Waannisa Qonccitha 5

Maxaafannee Dura

1Yeypp guye, zufaanayil afa betteezay ushachch kushayid ganccerannee afar xaafinttii laappun maatamer gorddintteez xaath maxafitto ta be7eeza.1 2Pettii mino kiitanchchay fa qaala dhoqq udii, «Maatama bilodayisinnee maxafitto dooyodayis beezizay oonoo?» yeegii awaajjodar ta be7eeza. 3Zini salo maaqqin sa7a woy sa7app oommo maaqqin ye xaath maxafitto dooyodayisinnee i gancca be7adayis danda7eez oonkka baaya. 4Xaath maxafitto dooyodayisinnee i gancca be7adayis beeziza as dhabeez gishos ta iita yeekkeeza. 5Ye wode, cimataypp pettay taako, «Yeekkippe! Yihuda zerethi maaqqeez gaammay, Dawute sheeshay, laappun maatamita billodayisinnee maxatto dooyodayis danda7eeza» yeegeeza.2

6Yeypp guye, zufaanayil oyddii medhetethitayisinnee cimitayis gancce, shukintteez Dur garkk eqqeezana ta be7eeza. Ees laappun kacitaynnee laappun aafitay yeza. Yeyititay sa7a ubbayil kiitintteez Xooss ayyaan laappunita.3 7Ye Duray yi7ii, zufaanayil afa beteezay ushachch kushepp xaath maxafitto ekkeeza. 8E ye xaath maxafitto ekkeez wode oydd medhetithitaynnee laatamannee oydd cimitay Duray tiinayid guphinggeeza. Unttii pettay pettay diithinnee geeshshitay woosa maaqqeez ixaannee kumeez worqqa shaate aykkeeza.4 9Unttii,

«Xaath maxafitto ekkodayis,

maatame bili7odayis nees beeziza. 5

Abis giiko, neenii shukintteezaya;

zerethi ubbaypp, duma duma doonapp,

yaritappennee kaatetith ubbaypp,

ne suuthayir Xoossayis wozeeza.

10Nu Xoossayis kaatetithinnee qeese maaqqaday garkk udeeza

unttii biital afa kawutoda.

Unttikka gade ubba mooddoday»

yeegii oroth mazmuure yexxeeza.6

11Ta be7adar zufaanay, oyddii medhetithitaynnee cimitay yuushayid gaame kiitanchchitay yeza. U gaametithay mukulo toke mukulonnee taphphii mukulo toke taphphii mukulo maaqqeez giirtha si7eeza.7 12Ye kiitanchchitay dhoqq geez qaalar,

«Shukintteez Duray wolqqa, duretithii,

ecetithinnee minotithii, bonchcho, sabannee

anjjo ekkodayis beeziza»

yeegeeza.

13Yeypp guye, sa7a, salo, sa7app oommorannee abba gancce yez medhetithii ubbay,

«Zufaanel afa beteezayisinnee Durayis,

galata, bonchcho, sabannee wolqqa

medhippe medhinas maaqqo»

yeegii yexxodar si7eeza.

14Oyddii medhetithitaykka, «Amin77ee» yeegeeza; ma cimitaykka xuggunii goynneeza.