Galaatiya 5

Kiristtoosar yez wallotith

1Nuunii walottithar yezoday garkk Kiristtoosa nuna aylletithapp kesseeza. Yikkee, miinggii eqqoytta; maaqqii aylletith qambbarayid gelippate.

2Ta, Phawuloosa, giza si7oytta. Yi «Dookalintto maaddiza» gi yi dookalinttodayis koyko, Kiristtoosa yinttan abikka maaddooya. 3Dookalinttiza oonkka higgay kiittiza ubbita polodayis beezizana mahii ta odiza. 4Higge naagii xillodayis koyizitay, Kiristtoosapp shaakintteeza; Xooss aadho keehatithaypp yi haakkeeza. 5Zin nuunii Xooss Ayyana baggar ammanor xillodayis ufayisar naagiza. 6Yikkee, Kiristtoos Yesuusar yeziko, siiqor benttiz ammanopp attin dookalinttin, dookalinttekka attin nuna abkka maaddooya.

7Tiina yi lo77o woxxiza, zin yhatti tumas azazinttaamay garkk yinttan kayeezay oonoo? 8Yhay garkk iita dooshay yinttan xeegeez Xoossaypp ye7ekkaya. 9Yeykka, «Xiqqa irshsho munuqo ubba denthiza» ginttinttii xaafintteezay garkk.1 10Yinttis hara qofa baazayisi ta Godayil ammaninttiza. Zin yinttan buqiz oonkka Xoossapp fa pirdda ekkoda.

11Ta ishuntho, ta yhaya hellodayis dookalintto sabbakkizabaz maaqqiko, yeezin tana abis bayi7ee? Yey tuma maaqqeezako Kiristtoosa mazqalay bagga tamaarssay asis dhube maaqqaamizin. 12Yinttan buqizitay fana dookalith aadda baazin fana qaaratizakokka ta dosiza.

13Ta ishuntho, yi wallo yezodayis xeegintteeza. Maaqqozin, yi wallotithay asho amotith polodayis yinttis sankke maaqqippe; yeypp aathii pettay petta siiqor maaddoytta. 14Higge ubbay, «Ase ne ubbay garkk qadhdhoba» yeegiz pettii qaalar accinttiza.2 15Zin yi pettay pettayir saxinttizbazinnee miinttinttizbaz maaqqiko, yi woli wurssaamay garkk naaginttoytta.

Ayyana yessinnee asho yess

16Yikkee, ta yinttis odiza; Ayyanar yezoytta; yi asho amo yesha polippate. 17Asho amo Ayaana amor morkke; ma Ayyana amaykka asho amora morkke. Unttii pettay pettayir ixinttiza gishos yi dosizabaz oothodayis danda7ooya.3 18Zin Ayyanay yinttan kaalithiza baz maaqqiko higge yinttan haarooya.

19Asho oositay erintteezita; unttikka, lagite, tuna ootho, qayixe, 20eeqas goynno, bita, morkkintto, kachchii, qinaate, cashshii, fana dosithii, shaakintto, iita tobba 21gene, mathe, yethinnee yeyitita aazizita. Tiina ta yinttis odeezay garkk yhattekka ta yinttis odiza. Yhay garkk bazita oothizitay Xooss kaatetithii laattooya.

22Zin Ayyana aafe, siiqo, ufayssii, sarotithii, minthatho, haayotithii, lo77otithii, ammano, 23ashikketithii, fana haaro. Yhay garkk bazita ixxiza higge baaya.

24Kiristtoosa Yesuusas maaqqeezitay fa asho e iita qofayirannee e amayira wolla mazqalel afa sotteeza. 25Nu Ayyanar yeza baz maaqqiko, nuna Ayyanay kaalitho. 26An pettay petta yilosittarannee qinaatittar cer ceeqinttitha wolla ashshoda.