2 Tê-sa-lô-ni-ka 2

1Wơ ŏh mi, yơng ta pơp jrăng trôh Khua Yang băl băn, jêng Yang Tŏng Tlĕh Yê-su, jêh iên bruă tăm tuôm băl băn di ta Khua Yang, hi dăn ŏh mi 2klăh iêu ŏh mi ei ru gơñ lăč mhăč tip mdăh rŭng răng mŏng pơp mĭn ŏh mi, ăt ei ru yơng băh ƀơn yang, mdăh yơng băh ƀơn pơp tơ ti, mdăh yơng băh ƀơn ră ñuôr dơ dêh klăh di ĕh trôh băh hi, jăng jai nai ngơi nar Khua Yang jêh trôh ru. 3Ei ru ăn nai mblơm ŏh mi ta djăp mta pơp, yơng băh gu pơp ndrŏh đăo trôh luôr, jêh iên kuôn nêh so mau pơp bhiên jrăng pơl, hư̆n jêng kuôn pơp rai lêk di, 4jêng băl tăm dăng jêh iên čŏng mbŭ dêh săk tơm tăm dăng ta djăp mta pơp nai năn jêng yang mdăh pơp nai kôh mpŭ, tăl kăn gŭk mŏng hih ƀư̆n Yang Trôk di, kăn pra mhŏ kăn tơm klăh di Yang Trôk. 5Ŏh mi so hôm kăh tôr lăh, jăng jai hôm gŭk băk ŏh mi, ăñ krĕh ăn ŏh mi gư̆t lĕ mơt bruă ho lăh? 6Jêh iên nar o ŏh mi jêh gư̆t nêh tơm hôm dơi ghă, no di kăn čuôm gu dơi lăm pơl mŏng trip mông kăn di. 7Bơ yơng pơp yuôm ndăp pơp so mau pơp bhiên jai mhŏ bruă ru, Mtao čuôm gu ƀơn jăng jai ghă ĕh nar o ăt hôm tăl trôh mông Mtao hư̆n du băh tŭk kŏng ghă, 8Jêh hư̆n băl so mau pơp bhiên jrăng pơl, jêng băl Yang Yê-su jrăng lăm rai ta nhăm băh dơk Khua Yang, jêh iên jrăng ndơp kăn ĕh ñjêng dăh dan yơng băh pơp guh ang pơp jrăng trôh Yang di, 9jêh iên pơp ĕh lăm pơl băl so mau pơp bhiên hư̆n jêng mơn băh bruă mhŏ Sa-tan di wăt ta lĕ mơt pơp myang jêh iên pơp ndrơh, ăt klăh di pơp myang pra mhŏ, 10jêh iên wăt ta grăp pơp huôk jăr so kpă ñăt thêm ta băl rai lêk, hên nga rai bơ yơng hên so čiêng sŏk ruôm pơp khăp khơñ pơp ngĭn ngăn ta hên tơm no di dơi tlĕh. 11Jêh iên yơng băh pơp hư̆n, Yang Trôk jao hên mŏng truông čhuai no di hên đăo ta pơp jăr huôk, 12no di lĕ mơt hên jrăng tŭ pơp phat dôih, hư̆n jêng lĕ mơt băl so đăo ta pơp ngĭn ngăn, ƀê̆ dăh wêh khơñ ta pơp so kpă.

13Ƀê̆ dăh, wơ ŏh mi, jêng lĕ mơt nêh jêh Yang Trôk khăp, hi răn ƀăn lăh găl Yang Trôk yơng ta ŏh mi. Bơ yơng Yang Trôk jêh săč ruăh ŏh mi klăh di ple bôk yăn no di dơi dơn pơp tŏng tlĕh mơn băh pơp ƀrăh ngôr Yang Ngăt Găl di jêh iên đăo ta pơp ngĭn ngăn. 14No di dơi dơn pơp đač hư̆n, Khua Yang jêh kuôl ndơm ŏh mi băh Pơp Găl hi di, trôh ta dơi dơn pơp guh ang Yang Trôk băl băn, jêng Yang Tŏng Tlĕh Yê-su. 15Kơt iên, wơ ŏh mi, ăn gŭk kjăp jêh iên ñôt kjăp lĕ mơt pơp krĕh mưng hư̆n jêng ŏh mi jêh tuôm riêm, wăt di lăh ta pơp ngơi mdăh ta ră ñuôr băh băl hi.

16Dăn ta Khua Yang băl băn, jêng Yang Tŏng Tlĕh Yê-su, jêh iên Yang Trôk, Bap băl băn, Mtao khăp khơñ băl băn jêh iên ăn ta băl băn pơp jôh lih hui hai wăt ta pơp čang mơn nhăp găl yơng băh pơp đač, 17dăn Khua Yang jôh lih jêh iên lăm kjăp nuih nhăm ŏh mi mŏng grăp bruă mhŏ wăt ta pơp ngơi nhăp găl.