1 Pê-trôih 2:9

1Kơt iên, trôh mông ndrŏh lat grăp pơp djŏh ƀai, grăp pơp huôk jăr jêh iên pơp pra mhŏ găl, pơp tŏng nač wăt ta pơp têh bro, 2klăh di băl ŏh nga, ăn gư̆t hêr dak tŏh myang ƀrăh ngôr, no di mơn băh iên ŏh mi dơi sak mŏng pơp têh ram tăl trôh ta pơp tŏng tlĕh, 3ndă di ŏh mi tuôm liêr gư̆t ru Yang Trôk jêng găl jôn, 4jai trôh mơñ ta Khua Yang, jêng bôk mau brêh, jêh nai ndrŏh ta ling, ƀê̆ dăh ĕh lŏ ñjêng pơp săč ruăh yuôm bhăn ta măt Yang Trôk, 5jêh iên ŏh mi yơh, klăh di grăp bôk mau brêh hư̆n, jai nai lăm ndŏk ĕh ñjêng ju mlăm hih myang, thêm ñăt ta bruă khua mhŏ yang ƀrăh ngôr no di myơr pơp mhŏ yang myang găl nuih nhăm Yang Trôk mŏng Yang Tŏng Tlĕh Yê-su. 6Hư̆n yơh, pơp ho jêh nai čih mŏng Ră Ƀrăh:

“Dlăng ho, ăñ ăn ta Si-ôn ju mlăm bôk mau niêr hih,

jêh săč ruăh, yuôm bhăn ngăn.

Jêh iên nêh tơm đăo ta Khua Yang nêh hư̆n so mau pơp prêng.”

7Kơt iên, pơp năng mpŭ hư̆n thêm ñăt ta ŏh mi jêng grăp băl đăo. Jêh iên đơ băl so đăo:

“Bôk mau jêh băl mhŏ hih ndrŏh lat,

mau hư̆n jêh ĕh ñjêng bôk mau yuôm kêng niêr hih”

8jêh iên jêng

“Bôk mau lăm păk jŏng, bôk mau lăm bông nêh.”

Ĕh păk bông hên bơ yơng so hên ñôt gưt pơp ngơi Yang Trôk, jêh iên yơng ta bruă ho pơp brêh hên ăt jêh nai kčăh ưm ru. 9Ƀê̆ dăh ŏh mi jêng pôl nhuôr săč ruăh, jêng bruă mhŏ yang mtao di, jêng pôl nhuôr ƀrăh ngôr, ju uôn lan gŭk mŏng pơp kĕ kriê Yang di, no di ŏh mi sak têh sơm grăp bruă ndrơh Mtao kuôl ndơm ŏh mi tlĕh băh pơp ngo măng mư̆t mŏng pơp ang myang Yang di, 10hư̆n jêng ŏh mi luôr lak “so geh jêng ju uôn lan”, ƀê̆ dăh nar o jêng “uôn lan Yang Trôk di”; jêng lĕ mơt nêh khăng “so dơi tlŏng đač”, ƀê̆ dăh nar o jêh “dơi tlŏng đač”.

11Wơ ŏh mi khăp khơñ, ăñ čhôl trôt ŏh mi, klăh di băl năč ndrơh jêh iên băl wăč băh uôn, ăn diêr wăč băh pơp tluh lŏng săk, jêng pơp tŏng mblăh tăm dăng ta ngăt nhuôl ŏh mi, 12jai răng kriê pơp brêh ŏh mi di ta pơp geh găl mŏng mbar băl čar ta ling, jêh hư̆n, mŏng grăp pơp hên ngơi djŏh yơng ta ŏh mi klăh di băl mhŏ ƀai, yơng băh so klă grăp bruă găl ŏh mi mhŏ, hên dơi nơ nei Yang Trôk mŏng nar Khua Yang čuă siêp.

13Yơng băh Yang Trôk, ăn gưt grăp pơp dơi kuôn nêh, năng ai hư̆n jêng mtao klăh di nêh ñôt bruă khua ram, 14mdăh băl khua kwar, klăh di nêh jêh mtao yua sak ndơp pơp kmhal băl mhŏ ƀai jêh iên pơp khôm ta nêh mhŏ găl. 15Bơ yơng ho jêng pơp khơñ Yang Trôk di, mhŏ bruă găl no di lăm dư̆t dơk nêh plư̆p mblo ngơi têh bhơi pơp gư̆t wơng, 16mŏng pơp brêh nêh êngiê, jêh iên so yua pơp êngiê ŏh mi di klăh di păng dhiêm lư̆m bruă djŏh ƀai, ƀê̆ dăh klăh di băl dư̆k Yang Trôk di. 17Ăn mpŭ grăp nau nêh. Ăn khăp khơñ ŏh mi tơm. Ăn bhŭng mpŭ Yang Trôk. Ăn mpŭ ta mtao.

18Wơ ŏh mi jêng băl ñjêng dư̆k, ăn gưt mpŭ ta khua pu me ta lĕ nuih nhăm bhŭng mpŭ. So mau băh gu băl khua găl jêh iên băn dhư̆, ƀê̆ dăh wăt ta băl khua djŏh ƀai ya. 19Bơ yơng nêh tơm tŭ pơp knap mñai jăng jai găn gao pơp djŏh yơng băh nuih nhăm mĭn ta Yang Trôk, hư̆n jêng ju mta pơp đač. 20Năn pơp guh ang mau ndă di ŏh mi mhŏ tih jêh hư̆n ăn tŭ pơp nai pŭ bang? Ƀê̆ dăh ndă mhŏ găl jêh hư̆n ŏh mi ăn gir găn gao pơp knap mñai, hư̆n jêng ju mta pơp đač ta măt Yang Trôk. 21Bơ yơng ŏh mi jêh nai kuôl ta pơp hư̆n, yơng băh Yang Tŏng Tlĕh ăt jêh tŭ pơp knap mñai mlih un ta ŏh mi, lơi ƀơn pơp tô mô ta ŏh mi no di ŏh mi dơi mhŏ hui têl jŏng Khua Yang,

22“Mtao so mhŏ tih,

ăt so mau pơp ngơi huôk nai so băh dơk Khua Yang”;

23jêng Mtao jai nai păh rak, Khua Yang so wêh păh rak ôh; jai tŭ pơp knap mñai, Khua Yang so rơm rap, ƀê̆ dăh Khua Yang jao săk ta Mtao phat dôih geh tŏng; 24nư̆k Mtao hư̆n jêh añ pơp tih băl băn mŏng săk jăn Khua Yang ta jhi tăm kăng, no di jai jêh khư̆t ta pơp tih, băl băn dơi gŭk brêh ta pơp geh tŏng, mơn băh têl sôt Khua Yang hư̆n jêng ŏh mi dơi băh kuôp ji. 25Bơ yơng ŏh mi ndrơm klăh di biêp suô̆ truông, ƀê̆ dăh wơ ŏh mi jêh du plŏ ta Mtao kĕ biêp jêh iên Nêh kĕ kriê ngăt nhuôl ŏh mi.