng săk khơñ mdê ta Yang Ngăt Găl, jêh iên Yang Ngăt Găl tăm dăng ta lŏng săk. Yơng băh bar đăh tăm dăng ju băk, hư̆n yơh so mau bruă năn pơp ŏh mi khơñ lĕ mơt pơp ho, hư̆n ăn mhŏ yơh. Ƀê̆ dăh ndă di ŏh mi mau Yang Ngăt Găl têk lăm, hư̆n ŏh mi so hôm gŭk mŏng sô̆ pơp bhiên ôh. Grăp bruă mhŏ lŏng săk di jêng klă ngăn ru, hư̆n jêng: čhơng tăt, ƀơ̆ ñơ̆, čhul bliêl, kôh rup yang, mhŏ jau, hao nuih, tăm pit, kĕh nač, jơñ nuih, tăm đat, so tăm guôp, jăh pôl, pơp nač, ñư̆l nơm, ñêt sa ju băk năn pơp ndrơm klăh di pơp tŏng tê̆ ho, jêh iên yơng ta grăp bruă hư̆n, ăñ buôi ŏh mi, klăh di ăñ jêh buôi luôr lak, kơt iên nêh tơm mhŏ bruă klăh iên jrăng so dơi dơn uôn Yang Trôk. Ƀê̆ dăh ple Yang Ngăt Găl di hư̆n jêng khăp khơñ, čhô̆ brơn, đăp nang, gĭr ăt, mhŏ găl, băn dhư̆, sĭt suôr, un dhun, gư̆t răng; so mau pơp bhiên dơi ghă lĕ mơt pơp ndrơm kơt iên. Gao băh iên, đơ nêh ting ju Yang Tŏng Tlĕh Yê-su jêh pŏng đĭn knuih lŏng săk wăt ta lĕ mơt pơp tluh ƀô jêh iên he khơñ ta jhi tăm kăng.
Ndă di băl băn brêh mơn băh Yang Ngăt Găl, hư̆n băl băn ăt djhuang sak hui si Yang Ngăt Găl. Ei ru ñjêng mgao tŏng hao nuih ndăng găp, kĕh nač ndăng găp.
Mnong Rlam Bible Literal Text. Copyright © FAR EAST BROADCASTING COMPANY. Licensed under CC BY-SA 4.0. Source: Open.Bible. Typeset from the source files; no intended changes to scripture wording. BibleKenya is not endorsed by the rights holder.
Full source notice & licence · CC BY-SA 4.0 · SourceEdition imported 2026-11-09.